eSefarad Noticias del Mundo Sefaradi
LILIT:
la Leyenda i la Superstision
Munchas de muestras kreyensyas majikas subsistieron durante jenerasyones enteras, fueron transmetidas de una kultura a una otra i kontinuan a influansar muestro pensamiento i muestro komportamiento. Enserrados en la literatura mistiko-relijioza i artefaktos de la memoria kollektiva, los manaderos de las superstisyones, lo mas no son konosidos. Este artikolo trata de la superstision sovre el perikolo de muerte ke menasa al rezin nasido. Kontrariamente ala majoritad de las superstisionas, los raises de esta superstision son konosidos.
Avram Galante reporta ke era de uzo en Rodus de enkolgar enriva de la kama de una mujer ke estava para parir, papeles sovre loskualos eran eskrito: «Adam ve Havva penima, Lilit vekita ahutza». Estos biervos en Ebreo, se tresladan ansi: «Adam i Havva ariento, Lilit i su sekta ahuera».(1) Ken es Lilit? Kualas son las razones de kerer alesharla de la kama, ande una kreyatura nasera?
La Leyenda
Asigun el Midrash, Lilit fue kreada antes de Havva. Esto akontesio en la primera Kreasion. Lilit, de mismo ke Adam, fue kreyida de la tierra, i se konsiderava iguala a Adam. Kuando Adam kijo impozar su superioridad a Lilit, Lilit se avia revoltado, i avia desparesido en bolando.
El Zohar eskrive ke Havva fue kreada para remplasar a Lilit ke avia abandonado a Adam Esta ovra nota ke Adam, ensaniado por el komportamiento insolente de Lilit, demando del Dio su retorno. Entonses, Dio mando a tres andjelos – Senoy, Sansenoy i Samangelof – ke la toparon enriva de la Mar Korolada. Aunke la menasa de los andjelos ke si no aboltara a Adam, syen de sus ijos seran matados kadal diya, Lilit avia refuzado preteniendo ke eya fue kreada ekspresamente para danyar a los rezin nasidos. Portanto, avia djurado de no danyar al digun rezin nasido, ke tenera un amuleto kon las figuras i/o los nombres de estos andjelos.
Es kon la literatura de la Kabala ke Lilit izo parte del mundo de los guerkos. Tiene la forma de una mujer muy ermoza kon una flama siempre biva en su puerpo. Su tarea es de de seduizir a los ombres, de danyar a la mujer prenyada i de aogar a los rezin nasidos.
En el Livro de Yeshayahu es notado ke kuando el sanyo del Dio trokara la tierra en kampos salvajes, «… Lilit topara ayi un lugar para su repozo.» En siertas versiones de la Biblia, el nombre Lilit es remplasado por «buho ke grita», «krios, monstros o brushas nokturnas».
La istoria de Lilit deriva de una leyenda sumero-babilea ke data de 3500 AE. Esta leyenda deskrive a Lilit entanto ke una guerka nokturna kon alas, ke mata a las kreyaturas i ke danya a las mujeres durante la paridura. De mismo, eya beve la sangre de la persona i kome su karne, kavza la aborsion en la mujer i provoka la insomnia i el koshmar.
La Superstision
Uzos por la proteksion kontra los efetos nosivos de los guerkos eran muy repandidos en el Mediano Oriente. Esto empeso kon los sumerianos i los babileos, ke los klasifiaron i establisieron sus praktikos. Asigun esta tradision, los guerkos son konsiderados entanto ke dios negros, ke de vez en vez se revoltan kontra los dios buenos. Entre eyos, egziste Lilitu, una guerka ke aoga a las kreyaturas, ainda kuando estan en ka matris de sus madre en kavzando la aborsion, o despues ke nasieron. Eya fue konsiderada entanto ke una guerka kon alas i aktiva durante la noche.
El Livro de Zohar mensiona ke aparte de su rolo de aogar las kreyaturas, Lilit en mismo tiempo ajisa entanto ke seduktora del ombre. De su union kon el ombre, en siertas sirkonstensias, nasen miles de guerkos ke inchen el universo. Estas sirkonstensias serian, asigun diferentes manaderos, las emisiones nokturnas del ombre, la masturbasion, akuplamientos kondanados por la Ley komo akeyos durante la perioda defendida de la mujer, en la luz de una kandela i dezmudos. De mismo, Lilit se akapara de la manseva ke en su shuenyo frekuanta los ombres. Lilit reyna sovre el mundo impuro, i es yamada basho diferentes nombres deprekatores komo la putana, la malisioza, la falsa o la preta. Puede pareser en la forma de un gato, ganso o otros animales. Eya fue referada a la estrea Saturno, i los ke son de umor negro – kon una dispozision a la melankolia – fueron konsiderados entanto ke sus kreyaturas.
Ainda, en el tiempo del Talmud i mas tadre, munchas superstisiones sovre los danyos ke pueden afitar durante la noche, empesaron a desveloparsen. De este modo se repandio el uzo de emplear amuletos, para protejar las mujeres prenyadas i los rezin nasidos del poder nosivo de Lilit. Los primeros de estos eran eskritos en arameo, i mas despues aparesyeron amuletos en ebreo. Los amuletos kontenian munchas vezes, aparte de los nombres de los andjelos ke pudieron dominar a Lilit, i en mismo tiempo sus formas, kon sus alas, sus manos i sus pachas. Mas despues fueron adjustados salmos de la Biblia. De mismo, munchos amuletos reprezentando Lilit atada kon kadena fueron kreyados en el Oriente. Otros inkluiron la estoria del profeto Eliyau ke aparese delantre de Lilit en kamino verso la kaza de una mujer ke esta para parir. Eliyau Anavi interviene para ke Lilit no aga durmir la mujer por la muerte, para ke no se empatrone de su kreyatura para bever su sangre i chupar la muela de sus guesos. De mismo, era de uzo de enkolgar una navaja o una hamsa – amuleto en la forma de una mano – enriva de la kuna de un rezin nasido, o de pozar a su lado una kandelabra de syete brasos fina el britmila.
La superstision sovre Lilit era repandida en todas las komunidades djudias, kualkere ke sea sus apartanensia: sefardi, ashkenazi o mizrahi. En el Maroko, uno de los kustumbres populares fina la epoka moderna, fue la seremonia de veyar al rezin nasido kada noche fina el diya de su britmila. Esta seremonia se yamava tahdid. Para protejarlo de los guerkos, parientes i amigos de la familia se arokejavan en la kaza de la parida i resitavan la Shema i otras orasiones. Kuando dava la media noche, todas las puertas i las ventanas se serravan, se pasava una espada vieja o un kuchio grande sovre las paredes i las avierturas serradas ermetikamente de la kamareta en interdizando de prononsar el nombre de Lilit. Despues se metia un pedaso de metal – hadid signifika fierro en arabo – debasho del kavesal del rezin nasido ke su madre enserra en sus brasos. Era de uzo i de azer partisipar a esta seremonia, elevos de eskola kon sus mestros i aregalarlos despues kon mansanas, muezes i dulsurias. En Kurdistan no deshavan ala parida de salir la noche de su kaza durante 40 diyas despues de la paridura. En las komunidades sefardis del Oriente, se uzava enkolgar enriva de la kuna del rezin nasido, ajo, ahranda de kolor blu i otros objetos i plantas. Los djudios de la Masedonia uzavan durante las tres primeras noches ke suivavan el nasimiento de meter pan, sal i moneda chika sovre una meza kon una lampa, allado de la kuna. Ala tresera noche se metia sovre una meza chika allado de la kavesa de la kreyatura, un espejo i un gato aparejado por una ijika ke sus jenitores biven. Debasho de la kavesal de la kreyatura, se metia objetos de plato i djoyas para kontentar alos espiritos supozados ke la vijitaran.(2)
Komentarios
Lilit puede ser konsiderada entanto ke el artefakto de un fenimizmo ke avia egzistido en tiempos antiguos. En las sivilizasiones antiguas del Mediano Oriente, la mujer tenia un lugar dominante en la ierarkia sosiala. Las pretras eran kargadas de la direksion de los templos, ande pratikavan ritos sakros de orden seksual.
Kreada de la tierra, asigun Adam, Lilit simboliza la aspirasion de la mujer a ser iguala al ombre. Su revolta kontra Adam reprezenta la reaksion de la mujer kontra la ierarkia sosiala ke se desvelopara mas tadre, ande el ombre domina a la mujer, la seksualitad feminina independente no es tolerada i es konsiderada komo destruktiva i kontraria al orden divino. De otra parte, Lilit es tentada por el plazer erotiko ke avia konosido durante su union kon Adam. Pormo de esto, perkura de seduizir el ombre, se sela de la mujer, i se venga de eyos en matando las frutas de sus amor.
Asosiada a la seksualitad, el misterio, la vengansa i la muerte, Lilit puede ser konsiderada entanto ke un arketipo del konsepto de femme fatale de muestros diyas.
De otra parte, el Livro de Zohar akorda a Lilit un rolo importante en la Fin de los Dias. Es su poder ke akomplira la destruksion de Roma, konsiderada en tanto ke el simbolo de la enemistad del mundo kristiano kontra el puevlo de Israel i la kavza de su egzilo.
——————————————————————————————————-
(1) Galante, Avram, Histoire des Juives de Turquie, VI, Isis, (Istanbul: 1985), 6.
(2) Rappaport, Dr. Angelo S, The Folklore of the Jews, The Soncino Press, London, 937, 95.
Por mas detalios se puede referar a:
Koltuv, Barbara Black, The Book of Lilit, Nicolas-Hays, Inc., York Beach, Maine, 1986.
Patai, Raphael, The Hebrew Goddess, WayneStateUniversity Press, Detroit, 1990.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
