Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Bilha dezonorada por Ruben

Ruben era el ijo behor de Yaakov. A su nombre fue yamado el Trivo de Ruben. En el empesijo, su nombre parese en kapo de los dodje Trivos de Israel. Ma, durante la konkesta de la Tierra de Kanaan despues del Egzodo de Ayifto, el Trivo de Ruben perye su egemonia, para deshar su lugar al Trivo de Yosef. Este trokamiento, es eksplikado por el pekado kometido por Ruben.

Asigun la leyenda, kuando su padre Yaakov no estava prezente, Ruben avia apersivido a Bilha kuando se estava lavando, i la avia dezeado. Bilha era la servante de Rashel i en mizmo tyempo, la konkubina de su padre. Kuando entro a la tienda de Bilha en la noche, Ruben la topo durmyendo sola en su kama. I kuando se echo kon eya, Bilha se desperto, lo afero a Ruben i empeso a gritar. Sintiendose kulpable de su prezensia, desho su mano, i Ruben se fuyo de ayi. Bilha se lamento de si para si, i no avlo sovre esto a dinguno. Solo, kuando Yaakov abolto i la renkontro, le disho:

«No so limpya para ti. Porke Ruben me dezonoro, i se echo kon mi durante la noche, kuando estava durmiendo. No lo avia remarkado fina ke kito mi fusta i durmyo kon mi”.
Yaakov se avia muncho ensenyado de oyir lo ke afito. I, no se aserko maz de Bilha porke Ruben la avia dezonorada.

* * *

Bilha era una servante, ke Lavan avia ofrisido a su ija Rashel. Kuando Rashel se rendio kuento ke no estava kedando prenyada, avia dado a Bilha a su marido Yaakov en tanto ke konkubina. Bilha paryo dos ijos a Yaakov: Dan i Naftali.

Lea, ke fue la primera mujer de Yaakov, no era preferada por Yaakov. Yaakov se avia detenido de divorsarse de eya kuando supo ke estava prenyada. I, kuando Rashel, la mujer kerida de Yaakov, se avia murido, Yaakov bushko a konsolarse en los brasos de Bilha, al lugar de Lea.

En este konteksto, un otrp insidente es de remarkar.. Kuando Ruben tenia solo unos kuantos anios, traye a su madre mandragores ke avia eskojido de los kampos. En esto, Rashel aroga a Lea de darle a los mandragores.

Esto es eksplikado por el fakto ke Rashel era ainda sterila en akel tiempo i por la kreyensia ke el mandragor – ke sus raizes paresen tener formas umanas – era konsiderada en tanto ke una planta majika teniendo el vertudo de eksitar el dezeo seksual i de provokar la fertilidad de la mujer.

Portanto, se kree ke Ruben avia eskojido a los mandragores para ayudar a su madre a seduizir a Yaakov. I por esto se pensa ke, ainda kuando era un ijiko, Ruben empeso a ser involvado en la rivalitad egzistiendo entre su madre Lea i Rashel.

Asigun syertos komentatores, Ruben se aviya solo kontentado de transferar la kama de Yaakov de la tienda de Bilha, a la tienda de su madre Lea, para empidir ke Bilha toma el lugar de su madre. I no avia tokado a Bilha. Portanto, este akto avia tanto umiliado a su padre, ke fue konsiderado ke en entrando a la tienda de Bilha, Ruben avia kometido el adultario.

Probablamente, esto fue la razon prinsipala ke avia provokado mas tadre la piedritad por Ruben de su dirito de ijo behor.

Kuanto a Bilha, eya fue apresiada por su onestidad. Asigun el Livro de Zohar, la Shehina – ke es el espirito feminino del Dio – avia pasado a Bilha, despues de la muerte de Rashel i de Lea.

—————————————————————-

Gad Nassi