LA SAVOR DE PENSAR A LO KE BIVI… por Sal Amira: EN EL HOSPITAL

 

Aserkandomos a mi presyado onkli SABETAY en la guerta del hospital todos estavamos yorando por lo ke le okuryo. Sabetay mos vido de leshos, alevanto sus manos, trato de kaminar i no puido azerlo.. Kayo en su siya, KON SUS BRASOS DAYINDA ALARGADOS…

El doktor mos ekspliko ke Sabetay tyene mareyos kuando se alevanta en d’una i ke su sangre no esta sirkulando komo kale por agora.

Mi nono koryo para abrasar su ijo… I mozotros kaminimos kon prestor. Mi papu i mi onkli Sabetay son de mizmo boy. Los dos muy altos.

Teniya mustachos komo el de ATATURK, kayendoles un pokitiko abasho de los lados de sus mushos.

Mi onkli Sabetay tyene los kaveyos muy ondulados igual a los de mi nona Anula. Es por esto ke mis tiyas shirofonfonas JANTI,i RASHEL lo yaman Afrikano!

Yusef mos enkomendo de trayer de las siyas blankas para asentarmos i pishint YAKO i YO korrimos i las trayimos.

Al yegar allado de los ombres el presyado enpeso a gritar SALAMON, YAKOVIKO, ke grande ke vos izitej. Ya estaj mas grandes de mi madre.

A YUSEF le dyo un grande abraso dizyendole ke estava muy orguyozo de el i lo felisito por yegar a ser avokato.

A kontinuar…

 

SHELOMIKO DARDANELLI…

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro