eSefarad Noticias del Mundo Sefaradi
El Templo i la Pared de los Yoros
Kuando kreo el mundo, el Dio ya avia antisipado ke el Templo iva ser fraguado, destruido i fraguado de muevo. Fina ke el Dio revelo a Yakov, en su shuenyo en Bet El, la vizion del Templo fraguado, destruido i fraguado de muevo, dinguno no supo este sekreto.
Kuando el Rey David kijo fraguar el Templo, imploro del Dio de amostrarle su lugar. En esto, un andjelo aparesio en su suenyo, estandose en el lugar ande el Templo devia de ser fraguado. Portanto, el andjelo ordeno de no fraguarlo, porke David se avia profanado kon la sangre umana vertida en sus kombates.
El andjelo le ordeno de transmeter esta tarea a su ijo Shelomo, i de aparejar el material komo oro, plata, kovre, piedras i tavla de sedro i de sipreso, para la fragua. David se sometio i kuando vino el tiempo de Shelomo para fraguar el Templo, todo este material ya estava pronto.
Entonses, el Rey Shelomo konvoko a todos – el riko komo el prove, los prenses i los saserdotes – i se adreso a eyos:
«Puevlo de Israel, fraguaremos un Templo en Yerushalayim en la onor de Dio. Este Templo sera el altar santo de todo el puevlo, i todos devesh de partisipar a su fragua. Por esto, vash a travar al sorte para desidar la pared ke kada grupo va fraguar.»
Shelomo aparejo kuatro sortes. Una para la pared del Norte, otra para la del Sud, una otra para la del Este, i la dalkavo para el Oeste. Despues, demando de kada grupo de eskojer una de estos.
Entonses, rezulto ke los prenses fraguaran la pared del Norte, komo las kolonas i las eskaleras; los saserdotes, la pared del Sud kon la Kanopia i suskortinas; i los merkaderes, la pared del Este ansi ke abasteran la azeyte para la Luz Eternal. A los proves les kayo de fraguar la pared del Oeste – konosida komo la Pared de los Yoros – i teshar las kortinas del Templo. De mizmo, les fue demandado de arogar para ke el Templo sea enteramente fraguado. En segito, empeso su fragua.
Los merkaderes tomaron las djoyas de sus mujeres i las vendieron para pagar a los ovreros ke fraguavaran la pared, i en kurto tiempo la pared fue fraguada. De mizmo, los prenses i los saserdotes toparon los remedios para fraguar sus paredes. Ma, para los proves esto turo muncho mas tiempo, porke eyos devian de fraguarla kon sus manos. Vinieron kada diya i lavoraron, i todo este tiempo tenian sus korasones yenos de alegria, porke sus amor por el Dio no konosia limitos.
A la fin, el Templo fue fraguado. Era tan ermozo ke nada en el mundo puedia rivalizar kon su esplendor. Era la djoya de la korona de Yerushalayim. I mas despues, kuando los proves vijitavan el Templo, sus padres les dizian:
«Estas viendo esta piedra en la pared? La pozi kon mis manos.»
I las madres a sus ijas:
«Estas viendo esta kortina ermoza? So yo ke la teshi kon mis manos.»
Despues de munchos anyos, kuando el Templo fue derokado, solo la Pared del Oeste fue salvada, porke los andjelos avian etalado sus alas para protejarla, i porke esta pared fraguada por los proves, era la la mas valutoza koza en los ojos del Dio.
Mizmo de muestros diyas, esta pared esta siempre en pies. Kada demanyana se ven las gotas de la rozada enriva de sus piedras, i se kree ke la Pared esta yorando las noches por el Templo ke fue derokado.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
