LA SAVOR DE PENSAR A LO KE BIVI… por Sal Amira: ANTES DE SALIR EN KAMINO PARA ESTANBOL

Estamos enpezando la sigunda parte del viaje a ESTANBOL, de la kaza de la ermana de mi nonika ANULA ande pazimos una noche maraviyoza. No kreygo ke me vo olvidar de la ermozura de la kama ke durmi!

Yako i yo mos alevantimos antes ke nasyera el sol, mos lavimos las karas. La tiya Beki ya mos esta yamando ke mos asentemos en la meza para desayunar i ser fuertes para el kamino ke vamos a tomar kon el otombil de mi primo YUSUF.

En la meza ay BURMUELOS chiktikos i grandes. Ay una roska estilo de PURIM.. – Me acodro ke mi mama metiya un guevo haminado ensima de las roskas de PURIM- . Kezos kashkaval, i kezo blanko fresko kanpesino, franjola … Chay (tea) buyido en una tetera moderna briyando komo la luna kuando esta entera en el siyelo.

Dospues del kahvalti- petit dejeuner- se sirvyo un fincan de kave a todos los «grandes». A los chikitikos no se da kafe porke dospues se PISHAN PRETO…

Dos semanas atras en CHANAKKALE, mi tiyo Somoel me aviya dado ke bevyera un poko de kafe i no pishi preto i pensi ke no so mas kriyatura!

YILDIZ ya se esta yindo a la eskola. Otra vez me toko la mano kon su ternura, i yo no puide eksplikarme otra vez lo ke sinti!

La tiya Beki mos abraso i a su ijo Yusef tambien kon muncho karinyo. Mi nono YAKO abraso a todos kon lagrimas en sus ojos. El tiyo Hayim mos metyo su mano ensima de muestra kaveza i resityo bendisyones ke no konosko…

SALAMONIKO

Sal Amira
CHANAKKALELI, EN MIAMI USA.

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro