eSefarad Noticias del Mundo Sefaradi
«Djoha i su Kavayo«
Djoha teniya un kavayo. Kada ves ke saliya a los kampos, se arodeyava en riva de su kavayo. Una de estas vezes, despues de arodearse buen karar, le tomo un ambre grande.
Apersivyo un arvole de igo muy alto. Se aserko del arvole. Ma, achakes de su altor, no pudo alkansar a arankar los igos.
I, kualo es ke izo?
Se metyo en pyez en riva de su kavayo i empeso a arankar los igos. Ainda, kuando los estava arankando, un ombre ke estava pasando de ayi en riva de su azno, le disho:
«Peryites tu el meoyo? No se suve en pyez a un kavayo, porke el kavayo puede kaminar unos kuantos pasos i te puedes kayer en basho.»
Le respondyo Djoha:
«Mintirozo!»
Pasaron unos kuantos puntos i el kavayo kijo komer yerva. Kamino verso la yerva i Djoha se arezvalo i se kayo en basho.
Koryo Djoha detras del ombre kon el azno i le demando:
«Komo puedeser ke supites ke me iva kayerme?»
Le respondio el ombre:
«No es klaro? Si estas en pyez en riva del kavayo, el kavayo ve yerva i kere komerla, echa unos pasos i tu te kayes.»
Djoha le disho:
«Esto vyendo ke tu sos una persona muy savida! Por esto, no te desho tu yaka fin’a ke me dizes kuando me va murir.»
El ombre no supiendo de ke manera desbararse de Djoha, le respondio:
«Kuando te vas a sintir ke tus manos, kon tus pyezes i tu frente se estan entezando mas del karar, esto es siman de tu muerte!»
Pasaron unos kuantos mezes i el invyerno arivo.
De muevo salio Djoha a los kampos kon su kavayo.
En supito, sintyo ke estava muy yelado. Se toko los pyezes, las manos i su frente i se apresivio ke eran yelados. Pishin, penso ke ya se avia murido.
Abasho de su kavayo, se echo en riva de la tierra i se kedo ayi sin meneyarse.
En esto, pasaron dos personas de ayi. Se aserkaron de Djoha i lo saludaron. Kontinuaron a avlar a Djoha i todo en kedando espandido en basho sin meneyarse, Djoha no les respondio.
Las personas se konvinsieron ke Djoha se avia murido. Tomaron a su kavayo i empesaron a alesharsen del lugar.
Despues ke avian avansado de unos kuantos pasos, los yamo Djoha kon una boz fuerte, i les djuro:
«Si no era muerte, mataria a todos los dos de vozotros i tomaria mi kavayo
atras!»
——————————————————————————————————-
Del folklor de los djudios de Turkia
Gad Nassi
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
