Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Lot i sus Ijas

La estoria de Lot i sus ijas es una de las mas estranyas epizodas de la Biblia. Tan por el akto mizmo, tan por sus konsekuensas istorikas i tan por su efekto en la pensada mesianika.

Lot era el sovrino de Avram Avinu. Achakes de un konflikto ke avia desbrochado entre sus pastores despues ke avian tornado de Ayifto, Avram i Lot desidaron de separarsen para empidir una lucha armada. Avram avia rekonosido a Lot el dirito de eskojer en primero las tierras ande se iva aresentar. Sovre esto, Lot eskojo la valeya fertila del Yarden i se aresento al lado de Sodom. Avram kontinuo a kudyarlo i mismo lo salvo del atako de sus enemigos.

La leyenda de Lot kontinua en relatando su ospidalitad a dos andjelos ke vijitaron su kaza. Durante esta vijita, la djente de Sodom, konosida por su visiozidad, se arekoje ahuera de su kaza, en egzijando de Lot el entrego de los ospedes en sus manos, para ke pueden gozarsen de eyos. Lot se opoza a esta demanda i al lugar de los andjelos, les propoza de entregarles sus dos ijas, en notando ke eyas no avian ainda konosido dingun ombre.

Esta oferta no es akseptada. En esto, kuando la djente ataka la kaza de Lot, los dos andjelos salen ahuera, los aharvan i los siegan.

En segito, los andjelos persuaden Lot de fuyirse kon su famiya, porke el Dio iva destruir la sivdad.

En efekto, las sivdades de Sodom i Gomor son destruidas por una luvya de flamas i de ashufre.

Solo Lot, sus dos ijas, su mujer i dos ombres ke eran kandidatos para kazarsen kon las ijas de Lot, son permitidos de salir de la sivdad. En el kamino, la mujer de Lot ke no puede venser su kuriozidad de mirar la destruksion de Sodom, i los dos kandidatos, ke no se kreen en la destruksion de la sivdad, perisen en transformandosen en kolonas de sal.

Por lo ke afito despues, ansi eskrive la Biblia:
«I Lot kontinuo en su kamino… i moro en la montanya, i sus dos ijas kon el… i moraron en una kaverna…

I la behora le disho a la chika: ‘Muestro padre es viejo i no ay un ombre ke se aserkara de mozotros, en la manera de toda la tierra.

Ven, daremos a bever vino a muestro padre, i mos echaremos kon el, para poder prezervar su desendensia’ «.

Las ijas kedan prenyadas. I de los dos ijikos ke nasen, el uno sera el ansestro de los Moabites i el segundo de los Amonites.

* * *

Asigun la leyenda, antes ke Sodom fuera destruida, una muchacha fue aferrada por sus moradores en dando a los proves el pan ke avia guadrado en su kantaro. Para kastigarla, fregaron miel a su puerpo, la metyeron al bodre de la muraya de la sivdad i las bizbas vinieron i la konsumaron. Es achakes de los gritos de la dezmazalada ke el Dio se avia desidido de destruir a estos maldichos.

El Dio mando dos andjelos degizados ande Lot para ke topen los djustos de la sivdad. I, en kavzo ke toparian a lo manko diez djustos entre los sivdadinos, iva renunsiar a destruir la sivdad.

La razon de Lot de ofreser sus ijas para asuvir el dezeo de los sivdadinos egzaltados no es klarifikada en la Biblia. Se pensa ke esta desizion fue tomada para protejar los andjelos, achakes de la importansa atribuada en akeos tiempos, al dover de ospitalidad.

La Biblia adjusta ke Sodom fue destruida al amaneser del 16en diya del mez de Nisan, kuando la luna i el sol estavan endjuntos en los syelos, porke bivian en Sodom adoradores de la luna i del sol.

Lot seando el sovrino de Avram Avinu, la Biblia se refera a el kon respekto. De mizmo, presiza ke Lot, seando boracho, no era konsiente del akto de sus ijas i por esto, era inosente. Portanto, adjusta ke, de toda manera, Lot avia partisipado en este akto.

Las dos kreaturas ke nasen de esta union, seran los ansestros de dos puevlos, los Moabites i los Amonites, ke se komportaran durante la istoria en tanto ke los enemigos de Israel. Portanto, es notado ke el Mashiah desendera de Rut la Moabita – ke fue la ansestra del Rey David – i de Na’ama la Amonita.

—————————————————————-

Gad Nassi