eSefarad Noticias del Mundo Sefaradi
Los Karayim
una aliansa de diversitad etnika i esprituala
————————————————————————————-
El karaismo ke avia emerjado en Bagdad, en el siglo VII, basho el Kalifato abbasi, fomento en un environmente de interaksion de diversos koryentes eterodoksos, ke avian aparesido kon la kolizion del Islam i las relijiones lokalas. Los karayim rechazaron el korpus espiritual de la erensia talmudika ke avia evoluado desde los tiempos del Segundo Templo, ansi ke adoptaron varias doktrinas del Islam. Todo kon esto, aparesieron en los siglos IX i X, entre la sekta, kontinualas disansiones i varias subdiviziones.
Inchendo uno de los mandamientos esensialas del djudaismo, , los Karayim optaron por volver a Yerushalayim. Es de ayi ke propajaron sus preseptos, en promotando sus aktividad de proselitismo.
El orijen etniko de los karayim del SudEste de la Evropa, ansi ke del Norte de la Mar Preta, kontinuo a ser un sujeto non entieramente rezolvado. Siertos konsiderandolos entanto ke los desendientes de los nomados turkos, i otros, komo los desendientes de los trivos deportados de Israel, por los asirianos.
De toda manera, es grasias a la konviksion sovre sus etnisidad non-semita, ke ivan a ser salvados de la salvajeria nazista.
—————————————————————————————————————————
La sekta de los karayim – o, karaites – fue fin’a el siglo IX, konosida komo ananites, derivando del nombre de su fondator, Anan benDavid (c. 715 – 795?). El byervo karayim se refera al byervo Mikra – un sinonimo de la Bibla, ansi ke al presepto baziko de la sekta: la adopsion de la validitad de la Biblia eskrita en ekskluendo la tradision talmudika-rabinika.
La aparision de la sekta fue probablamente el rezultado de una kombinasion de diferentes faktores: la interaksion de diversos koryentes eterodoksos djudyos de Babilonia i de la Persia; la masiva fermentasion relijioza i politika de la rejion, en segido de las konkestas arabas i la kolizion del Islam kon las relijiones lokalas; las revendiksiones de las klasas djudias proves, ke avian emigrado de los sentros urbanos a la periferia.
Fue reportado ke en el deredor del anyo 760, kuando el egzilarko djudyo de Babilonia se avia murido, uno de los ermanos Anan benDavid i Hananya, aparteniendo a su famiya serkana, devian de remplasarlo. Finalmente, Hananya fue elijido komo su suksesor por los rabinos de las akademias relijiozas i los notables de las komunitades. Aunke esta eleksion fue konfirmada por el kalif de Bagdad, Anan fue deklarado egzilarko por sus partizanes. Este akto, seando konsiderado komo una traision por la supremasia muslumana, Anan fue kondanado a la muerte. Portanto, su vida fue salvada por su kompaniero de prizion, Ebu Hanifa, el fundador de la importante eskola islamika de teolojia i de jurisprudensia, la Hanefiya. A la fin, fue permetido a Anan i a sus disiplos, de emigrar a la Tierra Santa. Estos erijeron una sinagoga en Yerushalayim, ke iva permaneser fina el arivo de los kruzados. Es de este sentro ke la sekta se espandio verso la Siria i se establisio en Ejipto, i yego al SudEste de la Evropa.
Anan se dediko a la elaborasion de los prinsipos bazikos de la sekta. Su ovra, Sefer haMitsvot – Livro de Mandamientos – fue publikado en los anyos 770. En esta ovra,fueron adoptados munchos prinsipios i opiniones delos otros koryentes anti-rabinikos ke avian anterioramente egzistido, ansi ke fueron Inkorporadas ideas de los saduseos i esenios ke sus vestijos ainda sobrebivian. Aparte de la absorpsion de elementos antiguos de la tradision antitalmudika, Anan adopto varias doktrinas egzistiendo en el Islam ansi ke la kreensia de la transmigrasion de la alma.
La sekta karaita absorbo a otras sektas djudias komo los isavites – segidores del mesianismo de Abu Isa – i komo los yudganites, ke avian sido influensadas por las tendensias islamikas del Este, ansi ke los fragmentos reziduales de la doktrina de los saduseos i betusianos pretalmudikos i otros koryentes anti talmudikos similares.
Los karayim remontan sus raizes al konflikto entre el pueblo djudyo duranta el reyno de Yeroboam, ke avia provokado despues de la muerte del Rey Shelomo, la divizion del reynado ebreo en doz estados, Israel i Yuda. Todo en defendiendo ke Sadok – el fondador delos saduseos – avia deskuvrido i konservado una partida de la verdadera ley, asigun la konviksion karaita, la entera deskuvierta de la verdad fue esansielmente el logro de Anan, i de otros syertos savios de la sekta ke lo segieron.
Portanto, no egzisten provas konkretas sovre kualkere kontakto direkto o indirekto del karaismo kon las sektas de la Mar Muerta, de mizmo ke el konosimiento en akeos tiempos, de estas sektas, o de sus influensa en kualker plano o grado. Todo lo ke se puede deduizir es ke la sekta de los karayim no avia dependido de las sektas de la Mar Muerta, i ke fue un koryente separado.
Anan no fue konsiderado entanto ke el lider uniko i absoluto de la sekta. No paso muncho tiempo ke otras sektas opozadas a Anan surjisaron en la shena del karaismo. Ansi, en la primera meatad del siglo IX, aparesio, entre otras, la sekta ukbarita fundada por Ismael de Ukbara, denunsiando a Anan komo «un bovo i un azno».
Las sektas ke aparesieron despues de Anan desparesieron rapidamente sin deshar dingun rastro perseptible. De otra parte, Anan preparo el terreno para la konsolidasion de la doktrina uniforma bien definida del karaismo, ke iva turar fina muestros dias.
El maz importante reprezante del movimiento en el siglo IX fue Binyamin benMoshe Nahavendi – de Nahavend, Persia – ke establisio las bazas del developamiento de la sekta. Nahavendi ke fue el primer eskrivano karay ke uzo el termino karayim, prekonizo el estudio individual, libre i independiente de las Eskriturias. Al kontrario de Anan, Nahavendi no fue de akordo de la adopsion de una aktititud ostila kontra los rabanitos, sino ke mizmo konsejo de adoptar el punto de vista rabinika, en kavzos ke la Biblia no revela una konviksion klara o determinada. Ansi, fue posivle por el karaismo de tolerar las diferentes interpretasiones de la Biblia.
La literatura karaita floresio prinsipalmente en los payizes basho la suverenia del governo de Ejipto, la Afrika del Norte musulmana, Eretz Israel, ansi ke en Babilonia i la Persia.
A la fin del siglo XI, en segido de la Primera Kruzada en 1099, la aktividad literaria i espirituala del karaismo en Ereretz Israel yego a una fin abrupta. Kuando la armada invaidora, basho Godefroi de Bouillon, se akaparo de Yerushalayim, los miembros de la komunitad karaita, kon akeos de la komunitad rabinika, fueron yevados a una sinagoga i kemados bivos. Kon esto fue markada la fin de la komunitad karaita de la sivdad.
Sidi Ibn al-Taras, fue aktivo en Espania durante el siglo XI. Influensado por los rabanites el governo kastelyano se volvio kontra los karayim i ekstirpo el movimiento de Espanya.
En el siglo XIV, Moshe benSamuel, nasido en Safed, se avia establisido en Damesek i fue nominado komo jerente de finansias del governor.En 1345, es amenasado de ser egzekutido por aver supuestamente blasfemado el Islam. Se konvierte al Islam i akompanya el emir en su peregrinasion a La Meka. Su eksperiansa durante esta vijita lo insita a fuirse al Ejipto, ande retorna al djudaismo. Una de sus ovras poetikas elabora su konversion forsada.
El siglo XII es markado por la stagnasion i el deklino del karaismo en el Este. Despues de la primera meatad de este siglo no salio a la luz kualkere kreasion remarkabla en este domenio, ansi ke en el domenio relijiozo, entre la sekta. De otra parte, los karaim gozaron en Ejipto de la buena voluntad de los governadores, ansi ke el karaismo logro a obtener una pozision firme en el Imperio bizantino, ande una kreatividad literaria iva maz tadre enfloreser.
La konkesta del Imperio bizantino por los otomanos en 1453 favorizo el kambio de los atadijos entre los djudyos rabinikos i karaitos. Los djudyos ekspulsados de Espanya desde 1492 i de Portugal, toparon un azilo kompliente en las tierras otomanas, ande developaron un aktividad intelektuala. Eskolas djudias, sinagogas fueron establisidas, i savios djudios, aparte de estudios talmudikod, se dedikariom a la siensias sekularas. En los siglos XV i XVI, tuvo lugar un aserkamiento entre kos karaites i los djudios rabanitos. Eruditos rabinikos giyaron karaites en el estudio de la literatura djudia i de las siyensyas profanas. Aun esta aktivitad, el karaismo bizantino-turko. asigun el egzemplo de sus disiplos de Babilonia, Persia i Ejipto , kayo gradualmente a un estado de letarjia espirituala.
de Yoshafat, Chufut Kale, Krimea. Litografia por
Carlo Bossoli, 1856
Durante los siglos XVII i XVIII, la aktividad karaita se konsentro en la Krimea i Lituania. Es reportado ke ainda en el siglo XII, egzistian entre los nomados turkos de la Krimea varios sektarios, ke obserbavan en la obskuridad, las tradisiones de diya de Shabat i, ke konsideravan komo proibido el korte del pan en este diya. En el siglo XII, durante la invazion tartara de la «Orda de Oro», un konsiderable numero de karaitos, viniendo prinsipalmente del Imperio bizantino, se aresentaron en la Krimea.
En la fin del siglo XIV, Alexander Vytautas [Witold], el Gran Duke de Lituania, despues de los aver vinsido en 1392, deporto a Trakai en la Lituania, un grande grupo de tartaros. Entre estos se topavan famiyas karaitas. Los Karaites, asigun una konvansion, fueron kargados de la proteksion del kastilio de Trakai, i se ekstendieron a otras sivdades de la Lituania, ia Volinia i Podolia, en formando la komunitad polako-lituano karaita. Estos konservaron la lingua tartara, ansi ke tresladaron sus orasiones a esta lingua.
El impakto de la kultura evropea insito el dezeo de aktividad espirituala entre los karaites del Evropa del Este , i sus kontakto kon sus korelijionarios ansi ke kon los djudyos rabanitos del Imperio bizantino, lo ke enjendro una kreatividad literaria entre los karayitos de Lituania.
Durante los masakros de Chmielnicki en 1648, la mayor parte de los karaitos sufrio la misma suerte ke los otros djudyos del payis. En esta perioda los atadijos entre estos grupos kontinuaron a ser bastante armoniozos.
Los atadijos estrechos de los karaitos de Lituania kon akeos de la Krimea, favorizaron en la segunda meatada del siglo XVII un proseso de arebiviento espiritual en los karaitos de la Krimea, ke avian sufrido de una karensia de lideres relijiozos i de enseniadores.
Kon la inkorporasion de la Lituania i de la Krimea a la Rusia, verso la fin del siglo XVIII, una mueva epoka fue avrida. Fin’a aakel tyempo, la istoria aparente de los karaitos kon akea de los djudyos rabanitos avia evoluadad de una manera similaria i paralela; todas los doz seando konsiderados i trarados a lo largo de los siglos, komo djudyos.
Es solo a la fin del siglo XVIII, kuando la Rusia avia konkestado la Krimea, ke fue establisido un estatuo legal diferensiando entre los karaites i los djudyos rabanites. En 1795, la imperatrisa Katerina II avia liberado los karaites de la doble taksa, impozada alos djudyos, akordandoles en mizmo tyempo el dirito de la apropriasion de terrenos – todo en inkluendolos en la kategoria de djudyos. Esta aktitud se iva trokar en 1835, kuando los karaites kon apelasiones i memorandos al governo, ivan emfatizar sus diferensia fundemantala de los otros djudyos: sus negasion konsernando la valididad del Talmud. Avian tambien afirmado ke posedian kualidades ke los distengen de los otros djudyos komo, ser industriosos, onestos i leales al trono. En este konteksto, los karaites parvinieron a ke los djudyos de Trakai sean ekspulsados de la sivdad, sovre la baza de los privilejios antiguos ke les avia akordado el dirito ekskluzivo de sus aresentimiento ayi. Ansi ke sean konosidos komo «karaitos rusos de la fey del Viejo Testamiento» o, simplamente «karaitos». En 1863, les fueron akordados diritos iguales kon el resto de la populasion nativa de la Rusia.
Abraham b. Samuel Firkovich (1786-1874) fue el mas eminente erudito karaito del siglo XIX. Firkovich ovro por la igualidad de los derechos de los karaites. Durante sus viajes en Krimea, el Kafkas, la Tierra de Israel, la Siria i el Ejipto, Firkovich deskuvrio munchas ovras de literatura karaita i rabanita, ke avian sido konsideradas komo pedridas. Aunke ke fue mas tadre kontroversialmente akuzado de aver falsifiado tendasiaozamente numerozos de su dokumumentos, Firkovich avrio un muevo kapitolo en la istoriografia karaita. Su koleksion de manuskriptos, se topa en mustros dias en la biblioteka estatala de San Pretesburg.
En enero 9, 1939, el Ministerio del Interior aleman estipulo en bazandose sovre sus orijen, ke los karaitos no apartienen a la komunidad relijioza djudia. Esta desizion fue despues, aplikada a la Fransia. Los nazistos ke avian okupado la Evropa del Este resivieron el orden de egzemptarlos de las persekusiones. En oktobre 1942, este orden se ekstendio a Krimea i al Sude de la Rusia, ande bivia la mayoria de los karaites. La apartenensia de los karaitese al puevlo tartaro, fue de mizmo konfirmada por los eruditos rabanitos ke fueron konsultados por los nazistos.
El komporto de los karaitos durante la perioda del Olokosto, vasiyo entre la indiferensia al kavzo dudyo i algunos kavzos de kolaborasion kon los nazistos. Todo kon esto, dingun estudio adekuato no fue performado sovre este sujeto. En los payizes arabos, la persekusion de los djudyos en segito de la kreasion del Estado de Israel, provoko la emigrasion de los karaites de Ejipto i de Irak a patria djudia, ande fueron aresentados en grupos kompaktos.
En muestros diyas, aparte de Israel, chikos grupos de karaim biven en Kairo, Estambol, Estados Unidos, Evropa del Este i la Rusia.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
Yo tuve la okazyon de vijitar Trakai ande enkontre dos ombres ke estavan trokando la karucha de una auto. Estavan avlando en turko. Me aserki i les avle en turko tambyen. Me disheron ke eran Karaim ke tenian una «kenesa» en la sivdad. Mi ijo y yo mos fuimos ayi para ver lo ke era. Ayi estava el shomer ke mos mostro el interyor i el chiko museo kon la vestimyenta y las armas de esta djente. El «hahan» no estava este dia ma el shomer mos disho ke aviya las orasyones tradisyonales.
Agora kale saver si esta djente son Karaim o Khuzarim porke los artikulos ekspozados en el museo paresiyan mas turkos/asiyatikos ke djudaikos. No kreo ke se puede eliminar la probilidad ke uvo una mezkla entre los dos puevlos ke vivyeron en los mismos teritoryos kuando kayo el Imperio de los Khuzarim ke observaban la Tora y no la tradisyon rabinika.
El karaismo es una sekta ke se formo en primero entre los djudios de Irak i de Iran, i de ayi se repandio al Mediano Oriente, el Kafkas i la Rusia del Sude i la Evropa Orientala. Es bazada sovre la adopsion de los Eskritos biblikos, i no aksepta ke la literatura relijioza ke se developo despues de la destruksion del Segundo Templo, fue de inspirasion divina.
Una partida de los turkos nomados se konvertieron al karaismo, todo en koservando sus lingua i sus trdisiones. Los karayim de Trakai son djustamente estos turkos de obediansa karaita, i ke en baza de sus orijen etniko optaron de diferensiarsen de los djudyos.
De otra parte, los khuzarim – i otros nomados turkos posibles – ke se konvertieron al djudaismo rabiniko, todo en kontinuando a konservar sus lingua, se mesklaron kon los djudyos del payis, i se konsideran entanto ke una parte del mundo djudio, asigun los krimchakes de la Krimea.
Estimado Sr. Gad Nassi,
Deseandole que se encuentre bien en compania de su familia y de sus seres queridos be’ezrat Hashem.
Quisiera preguntarle si acaso Ud. es descendiente de, o relaciondo con, la Gran Senora Dona Gracia Nasi (A»H).
Agradeciendole antemano por su respuesta,
Chana Rosalinda Mendez
Estimada Sra. Mendez,
No me es posible de determinar mis antepasados leshanos. El alkunya Nasi se refera a una persona ke fue el kapo de una komunidad. Es bastante repandido.
Reyna i Joseh Nasi, ansi ke Reyna i Samuel Nasi – ermano de Joseph – no tuvieron projenitura.
De otra parte eran relasionados kon la famiya Mendez.
Grasias por su intereso,
Gad Nassi