LA SAVOR DE PENSAR A LO KE BIVI… por Sal Amira: EMPESI A ISKRIVIR EN MI LIVRIKO

Salimos de COKAL i avansimos kon auto por 2 oraz en el muevo kamino entre Galipo i Estanbol en la evropeya de Turkiya. Parimos en una sivda para tomar benzina para el auto.

Esto muevo ke esto iskrivyendo lo esto iskrivyendo en el livriko (defter) ke me merko mi primo YUSEF. Me merko 3 deyos i me rekomendo ke nunka me kede de iskrivir mis memoryas.

LIVRIKO canim amigo miyo:

Te vo dizir la verda ke oy miri atras, al kamino ke estamos deshando atras i tuve tristesa en mi pecho i en mi ser. Sinti ke esto desahando atras lo mas ermozo ke iva ver en mi vida…. Lo esto deshando atrazs lo mas importante.. Loz judiyos espanyoles, mi sivda ande nasi .. DARDANELS.

LIVRIKO:

– Shelomo, nunka eskrivas en mis pajinas tristesas ! Vaz a ver ke ermuzuras vamos a tener en el futuro… Aydeeeee vreeee ! Dame una riza, amostrame tus dyentes de perlas para ke me sienta byen!

Mi nono YAKO mos espliko ke en una ora estaremos entrando al juristihyo de Estanmbol i vamos a parar en BAKIRKOY una chika sivda ande esta la hastane/hospital de los lokos, enfermos de la kavesa o komo dizimos, del meyoyo. Vamos a vijitar a su ijo SABETAY. Ermano de mi madre.. Mi tiyo presyozo.

Aze un anyo, mi onkli Sabetay tuvo ke yir a la armada Turka. A lo ke me konto mi madre, por ser judiyo unos KURDES insultaron mi onkli Sabetay i el tuvo ke peleyarse kon eyos. Estos atavanados analfabetos, animales, lo aharvaron entre 4 de eyos i le apegaron muncho en la kavesa, al presyado de mi nona. El kedo un tyempo mareyado. Los doktores de la armada se desidyeron i lo metyeron en el hospital de BAKIRKOY…

A kontinuar…

 

SHELOMIKO DARDANELLI…

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro