Keridos amigos i amigas.
La salvasion del rehen Israeli Arabo «Parhan al-Qadi» mos amostra la solidaridad entre djudios, beduines, musulmanos i druzes en el artikolo presentado por «Shane Desiatnik» en su konversasion kon «la Federasion Sionosta Australiana. «Al-Qadi» fue salvado por la Armada de Israel de un tunel de Hamas en el Sud de Gaza despues de 10 mezes de kaptividad. Este ombre de 52 anyos fue topado por el komandante de la marina «Shayelet 13 kon sus tropas de kombate «Yahalon» i es padre de 11 kriaturas en la komunidad Beduine serka de la sivdad ‘Rahat» lavorando komo gardia en una fabrika del «Kibutz Magen».
En 7 Oktobre 2023 el fue tomado en rehen. I oy en un momento de alegria estava rodeado por su famiya en el «Sentro Medikal Soroka» en Beer Sheva» i disho ke toda la famiya estava en alegria. 34 rehenes eran konfirmados muertos. Era komo si le avian dado una segunda vida a este ombre ke tenia 2 mujeres i 11 kriaturas.
El kibutz estava a 5 kilometros de Gaza i el fue atrapado por Hamas serka de la komunidad de «Mivtahim». A traves el pais se paso la palavra ke 100 de otros rehenes se kedavan en Gaza. «Hatem al-Qadi» disho despues en ebreo ke este evenemento era mejor ke la yegada de un bebe. kon una sonriza grande en su boka. En realidad el no esperava tornar atras i alavo al Dio. Aziendo un video lo amostraron avlando kon el Primer Ministro «Binyamin Netanyahu» referando a el komo «Abu Yair» remersiandolo por su lavoro. Disho «izitesh todos un lavoro santo i ay otros ke esperan tambien».
Segun Hagari el se avia fuyido del tunel kuando en realidad esto fue echo grasias a la intelijensia de las tropas. Desde dias estavan operando ayi en pensando ke puedian aver unos rehenes en esta rejion. Ai-Qadi estava solo i no avia dinguno de Hamas a su lado. Ansi no uvo una resistensia. Kisas las gardias se avian fuyido tambien. Se esperava ke una delegasion de Hamas se vaiga a Doha i a Kairo por el alto del fuego.
Ni Israel i ni Hamas pudieron yegar a un akordo. Kontinuaran las diskusiones en Qatar kon los mediatores de Ejipto, Amerika i Qataris. Hamas entretiempo kontinuo a embiar sus roketas de distansia grande al sud de Israel. Rishon le Tsion fue aharvado lo mas. Avlar kon eyos parese mas a avlar kon el diavlo. A kada vez las kondisiones se azen mas duras. Uno se demanda si de verdad van a tener una solusion.
SALUDES A TODOS
Tradusido por Simon Geron de Sydney
Fuente: Ladinokomunita