eSefarad Noticias del Mundo Sefaradi
Kero ke sepash ke mi nona ANULA HALIYO I LEVI era una grande kurandera i KOMADRONA, en el puevlo de KEPEZ, Chanakkale.
Yo de chikitiko viya komo eya tratava a los hazinos. Por egsemplo, les preguntava pishin ke se asenten ensima de un hali/tapet/alfombra
floreyado, enfrente de una meza redonda i chika. Kozas semejantes.
Tiyenez chakeka,
tyenez dolor de tripa,
tyenez dolor de Kavesa,
DIME KE ES LO KE SYENTES DE MAL!
Si teniyan koza en la kavesa, pishin tomava Kalay / led, lo deritiva i pishin lo echava en agua friya i kon muncho puuh, puuh MASHALLAH
de lo ke aviya en laz figuras del KALAY en la agua, les rekomendava :
No te metas hashvari (una banda atada en la frente)
Metete RAKI en la tapa de la kavesa,
Ke tu marido beva tambien…
No te eches kon tu espozo esta noche.
Esta nekeva no lo deshava al povre marido mansevo ni asentarse en su kama.
Masajera grande era mi nonika de 4 pyezes i medyo! …
PARA DOLOR DE ESPALDAS ERA UN MASAJ DE UNA MESKLA DE AZETE DA OLIVA KON RAKI.
LA ESPALDA DOSPUES SE ALIMPYAVA BUENO BUENO KON ALKOL.
Dospues aydeeeeeeeeeee saliya laz VENTOZAS de un kuti de tavla de LEBENON kon una golor templorar.
Un pokitiko de koton kon alkol en la VENTOZA asendido kon la kandelika asendida al nombre de la hazina i pishin la ventoza se apegava a la espalda de la hazina.
Teniya ke ser 7 ventozas para kada diya de la semana…
SALAMONIKO AMIRA
OPTIMISTO CANAKKALELI
Sal Amira
CHANAKKALELI, EN MIAMI USA.
Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.
Fuente: Publicado en Sefaradimuestro – https://groups.yahoo.com/neo/groups/Sefaradimuestro
