eSefarad Noticias del Mundo Sefaradi
Sovre RASHI: su ovra, la leyenda, i la grafia
El Rabino Rashi (1040-1105) es konosido entanto ke el mas grande komentatero de la Tora. Su padre el Rabino Itzhak era un savio sovre la Tora, i era desendiente del Rey David. Es rakontado ke tenia en su posesion un diamante muy ermozo ke se avia transmetidoo en su famiya por jenerasiones. El Rabino Itzhak tenia muncho kargo de este diamante, i esperava ke un diya este diamante sera dedikado a la konstruksion del Beit haMikdash. Afito ke un diya una piedra muy presioza avia desparesido de una statua en la katedrala del payis, i el Rey se avia echo de sangre negra por esta piedritad. Entretiempo, los mesajeros del Rey avian oyido ke en la sivdad de Troyes bivia un djudio ke posedava una tala piedra. Un dia una persona se presento ande el Rav Itzhak kon la ofra de merkar el diamante, i le disho ke su patron keria en primer verlo. El Rav Itzhak i el ombre suvieron a una nave kon el diamante ke el Rabino ke estava kudiosamente guadrando en una bolsa. Kuando la nave estava avansando sovre el rio, el mesajero le disho a Rav Itzhak ke estavan viajando para enkontrar al Rey, ke obligara el Rav Itzhak de venderle el diamante, i le demando de amostrarle el diamante. En esto, el Rav Itzhak se aserko al bodre de la nave i sakeo el diamante alas aguas del rio. Al mesajero lo konvinsio ke avia pedrido el ekilibro i ke la piedra se avia aresvalado a la agua! En este momento, el Rabino oyo una boz ke vinia de los sielos: «Renunsiates a un luminoso diamante por la gloria del Dio. Seras rekompensado kon un ijo ke aklarara kon la Tora tu puevlo.» Al anio segiente, en 1040, al Rav Itzhak le nasio un ijo. Lo yamaron Shelomo ke asta muestros dias kontinua a aklarar a los djudios.
Su Ovra
El nombre Rashi deriva de las primeras letras de Rabí Shelomó Itzhaki, ke se refera a ‘Rabi Shelomo de la familia de Itzhak.’ Rashi nasio en Troyes, en el Norte de la Fransia. Viajo a Worms i a Mayence en Germania, sentros de estudios djudios, para anchear i desvelopar sus konosensias, asigun ke era el uzo en akeas tiempos. Ala edad de 25 anios abolto a la sivdad de Troyes, ande empeso su kariera de instruktor i de redaktor, establisiendo su eskola de estudios de la Tora i del Talmud. Sienes de elevos se arekojeron en esta eskola para gozar de su vasta erudision i de su manera distinktiva de interpretasion.
Su fama i su popularitad, Rashi las deve a sus komentarios ke se remarkan kon sus brevidad, klaridad i erudision. Sus segideros kontinuaron a transmeter i a difuzar sus ideas. Sus komentarios sovre el Talmud devinieron los tekstos de baza por los rabinos i sus elevos, i sus komentarios sovre la Tora devinieron los livros de instruksion del puevlo. De este modo, el Norte de la Fransia parvino a ser uno de los mas grandes sentros rabinikos en los siglos XII i XIII. Aunke su fama repandida, no se save bastante sovre su persona sino ke no kovrava moneda por sus servisios relijiozos i ke se mantenia del komersio del vino.
La influensa de Rashi no se avia limitado solo a los sirkolos djudios. El pretro fransez, Nicolas de Lyre (m. 1340), se avia servido anchamente de los komentarios de Rashi en su ovra. Nicolas, en su torno, tuvo una influensa muy grande sovre Martin Luther, ke iva kavzar grandes ebranlamientos en el Mundo Kristiano. Kuando Rashi no era siguro ke un biervo en Ebreo o en Arameo puedia ser entendido, el no ezito de trasledarlo al Fransez. Ansi, uzo unos tres miles de biervos en Fransez. Biervos ke fueron mas tadre un manadero importante para el estudio de la lingua franseza del siglo XI.
Los ultimos diez anios de su vida fueron atristados por la primera Kruzada (1095-1096). Las armadas kristianas en sus kamino para konkistar la Tierra Santa de los musulmanes, destruizaron komunidades djudias en martirizando salvajamente munchos de sus miembros, entre eyos sus serkanos i sus amigos. Dinguno de estas desgrasias no es reflektada en sus ovras. Solo, savemos ke en estos dias, Rashi kompozo unas orasiones espesiales en el jenro de Selihot para suplikar la miserikordia del Dio.
La Leyenda
Una leyenda rakonta ke la fama de su savidura era repandida no solo entre los djudios, ma en mismo tiempo entre las nasiones. Por esta razon, Godefroi de Bouillon, el komandante de la Primera Kruzada, vizito a Rashi para saver su opinion sovre su dezeo de konkistar Yerushalayim de los Ismaelitos. Rashi le respondio ke iva prarvinir a konkistar Yerushalayim, ma despues su armada sera destruyida i ke iva aboltar a la sivdad solo kon tres kavayos. Godefroi se avia ensaniado en djurando ke si iva aboltar mismo kon kuatro kavayos, se iva vengar del Rabino i de todos los djudios del payis. La prediksion de Rashi se avia realizado. Godefroi avia aboltado kon kuatro kavayos i sus kavalieros, inkluido Godefroi.
Portanto, kuando estos kuatros pasaron por el portalio de la sivdad, el arko del portalio se avia efondrado en matando el kuatren kavayo i su kavaliero. Godefroi bushko a Rashi en la sivdad i no lo topo. Le fue dicho ke el Rabino no estava mas en la sivdad i ke se avia adjuntado a sus avuelos.
En Worms egziste una sinagoga i a su lado una kaza konosida entanto ke beit hamidrash, atribuadas a Rashi. De mismo ke unos de los portalios de la sivdad yeva el nombre de Rashi.
Es reportado ke Rashi rendio su alma en eskriviendo el biervo ‘puro’ en uno de sus komentarios. Su tomba no es konosida.
La Grafia Rashi
La grafia kursiva konosida entanto ke ‘grafia Rashi’, fue yamada al nombre de Rashi kuaji kuatro siglos despues de su muerte. Rashi mismo eskrivio en uzando los karakteres ebreos regulares asigun el uzo de las komunitades eshkenazias de su tiempo. Durante la istoria, fina ke la impremeria aparesio, los tekstos fueron reproduisidos por eskrito. La persona ke se okupava de esto es yamada katvan en Ebreo. La eskrituria Rashi fue formado durante un proseso de transformasion progresiva. Doz razones fueron en la baza de su adopsion. La primera fue la nesesidad de eskrivir el karar posivle de presto. Pormo de esto, la forma kubika de las letras ebreas empesaron a arondesersen. La segunda razon fue el fakto ke la forma redonda de estas letras estavan okupando mas poko de lugar. Esta forma de eskritura egzistio muncho antes de Rashi, sin ke sea nomada Rashi.
Su apelasion provino del fakto ke el komentario de Rashi de la Tora fue imprimado kon esta grafia, ke era muy populara en este tiempo i posiblamente para ke este komentario se puede apartar de los otros tekstos relijiozos ke no kontienian los komentarios de Rashi. Este livro es en mismo tiempo el primer livro en Ebreo ke su data de publikasion es konosida i es konsiderado en tanto ke el primero livro imprimado en Ebreo. Fue publikado en el anio 1475, en Reggio, Italia.
La la grafia Rashi kontinuo a ser populara i despues de esta data. Munchas ovras, parikularmente en las komunidades sefardis i del Oriente kontinuaron a utilizarla. De mismo, la mas grande partida de kreasiones liturjikas, literariaras i jurnalistikas en djudeo-espaniol en segito al egzodo iberika fueron publikadas kon la grafia Rashi. De muestros dias, estas ovras konstituan una prova konkreta de la erensia sefardi.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
