eSefarad Noticias del Mundo Sefaradi
Los djudios de Palestina durante la Primera Gerra Mundiala
UN DESTINO ABORTADO
——————————————–
Tres mezes despues ke el Imperio Austro-Ungaro avia deklarado la gerra al Reynado de Serbia, la Turkia se auno en Noviembre 1914, al akso de la Evropa sentrala, en deklarando la gerra a Fransia, Grande Bretanya i la Rusia. Djemal Pasha, fue nominado komandante de la Kuatrena Armada i el shefe del Levante: Siria, Levanon, Palestina, Jordania i el Hidjaz.
Antes de la kampanya militara turka en la konkesta del Kanal de Suez, Djemal Pasha yego en Febrero 1915 a su ofisina sentrala de Yerushalayim. Fue resivido kon una impresionante seremonia organizada por el Hahambashi, Rabi Moshe Franco.
Lideres del Yishuv eskuchieron el muevo arivado proklamando grosieramente ke el Sionismo era un movimiento revolusionario anti-turko ke deve ser eradikado. Trenta sionistos proeminantes, entre estos David Ben-Gurion i Yitzhak Ben-Zvi, fueron arestados.
El rejimen Otomano estava suspechando los miembros del Yishuv, i partkularmente los sionistos muevo arivados, de deslealitad a la Sublima Puerta. Sus sospechos se enfortesieron por la egzistensia de varias institusiones djudias autonomas, por la bandiera i el himno nasional djudyo, i por el trafiko de las naves de gerra estadounidenses ke estavan yegando a Yafo.
Ainda, el primo de Noviembre 1914, Djemal ya avia ordenado perkizisiones de dokumentos i armas ilegales; impedido la establision de muevos aresentamientos djudios; disolvado la guardia djudia Hashomer; detenido lideres komunitarios; prohibido el uzo de la lingua ebrea inkluido la korespondensia privada; deklarado ilegal el uzo de los seyos del Fondo Nasional Djudío, ansí ke la bandiera sionista; sukursales de la Anglo-Palestinian Company fueron serradas; disolvo la Korte Djudía de Arbitraje i sus arkivos fueron konfiskados, endjunto kon el komite de karidad, Kollam. Los soldados djudíos fueron entonses desarmados i transferidos a rejimientos de lavoro.
La devastasion del establisimiente dirijente svil empeso kon un anunsio del esbrocho de la gerra por el rejimen otomano i, la deklarasion de un moratorium de sus devdas, para pueder finansiar los gastes del estado de gerra. Todos los bienes de valor i fuentes de revenido fueron konfiskados.
Kon la stagnasion del trafiko maritimo, i el transfero de fondos de karitad por los miembros del Yishuv se korto. La kanselasion de proteksion ke fue konsedida a los sujetos ajenos en perikolo, perturbo el estatuo juridiko de unos 40.000 djudyos de nasyonalidad rusa, ansi ke miles britanikos i orijinarios de Fransia. Aproksivamente la meatad de los djudyos, biviendo en Palestina fue ansina kosiderada aparteniendo a payizes enemigos.
Ainda en Septiembre 1916, Djemal egzilo a Konstantnopla el shefe del movimiento sionisto en Eretz Yisrael, Arthur Ruppin, aunke Ruppin era sujeto alemano; en Desiembre deklaro ke «todos los medios deven ser utlizados para eradikar el Sionismo, i ke los sionistos eran personas dilijentes i praktikas, ma achakes de sus ideolojia, la Palestina era suseptible de trokarse en una segunda Armenia«.
El 17 de Desiembre, Beha-ed-Din, el governor de Yafo, emetio kon el apoyo de Djemal, un dekreto ordenando la deportasion de todos los sujetos ajenos, ke ainda no se avian otomanizado. El paniko, kon rumeros sovre un masakro jeneral, se propajo por todo Yafo. 750 djudyos orijinarios de la Rusia fueron deportados a Aleksandria.
Verso Enero, 1917, las fuersas britanikas estavan a punto de inisiar la invazion del Sude de la Palestina. El 28 de Marso, Djemal Pasha, konvoko los lideres de la komunidad djudia de Tel Aviv i les anunsio su desizion de evakuarlos de la sivdad. Les fue akordado una semana para organizarsen.
El 6 de April, Noche de Pesah, era la data en lakuala unos 10.000 rezidentes tenian de abandonar la sivdad. El primer grupo se hue a Petah Tikva o a Yerushalayim. Una semana despues, fue ordenado a los sivdadinos de dirijirsen mas al Norte. Transportado kon vagones, el segundo grupo arivo a Kfar Saba, Zihron Yaakov, Hayfa i Tiveria. Algunos terminaron en Damasko.
Aun la asistensia de organizasiones de karitad lokalas i estadounidenses, i de otras komundades djudias, munchos deportados toparon la muerte. Los mas proves de eyos, ke no tenian un lugar fikso para morar, fueron ovligados de yevar una egzistensia nomada, en seando viktimas del tifus, del ambre i del frio. Se pensa ke unos 1.500 djudyos muryeron en estas kondisiones. una parte de estos estan enterrados en tombas anonimas.
La mayoria de los djudyos de Palestina kedo sivdadinos otomanes leales. Ma el espanto sovre sus destino avia motivado a algunos a tomar parte en el Kuerpo de Mulas de Sion i a luchar kontra los turkos en Gallipoli. Un puniado de djudyos sionistos formo el redo de espionaje Nili, ke abastesio a la Gran Bretanya, informasion sovre el destakamiento de las fuersas otomanas.
En Oktobre 1917, los turkos desvelaron a Nili. Kapturada i torturada, Sarah Aaronsohn se suisido para no entregar informasion. En Desiembre 1917, los otomanos enforkaron en Damasko, a Yosef Lishansky, el lider de Nili, i a Naaman Belkind. La kaptura de los miembros de Nili amenaso de kavzar la devastasion de la komunidad djudia de la Palestina. El estado de sitio fue impozado a Atlit, Hadera i Zichron Yaakov. Miembros del redo fueron detenidos.
El governor del distrikto de Haifa i el akeo de Nazaret, fueron kargados de detansyones i interogasiones. Los detenidos en los prezos de estas sivdades fueron krualmente torturados. El governor de Yerushalayim, Izzet Bey, akuzo a los djudyos de traision i presiono por sus aniilasion. Kuarenta djudyos fueron deportados a pye a la Jordania, mientras ke personalidades komunatorias fueron enkarseladas en el Kishla, el prezo otomano en Yerushalayim.
En akeo tiempo, los britanikos estavan moviendo verso el Norte del Sinay i presionando la linya entre Gaza i Beer Sheva. Djemal Pasha avia deklarado aviertamente ke «la alegria de los djudyos achakes del avanso de la armada britanika iva ser de kurta vida, porke ivan kompartir la sorte de los armenianos«.
Kon el avanso de la armada britanika, la komanda del fronte palestino fue transferado en Noviembre, al jeneral alemano Erich von Falkenhayn, i von Kressenstein fue kargado de las fuersas en Yerushalayim.
Kon la dezintegrasion del Imperio, la suspision de los otomanos verso las minoridades non-muslumanas, avia pujado mas i mas. Diktadas por su revolta, i su apoyo a la armada rusa, gerreando kontra los otomanos, durante la primavera i el enverano de 1915, empeso el proseso de la evakuasion i deportasion de la povlasion armena. Despues ke desharon la sivdad, los ombres fueron apartados de sus familia i fueron asasinados. Las mujeres, las kreaturas i los aedados ke fueron arekojidos en konvoyes, fueron sometidos a kaminar syenes de kilometros verso el dezierto de la Siria. En sus kamino, los deportados fueron atakados kon embuskados. El ambre, el ser, el frio, la kalor i las epidemias pujaron el numero de las viktimas.
Sovre la situasion en Yerushalayim en akeos tiempos, Haim Weizmann eskrive: «Es tan triste en Yerushalayim! … Yerushalayim no es una sivdad ebrea! Uno apenas disierne la prezensia jovena ebrea, i los aedados son vazos debilitados … Los barrios djudios de Yerushalayim no son mas ke la suziedad i la infermedad kontajiosa. Es imposible deskrivir kon palavras la provedad, la inioransa i el fanatismo… el korason yora a la vista de todo! «
Zeev Jabotinsky eskrive en marzo de 1918: «Estan diziendo ke el estado de alma en la Tierra de Israel es positivo. Las kolonias i los pioneros tienen echo una impresion ekselente. Pero Yerushalayim se topa en mal estado … La meatad de las personas ke resiven los foyetos de karidad perisaron – antes de ke el Ingles yego … la meatad restante … se pelea entre sí, eskriven kozas kalumniosas, i sus damas onorables i mujeres jovenes se involukran en la fasilidad de los medios de vida. Todo esto es doloroso i deprimente«.
Unos 10 diyas despues de la evakuasion de Yafo, Djemal Pasha konvoko a los konsules i anunsio ke se topa obligado a evakuar a toda povlasion de Yerushalayim en 24 oras i transferarla a la Jordania i a la Siria.
El 16 de April, 1917, von Kressenstein alerto la embasada alemana en Estambol ke Djemal Pasha estava planeando a evakuar a Yerushalayim en el buto destruir sus povlasion djudia i kristiana ansi ke sus institusiones. «La evakuasion de Yerusalayim podería aver sido un error taktiko trajiko«, von Kressenstein eskrive en sus memorias. «La derokasion de una povlasion tan grande puederia ser suseptible de kavzar konsekuensias inestimables. Las desgrasias katastrofikas ke afitaron a los armenianos ekspulsados, eran suseptibles de ser repetidas. Miles averian sido murido de ambre i infirmidades«.
Yaakov Thon, ke avia remplasado a Ruppin, eskrivio a la Komitad de Aksion Sionista: «Si no fuera por la intervension del govierno alman, ke mos protejo en muestra ora preta , avriamos sufrido un golpe morta l… Por muestro grande mazal, durante estos resientes dias kritikos, la komanda suprema fue remetida en la mano del jeneral von Falkenhayn. Si avia sido responsable, Djemal averia aktuado asigun su amenaso i averia ekspulsado a toda la povlasion … i konvertido el payiz en un monton de ruinas«.
La similaritades kon el empesijo de las atrosidades verso los armenianos son evidentes i impresionantes: Empesaron kon la revolta armada de los armenianos por una Armenia independente i sus apoyo al enemigo ruso. Konsiderando el fakto ke la Palestina era en la primera linya de gerra a las finales de 1917, una epizoda semejante poderia ser afitado a los kolones djudios.
Mas djudyos murieron durante la Grande Gerra, ke en todas las gerras del Estado de Israel endjuntas. En kuatro anyos de la Primera Gerra Mundiala, esta komunidad se reduizo de 85.000 a aproksivamente 45.000 a 50.000. Las dimesiones de esta piedridad nunka fueron adekuatamente evaluadas.
Bibliografía
- https://en.wikipedia.org/wiki/Tel_Aviv_and_Jaffa_deportation
- http://www.haaretz.com/jewish/books/.premium-1.608235
- http://www.zionistarchives.org.il/en/AttheCZA/Pages/WorldWarI.aspx
- http://www.paulinepark.com/2014/04/israel-the-ottoman-expulsion-of-jews-from-palestine-in-1917/
- http://www.genocidepreventionnow.org/home/tabid/39/ctl/displayarticle/mid/683/aid/295/default.aspx
——————-
Gad Nassi
——————-
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
