eSefarad Noticias del Mundo Sefaradi
La Fiesta de la Primavera Sabetaista i su Atadijo kon la Kreyensya de Tekufot(*)
Nasido i edukado en Estambol, konosi de edad chika una djente misterioza ke paresia ser Turka, kon afinidades de karakter djudiyo. Los aedados de entre eyos avlavan en espaniol en kaza, syertos de eyos konversavan en esta lingua kon mis paryentes, i otros uzavan den ves en ves a adresarsen kon unos kuantos byervos en esta lingua. Se rakontava ke kuando las fiestas djudiyas se aserkavan estos «otros Turkos» se rendian tensos i ke las selebravan en sekreto asigun sus propios uzos.
Aparte de estas manifestasione sporadikas, nunka avlavan de sus atadijos kon el Djudaismo i una diskresion mutuala aviya echo el sujeto un tabu okulto.
Es muy probable ke esta eksperiensa aviya determinado mas tadre la dimansion personala de mi entereso sovre la elusidasion de este fenomeno.
En bazandome sovre una reminesensia de mi chikes, va aprovar de analizar unos kuantos aspektos del folklor de la Turkia, en atadijo kon esta memoria.
«Esto aviya afitado en la segunda meatad de los anyos 1940, kuando era kreatura… En una noche ke se aviya fiksado de antes, se aviya desidado ke mozotros – las kreaturas – ivamos a organizar una festividad en el mahsan del apartamento ande moravamos. Se, ke era la primavera, porke la kavra de muestro vizino aviya parido, i fue desidado ke su leche se iva ofrir en esta festividad. De mizmo ke el tiempo en Estambol era bastante kaynte para pueder organizar esta reunion en el mahsan aleskuro i umido.
Despues de mos avermos embelekado kon el tradisional djugo de solombra ‘Hadjivat i Karageuz’ i bevido la leche de kavra, ya aviya vinido el tyempo de aboltarmos a muestras kazas. En este momento presizo el mas aedadao de mozotros ke era i el organizador de la reunion, se adreso a las kreaturas de las famiyas sabetetayistas:
‘No vos es permetido de entrar a kaza fin’a ke vos paryentes terminan sus reunion, no es ansina?’ Las kreaturas aprobaron a esta kestion sin kitar un solo byervo, ma solo en abokando sus kavesa en sinyo de si.
Aunke su karakter ambiguo i de surprizo, tuve la intuision ke una syerta verdad egzistia detras de esta kestion, i kalia ke sea respektada….«
* * *
La apostazia de Sabetay Sevi aviya provokado una konsternasion muy onda entre los ke lo aviyan konsiderado en tanto ke el Mashiah ekspektado. Al lugar de akseptar ke sus salvador era un impostor, munchos d’entre eyos bushkaron una eksplikasion a lo ke aviya afitado. Estos pretendieron ke el buto de la apostazia era en realitad un paso verso la mision de arekojer las sintiyas divinas ke eran dispersadas entre los goyim, una tarea ke solo el Mashiah puediya performar para traer la Redampsyon.
De este modo la fondasion de una mueva sekta, kon su propya ideolojiya, sus propriyos komandamientos, su propria liturjiya i su propriya lejislasion fue echada, en kreyando esta ves su propriyo patrimonyo ke iva turar mas de tres siglos.
En fakto, la komunidad sabetaista ke enfloresio en Saloniki es la unika sekta eretika en la istorya del kripto-Djudaismo kon sus preseptos i kon sus institusiones establisidos de una manera tan definitiva. Los Ma’minim – kreyentes en ebreo – asigun ke se yamaron entre eyos, fueron konversos voluntarios, un fenomeno de masa sin presedente en la istorya djudiya. Fueron konsiderados en tanto ke muslumanos en publiko, ma, aderaron a una teozofiya eretika bazada sovre el Mesianismo de Sabetay Sevi. Los «Diez Komandamientos» fueron remplasados por 18 preseptos, las Inkomendensas, asigun ke los yamaron en djudyo.
La definision del adulterio en las Inkomendensas, sugjerando prudensya, mas ke una prohibision no es klara. En este konteksto, una estrenya fiesta, yamada la Fiesta de la Primavera fue inkorporada en la liturjia Sabetaista. Konosida entre el puevlo en tanto ke la Fiesta del Kodrero, esta fiesta es uno de los mas misteriozos i eksantrikos diyas sakros de la erensya Sabetaista.
La fiesta empesa en la media noche entre el 21 i 22 del mes Adar, konsiderada en tanto ke el momento del akontisimiento del ekinokso de la primavera. Asigun la tradision sabetaista, el ekinokso de la primavera reprezenta el empesijo del muevo anyo i la kreasion del universo.
Solo kuples kazados eran permitidos de partisipar a esta seremoniya ande se komiya por la primera ves en el anyo la karne de kodrero. Kaliya ke a lo manko dos kuples kazados partisipan a la fiesta. Las mujeres se vistiyan sus mejores vistidos i sus djoyas i en un syerto momento las luzes se amatavan i los kuples azian el amor en trokando de parteneros.
Mi artikolo diskuta el atadijo eventual de este festival kon la kreyensya de Tekufot en el Djudaismo.
* * *
A traverso la istorya, munchas kreyensyas paganas konsideraron el tyempo en tanto ke un proseso sikliko. En este konteksto, la kondision i la suerte de la umanidad fueron atadas a periodas spesifikas del kalendaryo. Syertos diyas o periodas de sinifikansa sakra fueron selebrados kon rituales partikularas de sakrifisios i pransos, ke en okaziones abordaron o yevaron a un komportamiento de libertinaje.
De mismo, kreyensyas superstisiozas en atadijo kon las periodas de los ekinoksos i de los solstisos paresieron en el folklor djudiyo. Mismo ke el mito orijinario aviya desparisido de la memoria kolektiva, sus vestijos fueron konservados en la kreyensya ke aguas eran kontaminadas por una sangre danyoza, i ke bever agua, en estas periodas konosidas en tanto ke Tekufot fue prohibido.
Tekufa – Tekufot en plural – ke es un byervo ebreo, signifika literalmente «perioda» o «sezon», en mizmo tyempo, «ekinokso» o «solstisio». (ver figura)
Una vieja leyenda ke su publikasion aparesio en el siglo XII en un livro liturjiko, Mahzor Vitry, konekta a esta kreyensya kon los evenimientos biblikos segidos:
El Dio troko las aguas de Ayifto en sangre en el ekinokso de la primavera, i de akel diya endelantre, sangre es depozada en las aguas; la mizma koza akontesio en el solstisio del enverano, kuando Moshe aharvo al roko i sangre eskuryo de ayi; en el ekinikso del otomno, kuando Avraam se aparejo a sakrifiar a Izak, sangre aparesyo en su kuchiyo; i en el solstisio del invierno, kuando Yiftah sakrifio su ija, para tener su promeso al Dio, la sangre de su ija se mesklo a las aguas.
Las otoridades relijiozas aklaradas konsideraron las kreyensyas sovre Tekufot en tanto ke los vestijos del paganismo, las denonsiaron i aprovaron de okultarlas. Portanto, estos esforsos no reusheron, i en fakto, la kreyensya sovre el efekto nosivo de bever agua arekojida en media noche durante las Tekufot kontinuo a persistir en el folklor djudyo fin’a los diyas resientes.
Un otro fakto en atadijo kon la Fiesta del Kodrero es su selebrasion en la mizma sezon de la fiesta de Nevruz. Nevruz kon sus variasiones, es una fiesta pagana milenaria, muncha populara en las eterodoksias mistikas, i buen establisida entre los puevlos biviendo en los teritorios rurales del viejo Imperio otomano.
Nevruzsinyifika «Muevo Anyo» en Persano, i es una fiesta ke tiene munchos aspektos analogos kon la Fiesta del Kodrero.
El empesijo del Anyo Muevo en Nevruz es de mismo atado a munchos evenimientos biblikos de liberasion:
La kreasion del mundo por Dio, kuando la durasion de la noche es iguala al diya; la formasion del lodo del primer ombre, Adam; el retorno de Adam i Hava al Paradiso por Dio, despues de los aver pardonado; Noah, despues de aver abashado de su barko, pizo a la tierra; Yosef fue salvado del pozo; Moshe avia divizado la Mar Kolorada para salvar su puevlo; Yona fue liberado a la tierra por la balena; las estreas ke estavan en el Sinyo de Leon kuando el Dio kreyo el Universo fueron ordonados por El de aboltar a sus Sinyos del Zodiako.
De otra parte, un uzo reportado por Galante, i ke aviya egzistido entre los Djudyos de Izmir, la sivdad ande nasyo Sabetay Sevi, atira muestra atansion. Este uzo en atadijo kon el ekinokso de la primavera, delkual se akodran i los Djudyos ke biviyan en la vizindad de Izmir, es konosido en tanto ke la Dulse.
Asigun Galante, el puevlo se kreyiya ke los andjelos ke guadravan las aguas terrestras – o del Paradiso – eran removados durante el ekinokso de la Primavera, i ke en este momento, el guerko profitava de sus absensya para entosigarlas. Pormo de esto, se deviya de abstenerse de bever agua en este momento presizo.
Empesando de la meatad del siglo XVI, la fiesta de Nevruz empeso i kontinua a ser selebrada en grande pompa en Manisa, sivdad vizina de Izmir, ande bivia una komunitad djudiya notable. Durante su selebrasion se distribua una goma dulse konosida en tante ke Mesir Madjunu (Goma de Festividad).
El uzo del termino la Dulse, indikando el momento danyozo en Tekufoth durante el ekinokso de la primavera, egzistio unikamente entre los Djudyos de Izmir i de su vizindad – i la sola aparente razon de este uzo es la distribusion de esta goma. Esta superstision deriva, a muestro avizo, de la interaksion de las kreyensyas folklorikas del puevlo otomano i akeas de los djudyos, i aze parte de los raizes de la Fiesta de Primavera.
De mismo se save ke en los anales empranos del Sabetaismo, el movemento adapto la liturjia de los dervishes en la lingua otomana, transliterada en karakteres ebreos.
Para konkluir, puedemos sulinyar brievamente ke la sekta sabetayista partajo munchos karakteristikos espirituales i komportementales de diferentes grupos mistikos Otomanos. I es muy posible ke los Sabetayistos toparon en el aktitud tolerante i reseptivo del publiko otomano verso las eterodoksias mistikas, una fondasion lejitima por sus kreyensyas.
Es muy proabable ke en el konteksto de este atadijo, la similituda entre las kreyensyas de Tekufotkon las kreyensyas atadas al Nevruz tiene desidado – entre otros istorikos, sosiolojikos, folkloristos, relijiozos i mistikos faktores – el eskojo, el momento i el modo de la selebrasion de la Fiesta Sabetaista de la Primavera, en determinando su proprio i mizmo uniko karakter eretiko.
Kalendaryo djudyo reprezentando los Ekinoksos i los Solstisios, konosidos en tanto ke «Tekufot«. Del livro Seder Berakhot – Orden de las Bendiciones y las Ocaziones en que se Devan Dizir. Printado en Ebreo kon Portugez para ensenyar el Djudaismo a los Konversos. Editado por Isaac de Mattatias Aboab. Treslado por Binyamin Senior. Printado en la kaza de printa, Albert Magnus, Amsterdam 1686.
(*) Teksto akurtado de la konferensia prezentada en Fifteenth Annual Conference of the Society for Crypto-Judaic Studies, Miami Beach, Florida, August 7-9, 2005, en I Encuentro Historico – Cultural Hispanico – Turco – Sefardi, Ankara, 28-30 Noviembre, 2005, i en el Instituto Cervantes Tel Aviv, 20 Desiembre, 2005.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
