eSefarad Noticias del Mundo Sefaradi
Sefer Yuhasin
La Ovra De Avraham Zakut Publikada En Estambol
El Rabino Avraham ben Shlomo Zakut (1452 – 1515) es konosido prinsipalmente por su kontribusion a la astronomia. Un otro aspekto de su kariera, akeo de istoriano, es ekspresado en su ovra Sefer Yuhasin – Livro de la Antesedensia – ke fue publikada por la primera ves en Estambol por Samuel Shalom en el anio 1666.
Asigun es ekspresado por su otor en el prefasio de su livro, el buto de esta ovra es de kontribuir a la tarea de los talmudistos. Por esta razon, el Rabino Avraham Zakut, en los primeros artikolos trata de las personalidades del Talmud, en ancheando su lavoro sovre Los Alkavos Savios de Israel. Su sigundo buto es de suportar el Djudaismo en sus debatos kon el Kristianismo.
Sefer Yuhasin, en lo ke konserna las personalidades de la Mishna i del Talmud, depasa en su totalidad i su perfeksion todas las otras ovras ke la presedaron. En akeos tiempos, livros de istoria eran en jeneral konsiderados entanto ke ovras subsidiaros a las kreyensias relijiosas i a los preseptos de la Ley. La literatura istorika en la Edad Mediana era bastante limitada. Los istoriones avian deskrito los evenementos i los rakontarios en notando sus datas, portanto sin prezentar los atadijos de estos kon los karakteristikos de las personas involvadas en el konteksto istoriko i espritual de sus tiempo. La istoria no seando konsiderada en tanto ke una disiplina independente de la konosensia, su kampo de estudio era limitado a enforteser las kreyensias relijiozas en kontentandosen de reportar prinsipalmente las leyendas i los mirakolos.
Antes de ser intitulada Sefer Yuhasin, Zakut avia eskojido a esta ovra otros titolos komo Sefer Hasidim – Livro del Relijioso, i Sefer Kedoshim – Livro de los Santos. En la konklusion del livro, el nota ke su buto es de render omaje a las personalidades savias i santas de Israel. Zakut prezenta la vida de los savios del Talmud i de la Mishna en sus orden kronolojiko en elaborando el proseso de la kontinuasion de sus opiniones i de sus efetos. Por esto, Zakut se refera a diversos manuskritos i livros en komparando sus kontenido para arivar a la version la mas korrekta posible.
De mismo, aze la narasion del Livro de Zohar, i aprova de korijar las faltas en el domeno de la Kabala de los eruditos ke lo presedaron. Diskuta frekuentamente las ideas de RamBam i de Abraham ibn Daud. Sovre esto se eksplika ansi: «A las vezes una chika kandela aklara mijor los burakos i las fisuras ke una grande luminosidad.»
Sovre la Biografia del Rabino Zakut
Zakut estudio la astronomia, la matematika i la astrolojia en la Universitad de su sivdad natala Salamanka, ande mas despues las ensenio en su universidad. Su prinsipala ovra, HaHibbur haGadol – El Grande Tratado – trata de la astronomia i fue publikada en 1478. Zakut kontinuo sus investigasiones en enseniando despues en la Universidad de Saragosa, ande publiko su segunda ovra, Tratado breve en las influencias del cielo, alakuala fue aneksado un estudio intitulado, De las eclipses del sol y de la luna.
Kolon se avia entretuvido kon Zakut, probablamente en esta perioda, i Zakut le avia prokurado informasiones sovre la astronomia. Se save ke las tabelas astronomikas de Zakut akompaniaron siempre a Kolon en sus viajes.
La vida de Kolon i de sus kompanieros fue salvada grasias a las tabelas de astronomikas de Zakut. Kuando la flota de Kolon se abrigo en Jamaica a la segida de una hurikana, los indijanos de este payis se komportaron de una manera ostila i no fueron prontos a furnisar komida a Kolon i su ekipo, mismo ke estos estavan a la limita de estarvasion. En estos momentos Kolon en bazandose sovre las tabelas de Zakut supo ke iva akonteser una eklipsa lunara el dia de 29 del februar 1504. Kolon despues de aver asemblado los chefes de los indijenos, los avia menasado de maldizirlos en desparesiendo la luz de la luna. Kuando el eklipso aparesio, los indijenos fueron tanto epuvantados ke rogaron de Kolon de aunar la maldision. En esto, Kolon izo ke estava demandando de su Dio de meter fin al eklipso. Kon la terminasion del eklipso, los indijenos akumplisieron kon grande respekto todo lo ke les fue demandado.
En el anio 1492, kon la proklamasion de la ekspulsion de los djudios de la Espania, kuando Zakut arivo al Portugal, su fama lo avia presedido. El Rey Joao II, ke era el mismo un eksperto en la astronomia, favorizo a Zakut de enseniar en la universitad, en nominandolo el Astronomo Real.
El astrolabo, ke era un instrumento uzado para determinar la pozision de los puerpos selestos, fue improvada por Zakut. El muevo astrolabo, esta ves, echo de kovre al lugar de tavla, rendio posible la navigasion en los oseanos de una manera presiza.
Las tabelas astronomikas de Zakut ke fueron publikadas en 1496, respandieron su fama en la Evropa i en el mundo islamiko. Durante su sejorno en Portugal, Zakut arivo a muevas konkluziones sovre los ayres i las tempestas en la zona tropikala, i sus investigasiones provaron ke era posible de arivar a la India en entornando la Afrika. Vasko de Gama, antes de partir a la deskuvierta de la India, avia konsultado a Zakut en prezensia de sus navigatores.
El Egzilo de Portugal
En segido la desizion del Rey de Portugal ordenando a los djudios de konvertirsen al kristianismo o de kitar el payis en 1497, Zakut kon su ijo parvinieron a arivar a la Tunisia solo en 1504, despues ke fueron arestados dos vezes en sus kamino.
Es aya ke en 1504 Zakut kompleto su ovra Sefer Yuhasin sovre lakuala estuvo lavorando munchos anios de antes.
Muy poko se save sovre los alkavos anios de su vida entre 1497 i 1515. Despues de aver pasado a la Tunisia, lo ke se save es ke estuvo en 1513 en una yeshiva en Yerushalayim, i ke en 1515 estuvo en Damasko.
*
El livro de la Asendensia reprezenta un paso importante verso la investigasion istorika. Esta ovra fue konsiderada durante jenerasiones enteras en tanto ke la ovra la mas kredible sovre la istoria djudia.
El fakto ke su primera edision fue realizada en Estambol fue probablamente determinado por del rolo sentral de esta sivdad durante el siglo XVI, en el mudo djudio i en la Diaspora sefardi en partikular.
—————————————————-
Giyo Bibliografiko:
(1) «http://www.sephardicsages.org/mjh-intro.html» Sephardic Sages Past & Present. Sefer Yohassin Book of Lineage. International Society for Sephardic Progress. 03. 05. 2004. Aparte de la biografia de Zakut, este sitio kontiene la treslasion kompleta al inglez del Sefer Yuhasin.
(2) Roth, Cecil. «The last years of Abraham Zacut», Sefarad, IX, 2, Madrid-Barcelona, 1949.
(3) Gutwirth, Eleazar. “The Sefer Yuhasin and Zacut’s Tunisian Phase”. Judaísmo Hispano. Estudios en memoria de José Luis Lacave Riaño (Madrid: Elena Romero, 2002), 767-777.
(4) Cantera Bugos, Fransisco. Abraham Zacut, Siglo XV, M. Aguilar, Madrid, 1931.
(5) Chabas, José and Goldstein, Bernard R.., Astronomy in the Iberian Peninsula: Abraham Zacut and the Transition from Manuscript to Print, American Philosophical Society, Philadelphia, 2000.
(6) Bueno, José M. Cobos. Un astrónomo en la Academia Renacentista del Maestre de Alcántara Fray Juan de Zuñiga y Pimentel : Abraham Zacut, FESEM, Badajoz, 2001.
———————————————————————————-
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
