eSefarad Noticias del Mundo Sefaradi
La Boda De Los Guerkos
Una noche, no muncho despues de Pesah, bruidos estranios empesaron a oyirsen en la kaza de Hasday Yohay, no leshos de la grande Sinagoga de Galipoli. Estos bruidos empesaron a azersen mas i mas fuerte. El balabay i su mujer estavan enkantados i les estava paresiondo ke vinian de la kaye. El balabay empeso a gritar: «Ken ay aya?» Komo no avia dingun repuesta, grito otruna ves. En esto los bruidos se kedaron. Despues empesaron de muevo. Ma esta ves paresia ke vinian de ariva. En primero, les paresio ke avia ladrones. Pishin lo espertaron al moso, ke sin muncho kerer asendio una kandela i empeso a suvirse al kat de ariva i detras del, el marido i la mujer. Las manos del moso se les estavan tremblando kuando avrio la puerta de la kamareta i miro ariento. I kuando tomaron la kandela i miraron al kada kanton de la kamareta, no vieron a dinguno. Despues serraron la puerta i empesaron a abashar de las eskaleras. En esto, piedrizikas empesaron ensupito a kayer de ariva sovre eyos pasando por la puerta ke avian serrado i por sus puerpos. Sintieron ke fueron sakudidos ma, no se avian firido. Fueron aharvados de espanto i se les tomo la avla. En esto, se konvinsieron ke los guerkos avian okupado la kaza.
Agora, entendieron ke kalia ke se vaygan de la kaza. Se avian akodrado de todo lo ke avia afitado a los ke no kijeron en el pasado irsen de sus kazas. Todos estos estavan oy en bedahayim, debasho de la tierra kon flamas ke salen de sus tombas a media la noche i, gritos ke paresen djusto a sus bozes se oyen vinir de leshos. Pormo de esto, kalia ke la kaza se deshe a los guerkos el karar de tyempo ke lo keren. Sin kitar ni un byervo de mazia, la mujer i el moso empesaron a arekojer lo ke se tiene de menester, i el balabay empeso a arekojer sus livros de orasion.
En una ora, estavan prontos para partir i al amaneser la kaza estava limpia i en orden – para ke los guerkos respektan a la kaza i la deshen asigun ke la toparon. I sino, los guerkos de sus birras se vengaran i romperan a todo.
La koza dalkavo ke la mujer avia echo, fue de espandir un mantel limpyo a la meza i de meter un plato kon dulse para adulsar a los guerkos, ke les plaze muncho dulse. Despues, el marido i la mujer echaron un ojo triste ariento de la kaza. El moso metio todo lo ke avian embrujado, a un varil i vinieron a la kaza de sus ijo, ke ya se enkanto de verlos i se merikio por todo lo ke les paso.
Al diya se fueron a ver al haham de la sivdad i le kontaron sovre los bruidos i las piedrizikas. El haham los oyo kon muncho atansion i les disho ke izieron muy bueno ke kedaron kayados i desharon la kaza i pormo de esto las piedrizikas no los firieron i no los achunkaron. Adjusto en diziendo: «Tengo oyido de mi papu ke los guerkos echaron piedras en un kurtijo durante tres diyas enteros para ke los moradores deshan a sus kazas, porke kerian fiestar ayi. Las piedras no izieron dingun danyo a los ke se estuvieron kayados, i kuando uno de eyos avia gritado, komio una piedra grande a su kavesa i se dezmayo. En esto, toda la djente de este kurtijo supieron ke kalia ke desharan sus kazas para ke los guerkos fiestan. Metieron mezas grandes, kon manteles limpios i metieron un pranso kumplido kon komidas asigun se resive djente en diyas buenos. Avrieron todas las puertas de las kazas i despues de salir del kurtijo serraron su puerta d’entrada kon kadena. Durante un mez entero, dinguno no entro por esta puerta i despues de un mez kuando entraron vieron ke los guerkos ya se avian ido.»
El haham adjusto: «Este evenemento akontesio djusto en el mismo tyempo del anio, un mez despues de Pesah, kuando no ez uzado de kazar. En este tyempo, un munchidumbre de guerkos se arekojen para kazarsen, se kazan miles kada ora i estas bodas turan a las vezes un mez entero.»
En oyendo a esto todo, Hasday i toda su famiya se avian kedado la boka avierta i se atristaron ke ivan a kedar un mez entero ahuera de sus kaza. Ma, en mismo tyempo se gustaron ke no avian mirado de opozarsen a los guerkos, ke eran munchos i ken save ke modo de danyo negro les puedian kavzar.
Despues de unos dos diyas, kuando el marido i la mujer kon sus moso se estavan kedando ande sus ijo, bozes fuertes de kantes i de bayles empesaron a vinir de sus kaza. Al otro diya, los vizinos empesaron a kesharsen ke achakes de estas bozes no pudieron durmir noche entera fina el amaneser. Mismo ke se estavan muriendo del sar, uno de estos topo el koraje i miro de la ventana i remarko ke kuples estavan saltando i baylando. Oyo i una muzika ke paresia a lo
Por kuarenta diyas estas todas fiestas turaron kada noche fina el amaneser i no avia dingun sinio ke se ivan a eskapar. Hasday i su mujer no estavan pudieondo mas suportar de ser deportados de sus kaza, i todos sus vizinos tenian los ojos korolados de no durmir. Alafin, todo el vizindado se fue ande el haham i le demando de mirar miedo para meter una fin a esta maldision. Porke un munchidumbre tan grande de guerkos estavan nasiendo en kada punto i ke si estos kazamientos devian turar, en un anyo ken save, kualo iva pueder afitar. En esto el haham, despues ke se avia konvensido ke la ora de afrontar a los guerkos ya avia vinido, embiyo a toda esta djente a sus kazas.
Tomo kon el los miembros del Bet Din kon un katvan, i todos se fueron a la kaza de Hasday. El katvan empeso a eskrivir un amuleto en la forma de una Menora. Ma, despues ke eskrivio a penas una linia, ensupito un gato preto grande salto i se asento a sus pyezes, mirandolo kon los ojos aviertos. El katvan se avia tan espantado ke se izo blanko entero i los miembros del Bet Din empesaron a tremblar. Solo el haham tuvo el koraje de kontinuar. Izo una orasion al Nombre del Dio i en esto, el gato desparesio. Despues ke el katvan ya ayego a eskapar de eskrivir el amuleto, el haham lo enkolgo a la puerta de la kaza.
A la amaniana, Hasday i su mujer, akompanyados del moso, aboltaron a sus kaza i vieron ke la kaza estava kayada. Se estuvieron ahuera i disheron: «Mozotros no vos izimos dingun danyo, i agora vozotros no kale ke mos azesh dingun danyo.» Despues tomaron siniza i la echaron a la tierra. Al otro diya entraron de la puerta i vaziaron azyete enbasho i echaron asukar enriva en diziendo: «Paz para vozotros! Paz para mozotros!» Solo despues de esto, entraron a la kaza. Toparon todo asigun ke lo avian deshado, solo el plato de dulse estava vazia.
Se fueron a la kamareta dariva i avrieron la puerta. En medio de la kamareta toparon una arima grande de monedas de oro, ke era el regalo de
los guerkos por el desrepozo ke avian kavzado.
—————————————————————————————————————–
Del folklor de los djudyos de Turkia
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
