La rubrika de Gad Nassi – HAZARYA El Imperio Turko-Djudio

HAZARYA
El Imperio Turko-Djudio

——

800 anios depues del kolapso del Estado de Yuda, un estado djudio poderozo surjiso en la Edad Media. Portanto sus sujetos no eran de rasa djudia, i mizmo no eran semitos. Konosida munchos tiempos en tanto ke un estado turko-djudio lejanderio, de muestros  dias Hazarya es akseptada ser un fakto istoriko.

——-

Munchos livros i numerozos artikolos fueron publikados i konferensias internasionalas fueron organizadas sovre esta tema. Entre estos, el livro por Kevin Alan Brook es la maz serioza ovra. Otruna ovra muy konosida es «El Trivo 13» por Arthur Koestler. La propaganda antisemita topo un apoyo en este livro,  en argumentando ke los Djudios son de la mizma rasa de los Djudios de Hazarya, dunke no son los eredores de la Tierra de Israel. Portanto, esta punta de vista puede ser aplikada solo a los Djudios Ashkenazis, i no tiene nada de dar i aver kon los Sefardim, Teymanim, Mizrahim i Djudios de la India.

Es en el anio 1898, ke fue inisiado por Solomon Schechter, la investigasion apuntando a la verasidad del Estado Djudio de Hazarya. Schechter avia topado en la Geniza de Kairo, una letra eskrita en turko arkaiko. Konosido en tanto ke «Letra de Kiev» o»Letra de Cambridge«, se pensa ke esta letra es una deklarasion, eskrita en el entorno del anio 930 por un Kuzari de Kiev a un Djudio de alto rango – posiblamente, a Hasday benShaprut. En los ultimos anios, investigatores apuntaron sovre el parallelismo entre esta letra i las fuentes rusas.

Seando ke los teritorios ande los Kuzares bivieron azian parte de la Union Sovietika, no fue posible de azer dinguna ekskavasion para investigar a Hazarya, i  egzaminar los arkivos de los payizes en kestion. Es solo en los ultimos anios, ke las ekskavasiones arkeololojikas de las ruinas en Kiev i en la rejion de Itil i de Sharkel prokuraron evidensas signifikantes sovre la Hazarya Djudia.

Asigun se save, la estoria es eskrita por los ke okupan el lugar de las sivilizasiones ekstengidas. De otra parte, ni el atadijo de Hazarya kon el Djudaismo, no era importante para los enemigos de los Kuzares, komo los Rusos, los Bizantinos i los Arabos, ke fueron en mizmo tiempo interesados a borar sus vestijos de la memoria kolektiva. Aun ke Hazarya avia aksedado a un nivel sosyo-kultural alto, grasias a la integrasion del Djudaismo, el revizionizmo istoriko no fazorizo la ekspresion de este fakto en los livros de istoria.

Las informasiones las maz konfiables sovre Hazarya provienen de fuentes arabos, ebreos, armenos, bizantinos i slaves. El livro por Rav Yehuda haLevi, «HaKuzari«, es la maz famoza fuente entre los dokumentos djudios. Ma, esta ovra, no es konsiderada komo un dokumento de istoria, sino ke un livro de filozofia. Su eskopo fue de arebivir la leyenda de Hazarya Djudia, para promotar la valor del Djudaismo rabiniko, ebranlado por las tendensias filozofikas de su tiempo.

Las korespondensias kon los Kuzares konstituen las otras fuentes importantes. Se ajisa de las letras kambiadas entre Hasday benShaprut – el kargado de atadijos eksteriores del Halif de Kordova – i el Han de Hazarya Yosef, entre los anios de 950 i de 960. Estas letras, ke azen parte entre los raros dokumentos ke  sobrebivieron fin’a muestros diyas, transmeten informasiones de valor sovre la istorya de la Hazarya Djudia i sovre la manera ke los Kuzares se konvertieron al Djudaismo, sus administrasion, sus vida ekonomika, sus developamiento i sus deklino.

Sovre la Istorya de los Kuzares

La istorya de los Kuzares ke presedo el siglo VI, no es bastante aklarada. Provenian de la Asia Sentrala  i, entre los anios 550 i 630, azian parte del Imperio turko Geukturk. Kon el kolapso de este Imperio, en la meatad del siglo 7, los Kuzares aksedaron a la independensia. Sus entidad etnika i politika fue konservada durante 800 anyos – entre los siglos 5 i 13.

El Khahanato independente de Hazarya firmo paktos de amistad kon el Imperio Bizantino. Grasias al ekilibro politiko i militar establisido, Hazarya empidio la migrasion de los Bulgaros a la Evropa orientala, i de este modo los Bizantinos puederon konfrontar los atakos del Oksidente i del Oriento, i asigurar sus kontinuidad.

Los Kuzares despues de aver ancheado sus teritorio en el Norte del Kavkaz, atakaron la Evropa orientala i la Anatolia, en kapturando rejiones de la Anatolia orientala, ansi ke invaisando la Jorjia i el Azerbaydjan.

Entonses, en el eskopo de repandir el Islam, los Arabos organizaron una ekspedision militara kontra Hazarya. Esta ekspedision fue derotada por los Kuzares. Kuando los Arabos asiejaron a Bizans, los Khurazim ke eran aliados del Bizans, empesaron a avansar verso el Sude del Kavkaz. Entonses, los Arabos imobilizaron una mueva armada, ke rempusho a los Kuzares en invaisando i sakeando sus kapitala.

Despues de un sierto de tiempo, los Kuzares se rekovraron i arondjaron de muevo a los Arabos en rekuperando sus kapitala. Esta vez, los Arabos organizarion una tresera ekspedision ke konkesto de muevo Belendjer la kapitala de Hazarya i avanso fina Semender, una otra grande sivdad aparteniendo a Hazarya. Portanto, achakes de litijos internos, Mervan, el ultimo Kalif de los Omeyos i komandente de la armada araba, fue obligado de aboltar a su payiz. Las kontestasiones entre los Abbasis i los Omeyos provokaron la regresion del Islam i  de su poder militar, en favorizando el rekovrimiento de muevo de Hazarya, i empesando del anyo 740, Hazarya volvio a ser el estado el maz poderozo de la rejion.

Hazarya todo en amenajando atadijos pozitivos kon Bizans, fue kapache de mentener un armada regulara i una estruktura developada de estado. Aun ke los Arabos avian reushido a konkistar doz vezes sus kapitala, Hazarya no solo no avia kolapsado, ma se avia gradualmente enfortesido en tanto ke un imperio poderozo durante los siglos VIII i IX.

En su apojeo, Hazarya domino la Rusia del Sude, la Kavkaz del Norte, la Ukrayna orientala, la Krimea, el Kazakhistan oksidentala i el Norte-Oeste de Uzbekistan. Otros grupos turkos komo los Sabares i los Bulgaros fueron en el siglo VII inkluidos basho la suvereniya de Hazarya. De mizmo, los Slaves, Ungaros, Pechenekes, Burtas, Hunes del Kavkaz del Norte fueron, kon siertos otros puevlos, tributarios de dasios a Hazarya. Es achakes de esta supremasia ke la Mar Kaspiana fue nomada «Mar de Hazar«.

Belendjer fue la primera kapitala de Hazarya. En los 720, la kapitala fue Semender, i en 750 fue trokada por Itil en la oriya del Rio Volga. Durante maz de doz siglos Itil fue la kapitala de la Hazarya Djudia.

La Administrasion, el Modo de Vida, la Ekonomia i la Relijion

Hazarya fue dirijida por un sistemo real de doz reyes. El Han Grande reprezentava simbolikamente el governamiento. El Han Bek ke le era subirdinado dirijia aktivamente los echos del estado. Asigun siertos investigatores, despues ke los Hazares se avian konvertido al Djudaismo, todo el poder  fue transferado a Han Bek.

El palasio del Han se topava en una isla en Volga i era arodeado kon paredes altos. Un ponto en el Oeste de la isla la unisava kon la sivdad. En el Este de la sivdad morava el puevlo, i en el Oeste, la klasa dirijente.

Los Kuzares avian establisido un modo de vida semi-sedentario. Sus uzo de nomadismo asigun ke avia egzistado en la Asia Sentrala no fue kompletamente abandonado, i kontinuaron a trokar sus morada en el enverano i en el invierno. En invierno moraron en jeneral en la sivdad. Kon el arivo de la primavera pasaron a la yanura i a la stepa ande kedavan fina el invierno en okupandosen de la agrikultura. Semender ke fue la segunda sivdad en su grandor, fue kon sus numerozos vinyos i verjeles, un sentro de agrikultura. La sivdad de Hazara, ke se topava en la vizindad de la kapitala Itil, era un sentro komersial importante ke se topava en la Ruta de la Seda.

El komersio eksterior era la fuente del revenido del Estado. Hazarya se topava en el kamino ke konektava los prinsipales sentros komersiales de la Evropa kon la Asia. Konosido entanto ke la «Ruta de la Seda«, de este kamino pasavan numerozos karavanes ke pagavan un dasio a Hazarya. Kon los tributos de los otros puevlos, Hazarya se avia trokado en un payis riko i poderozo.

Los Hazares avian atenyado a un nivel alto en los domenos del arte i la kustura. Esto se remarka en las djoyas i otros objetos deskuvridos en los labirentos de la forteresa en Sarkel, de mizmo ke en las ekskavasiones de Semender i Belendjer.

Fin’a 737 los Hazares avian adoptado el paganismo, teniendo por baza la tradision shamanista i la adorasion de Tengri, el Dio Selesto. En 737, el Han kuzari, kuando kayo prizonerio en las manos del komandante arabo Mervan, fue obligado de konvertirse al Islam para salvar su alma. Su Islamizmo no turo ke de 1 a 2 anios, fin’a ke Bulan rekupero de muevo su poder real. En 740, Bulan kon toda la aristokrasia adopto el Djudaismo, i tomo el nombre Sabriel – kontentes del Dio – i una partida importante del puevlo se konvertio al Djudaismo.

En la epoka de la adopsion del Djudaismo por los Hazares, avia empesado el proseso del abandono del paganismo por ser remplasado por el kulto del monoteizmo. Asigun es relatado en el livro HaKuzari de Yehuda Halevi, Bulan despues ke fue obligado de akseptar el Islam, no tuvo repozo. El Dio estuvo adresandose a el en su shuenyo en diziendo: «lo ke izites se puede akseptar, ma no  la intension…«.

De otra parte, el Djudaismo fue el simbolo de la independensia politika de los Hazares. Los Hazares, topandosen de un lado basho la presion del Kalifato islamiko, i de otro lado, basho la presion del Bizans kristiyano, avian preferado el Djudaismo – aun ke sus adeptos eran en minoria – probablamente, para enforteser i sovresalir sus jdentidad i sus prezensia.

La dinastia del Han Bulan-Sabriel kontinuo a okupar el poder kon 13 hanes djudios, ke lo suksedaron. Durante el reyno de Bulan i de su ijo Ovadya, el Djudaismo rabiniko ortodokso se repandio en sus payiz. Kuando San Siril, arivo a Hazarya kon el apoyo de Bizans, para difuzar el Kristianizmo, su inisiativa avia fayitado, achakes de la fervor kon lakuala los Hazares avian abrasado el Djudaizmo.

Ovadya invito rabinos de la Mezopotamia, i kon eyos munchos Djudios emigraron a  Hazarya. De mizmo, establisio munchas sinagogas i yeshivot. Aparte del Tanah, los Hazares se interesaron en el estudio de la Mishna i del Talmud.

En el empesijo del siglo X, la mayoria de la populasion de Itil i Hazara era Muslumana i Djudia, i avia un numero chiko de Kristianos.

El Deklino i la Desimasion

10 anios despues de la korespondensia entre el Han Yosef i Hasday benShaprut, Hazarya fue destruida. Los Slaves del Este, se adjuntaron basho la supremasia eskandinava i fondaron en Kiev un estado ruso, dirijido por Oleg. Bizans formo una aliansa kon los Rusos de Kiev ke adoptaron el Kristianizmo Ortodokso de Bizans. El Estado de Kiev kon Bizans empesaron a rivalizar kon Hazarya para dominar los kaminos del komersio i para abutir a la Mar Kaspiana. Kon la aparision del Estado de Kiev, los Selchukes i los Kipchakes empesaron i eyos a atakar kontinualmente la Hazarya. Hazarya enserklada por enemigos no pudo maz konfrontarlos.

Es en 965 ke fue la derota la maz devastadora. La armada del Estado de Kiev, enkavesada por Svyatoslav konkisto Semender, i depues de doz anyos konkisto la Kapitala Itil i la ruino. En 1016, las armadas rusas i bizantinas unidas vensieron los fragmentos de Hazarya.

Aun la pedrision de sus payis, los Hazares no desparesyeron totalmente de la shena demografika. Una partida emigro verse el Oeste, en mesklandose kon la populasion djudia ashkenazi en payizes komo la Ungaria, la Romania i la Polonya. Otros se aresentaron en el kuartye de Pera, en Konstantinopla. Una otra partida emigro  al Oriente Medio. Los ke se aresentaron en Krimea, influensaron a una partida de los Slaves a admeter los preseptos de la Ley Djudia. Konosidos komo Sobotnikes  – observadores del dia de Shabat – siertos dentre estos emigraron a Israel. Una partida de los Hazares aksepto el Karayismo. Los Karayim ke biven en muestros dias en Polonia, Lituania i Krimea, son los alkavos reprezentantes de los Hazares. No seando  rekonosidos de la parte de los Rabinatos komo Djudios de provenensia semita, estos fueron salvados de la aniilasion por los Nazistos, durante la Segunda Gerra Mondiala.

* * *

La istorya de Hazarya konstitue un egzemplo fasinante sovre la evolusion de la vida djudia en la Edad Media. Mientres ke el Djudaismo estava biviendo su Edad de Oro en Espanya, basho el Islam en la Evropa oksidentala, el Reynado sovereno Turko-Djudio de Hazarya gozava de un poder signifikante en el Oriente. Kuando los Djudios en la Evropa estavan persekutidos, Hazarya fue por eyos una torcha de esperansa. Los Hanes djudios de Hazarya resivieron en sus payiz los refujiados djudios del Imperio Bizantino i Persano. Lo ke fazorizo el akolyo benevolente del Djudaizmo por su puevlo.

El Imperio Kuzari izo parte de las maz avansadas sivilizasiones de su tiempo. Kuando sus vizinos en el Norte eran dirijidos kon un estatuo tribale, Hazarya fue un estado kozmopolito, en elkual, la tolerensia seando un prinsipio baziko de su governo, fue reseptivo a todo modo de influensa relijioza i kulturala. Este estatuo avia de mizmo fazorizado el komersio entre los puevlos basho su supremasia. Grasias a esta atmosfera de paz, Hazarya kontribuo al developamiento ekonomiko i a la emansipasion en la Rusia Oksidentala, en el Kavkaz i en el Norte de la Mar Preta.

———————————————————————

Niso Missistrano
Traduizido del Turko i editado por Gad Nassi

———————————————————————

Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.

————————————————————————————————————————————————–