eSefarad Noticias del Mundo Sefaradi
La leyenda de Yosef
Asigun un Manuskripto Morisko
La Biblia rakonta ke despues ke fue vendido por sus ermanos en tanto ke esklavo, Yosef arivo a Ayifto i fue merkado por Potifar, ministro de paro. Yosef ke en kurto tiempo gano la konfiensa i el estimo de Potifar, fue nominado administrator de su byen. La espoza de Potifar, no aviendo reushido a seduizir a Jozef, se avia vengado del en kalomniandolo de aver tentado de abuzarla.
Entonses, Yosef fue echado al prezo. Entre los prizonieros se topavan el kopero i el panero de paro. Una noche kada uno de estos se sonio un suenyo estranyo. Asigun ke Yosef avia interpreto a estos suenyos, el kopero fue grasiado i retorno a su posto, i el panero fue egzekutido.
Dos anios avian pasado. El kopero konstatando la inkapachidad de los majisianos i de los savios del palasio de aklarar los dos suenyos estranyos del Paro, se akodro de Yosef i lo rekomando a paro. En esto, Yosef fue traido al palasio i le fue demandado de interpretar a estos suenyos. Yosef ekspliko ke las syete vakas godras kon syete vakas flakas, i las syete espidas yenas kon syete espidas vaziyas son el mesajero de syete anyos de abondensia ke seran segidas por syete anyos de ambre.
Paro, impresionado por la savidura de Yosef, lo nomino en tanto ke el supervizor de los rezervos de trigo i de komanyo del payis. De este modo Yosef arivo a okupar un posto de administrador de primer rango.
Asigun ke es konosido, Yosef se rekonsilio kon sus ermanos ke arivaron a Ayifto para merkar trigo en la perioda del ambre, ke avia tokado i la tierra de Kanaan, i en segito, la famiya de Yosef se establiso en Ayifto.
Asigun la Biblia, Yosef se kazo kon Osnat, la ija del chefe pretro de Ayifto i tuvo dos ijos: Menashe i Efraim.
Yosef en el Koran
El Koran konsakra un kapitolo entero a Yosef. Este kapitolo, ke trata de los visios umanos komo el selo, la trahizon i la krueldad, de mismo ke de las vertudas komo el dover, la fidelidad i la pietad, es konsiderado en tanto ke la estoria la mas detayada i la mas fasinante del Koran.
El kapitolo empesa manos o menos komo la version biblika. Yakov akavida a Yosef de no rakontar sus suenyos a sus ermanos para no provokar sus selo. Despues es reportado de ke manera Yosef fue echado al pozo por sus ermanos i vendido a los merkaderes ke lo venden en tanto ke esklavo en Ayifto.
Su senior es yamado ElAziz – i no Potifar; i la mujer de ElAziz se yama Zuleyha – al kontrario de la Biblia ke no sita su nombre. Despues el relato del atempto de Zuleyha de seduizir a Yosef, el Koran eskrive ke Yosef es salvado de sus manos, grasias al Dio ke lo proteja. Su kamiza arazgada en la parte de la espalda, es la prove definitiva ke Yosef se avia fuyido de eya, i ke Zuleyha lo avia pursuivido en atakandolo.
Zuleyha, tratada kon ironia de la parte de las mujeres del palasio, las invita a un pranso. Durante este pranso, Zuleyha en adresando a las invitadas toma la palavra:
«Oyi ke el bruido ke me enamori del mansevo ebreo korye en el palasio.» En esto, un silensio kaye, i todas miran a Zuleyha. «Aksepto ke el es un mansevo sharmante. No esto niegando mi amor por el,» adjusta Zuleyha, despues de aver demandado de servir las frutas. En stgito ordena a Yosef de pareser. Las mujeres tanto se enkantan de konstatar la ermozura de Yosef, ke sin rendersen kuento, kortan sus manos kon los kuchios ke estavan uzando para komer la fruta. Dizen en sus egzaltasion: «Ke manera de perfekto es el Dio. Este no es un umano! No es otro ke un andjelo!» En esto, Zuleyha se alevante i s’eksklama:
«Es por este mansevo ke fue kulpada. No esto niegando ke lo tenti, i el me refuzo. I vozotros vos mareyatesh en viendolo. Mira lo ke afito a vuestras manos. Si, i agora me refuza, el sera echado al prizion.»
Yosef dize:
«Bendicho ke sea Dio. Prizion es preferable de kometer lo ke me demandan. Demando de no favorizar sus komploto para ke no sea inklinado para eyas i no ser entre los kulpantes en kometiendo el pekado de akeos ke meresen de ser blamados o de ser entre akeos ke azen kozas de los inyorantes.»
En esto, el Dio responde a esta invokasion i no permete ke sus komploto se realiza. Djusto es el Dio ke Oye Todo, i ke Konose Todo.
La misma noche, Zuleyha konvense a su marido ke la sola solusion para salvar su onor es de embiar a Yosef a la prizion; sino eya no puedera kontrolarse i protejar su prestijio. Aunke el ministro save ke Yosef es absolutamente inosente, pensa ke en aleshando a Yosef de su mujer puedera de mismo protejarlo de eya, i no topa otro remedio ke de meterlo en la prizion.
Despues de aver rakontado los evenementos konosidos durante ke Yosef estava en el prizion el Koran no akodra mas el nombre de Zuleyha i no rakonta kuala fue su suerte. Portanto, se refera a eya para provar otruna ves la inosensia de Yosef:
El rey ordena de trayer a Yosef de la prizion. Kuando el mesajero viene ande el, Yosef dize: «Aboltate ande tu senior i demanda lo ke afito kuando las mujeres se kortaron sus manos? Siguro ke mi Dio konose sus komploto.» El rey, despues de aver konvokado a las mujeres les demanda: «Kualo fue vuestra intision kuando vos akavidatesh de seduizir a Yosef.» Las mujeres responden: «Ke el Dio pardone! No kijimos nada de negro por el.» La mujer del ministro dize: «Agora la verdad esta klara para todos, es yo ke perkuri de seduizirlo, i el es siguramente djusto (inosente).»
Yosef i Zuleyha en el Manuskripto Morisko
Aunke la suerte de Zuleyha, despues de la inkarserasion de Yosef, no es akodrada en la Biblia i en el Koran, su estoria kontinua a ser elaborada en otros tekstos arabos i persanos, de mismo ke se kreen poemas sovre el amor entre Yosef i Zuleyha en tanto ke un sujeto separado de la leyenda orijinala. Estas poemas son empreniadas de lirizmo i se remarkan por sus valor literaria. Integradas al folklor islamiko, son konsideradas en tanto ke el paradigmo de la pasion afrontada a la separasion i a las sufriensas.
En la Biblioteka Nasyonala de Madrid, una version de estas poemas egziste en un manuskripto morisko aljamiado (en espaniol eskrito en grafia araba), ke yeva el titolo Leyenda de José hijo de Jacob. La transkripsion a la grafia latina de este manuskripto kon un otro sovre Aleksander Magno por F. Guillen Robles, fue publikada en Saragosa en el anyo 1888(1).
Esta leyenda relata la estoria de Yosef kon sus detalios i insidentes partikulares asigun los tekstos arabos. Potifar yeva el nombre de Elaziz i es prezentado en tanto ke el rey de Ayifto. Su mujer se yama Zuleyha. ElAziz demanda de Zuleyha de adoptar a Yosef en tanto ke sus ijo i su suksesor al trono. Porke el es aedado i impotente. Despues ke Yosef es nominado en tanto ke el primer ministro del payis, ElAziz muere i es olvidado, tandis ke Yosef asuma el poder de rey.
La evolusion de los atadijos entre Yosef i Zuheyla i su denuamiento, atiran muestra atansion. En este konteksto, las konversasiones entre los dos refletan la lucha entre la pasion i el dover, i la rogativa por la piadad divina:
– O Yosef! No tienes oyido al rey, kuando me disho de onorarte kon el omenaje ke se deve a un rey? Te onorare kon la onor la mas onorada de lo ke es uzada en kavzos semejantes. Te servire yo mismo kon mis manos.
– O Zuleyha! No me ames kon el amor ke me trayera mala ventura.
– I porke es esto?
– Porke mi padre me amo, i mis ermanos me vendieron; i yo tengo miedo de ke me ames kon un amor, ke sera para mi la perdision…
…
– O Zuleyha! Guadrate del Dio, ke no es permetido de kedarte sola kon mi en la kaza del rey.
– O Yosef! Keria aver merkarte para ke me seyas obediente.
– El rey no save porke me yamas, guadrate del Dio i alavalo, i salvame de aki…
…
– Alavado sea el Dio, el Grande, el Savio… salvame de aki porke tengo miedo de ser undido en la mar de los ke se yerran.
– O Yosef! Sige mi orden… Satisfeza mi nesesidad, i apiadate de mis larmas… Porke no te aserkas de mi? Porke no satisfezas mi dezeo?
– O Zuleyha!… Kitame de esta kaza para ke tu dezeo se vayga, porke si no me veras, i tu dezeo por mi se ira…
Durante la perioda del ambre, Yosef arodeandose sovre su kavayo kon su eskorto real, enkontra a una vieja sedakera vistida kon ropas arazgadas, kuaji siega, eskayida i muriendose de ambre, ke implora su piadad. La sedakera no es mas ke Zuleyha, abandonada por Dio i los sivdadinos. Yosef la resive kon karinio, la pardona, i por el entremedio del poder del Dio, le vuelve su juventud, su ermozura, i su vista. Se komporta verso Zuleyha kon amor i kompasion i se kaza kon eya.
———————————————————————————–
(1) Guillen Robles, Fransisco, Leyendas de José hijo de Jacob y de Alejandro Magno / Sacadas de dos manuscritos moriscos de la Biblioteca Nacional de Madrid, Imp. del Hospicio Provincial, Zaragoza, 1888.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
