LA SAVOR DE PENSAR A LO KE BIVI… por Sal Amira: Ah,ah, mi kirido livriko ke me lo merko mi primo por dos revanim!

No te puide iskrivir pishin kuando vine a la kaza ande se establesyeron mi padre i mi madre en el baryo Tophane de Estanbol porke estuve
muy triste i deskotento kon las kozas ke vi i observi…

La entrada del edefisyo ande vo morar esta tan suzya i kon una golor tan ofensiva a mi nariz ke me dyo bulantis (enguyos).

Papu mos tomo de las manos i mos yevo a las eskaleras. Asuvimos al treser pizo ande estava mi madre i ande ivamos a bivir temporaramente..

Las eskaleras estavan muy oskuras…

Todo estava tan morbido komparado a la kaza ande moravamos… Una kaza de dos kates (etajes, pizos) i una guerta de mil maraviyas en la sivdad de CANAKKALE…

Livriko, me esto sintyendo muy triste ,muy konfundido kon lo ke te vo eskrivir…

Asuvimos al treser kat i vide un ampul enkolgando del tavan. En la oskuridad noti kuatro kamaretas.

Se viya ke las puertas no fueron boyadeyadaz/pintadas puede ser de mas de 20 anyos! DOS DE ESTAS PUERTAS TENIYAN MEZUZAS ENKLAVADAS.

Dospues me rendi kuento ke en kada kamareta de estas puertas biviya una famiya kompleta!

La puerta de la kamareta muestra estava al fondo, a la syedra de la salida de las eskaleras.

Allado, a la derecha, aviya una yave para una salika kon agua i el lavador, komuna para todos ke moravan en el pizo. Allado de el lavador
estava la kamareta, ke kon shaka/bromeyando la yamavamos el SURTIDOR… En su tavan tambyen se aviya enkolgado un ampul.

A kontinuar…

SHELOMIKO DARDANELLI…

Sal Amira
CHANAKKALELI, EN MIAMI USA.

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro