eSefarad Noticias del Mundo Sefaradi
El Rabino Martirio: Yuda Kovo
El siglo XVII reprezenta por el Imperio otomano una epoka de instabilitad politika i ekonomika. En este tyempo, para subvenir a los gastes del Imperio, el sultan Muat IV (1) – ke reyno entre 1623 i 1640 – avia empozado un dasyo de kapital, ke fue aplikado de una manera arbitraria i sin dingun pietad. Las minoritades non-musumanes fueran obligadas de pagar fina maz de diez vezes el dasyo, ke uzavan pagar.(1)
De mizmo, los indisios de esta instabilitad se remarkan i en la vida djudiya. Grasyas a la savidura i atadijos komersyales de los djudyos iberikos imigrados, los djudyos otomanos avian alkansado en el siglo pasado a formar una klasa elita i respektada. Kon la fin de esta imigrasyon masiva en el siglo XVII, i esta epoka de prosperitad se iva terminar.
Saloniko en la Primera Meatad del siglo XVII
En 1620 i en 1623, Saloniko fue aharvada por dos fuegos. En el anyo 1628, empeso el egzodo de los djudyos de Saloniko. Este egzodo fue provokado achakes de dasyos pezgados, ke el governo otomano avia impozado a esta komunitad. En 1631, el dia de la muerte de un rabino nombrado (2), la sivdad de Saloniko fue rekuvrida por una luvia de polvo i de sinizo, probablamente de provenensia del volkano Vezuv. Este evenemento, fue enterpretado por los djudyos entanto ke el oguro de la kolera divina. Empesando del anio 1568, la komunitad djudiya de Saloniko era obligada de pagar un dasyo partikular: el abastamiento de la ropa yamada chuha, destinada a la konfeksyion de los vistimyentos de los yenicheris.
En 1634, la devda de la komunitad djudiya de Saloniko al governo, avia alkansado a un shifro tan importante, ke esta komunitad no la puedia reglar. Este shifro se engrandesio de mas i mas. En el anio 1636, la komunitad no tenia mizmo los fondos menesterzos para pagar los gastes de la fabrikasyon de la chuha. Esto provoko ke munchas ropas de basha kualitad, fueron remetidas para kovrar este dasyo. Fina ke el defterdar (perseptor de dasyos) de Saloniko, un syerto Kuleli Djafer, es invokado a la kapitala i dekapitado por el orden del sultan.
La kualitad delchuha, no plaze a la armada. Esta kestion deve ser reglada por un enkontro direkto, entre los reprezentantes de la komunitad i el governo. Un firman real ordena de ser konvokado a Estambol una delegasyon de la komunitad para eksplikarse. Toda la populasyon djudiya de la sivdad, savyendo ke el tempesto de la monarshia esta derokando almas, esta bulversada. Durante tres mezes enteros, se diskute sovre el eskojamiento de los reprezentantes, ke ozaran afrontar la sanya del Palasio. A la fin se desida de formar una delegasyon de sej personas ke repezentara la komunitad. Esta delegasyon es formada por Yuda Kovo, Izak ben Nahmias, Yosef Aaron Kohen Naar, Samuel Melamed, Zaharya Sullam i Yosef Lobel.
Estambol, 1637
La delegasyon ariva a Estambol en medio de la primavera del anyo 1637, trayendo kon eya munchas balas de chuha de buena kualitad. Portanto, la kualitad de esta ropa no plaze a los responsables del kuerpo de yenicheris, ke miran de trokarla en moneda, en vendidad publika. Achakes de la egzistensia de muy poko de merkaderos i probablamente achakes de la kriza ekonomika, el revenido de esta vendidad no es bastante para kovrar el dasyo i toda la delegasyon es arestada por las otoridades.
Kovo i todos los reprezentantes de la komunitad son enkantados. Eyos saven muy bueno ke la chuha, fue eskojida de una manera muy atentiva i es konforme a las egzijensas. Durante mezes enteros reklaman ke la kualitad de esta ropa sea ekspertizada de muevo. Portanto, no ay dinguno ke puedera [ntervenir a sus kuento. Los djudyos no okupan maz postos importantes en el governo. Los medikos djudyos del Palasio son destituados, por aver konsejado al sultan de abstenerse de beverajes fuertes. Kada uno save, ke este kavzo de los djudyos es pedrido de avanso i por espanto de ser konsiderado entanto ke sus kollaborator, dinguno de los responsables no oza de intervinir.
Aparte de Kovo, los myembros de la delegasyon se konvensen de akseptar un kompromiso. Malgrado todos los konsejos, Kovo solisita una mueva ekspertiza de la ropa. Kovo ajisa kon odasio i perseverensya, fina ke su komporto es konsiderado komo un molesto.
En la meatad de Ogusto, se ordena de aprehendar de muevo a todos los myembros de la delegasyon. Un dia de Shabat, estos son sirkulados kon kadenas en los piezes i en las manos en las kayes de Estambol. Sus detresa es muy fuerte. A esta umilyasyon de ser tratados entanto ke delinkuantes, se adjusta el remorso de la violasion del Shabat. En una parodia judisyara, onde la desizyon fue tomada de avanso, el rabino Yuda Kovo es kondanado a la muerte, por aver livrado ropa falsifyada.
de ropas para vistir a los elevos del Talmud Tora, en Saloniko. Kortezia del Muzeo de la Diaspora, Tel Aviv
El sultan Murat IV, es implakablo i inaksesiblo a la miserikordiya. Todos los esforsos para salvar a Kovo son vanos. Kovo es enforkado un diya de Shabat del mez de septembre del anyo 1637, delantre de los myembros de la delegasyon i su ijo Eli, de disyete anyos, ke lo avia akompanyado en este viaje.
Djusto despues de esto, los otros myembros de la delegasyon son, a sus grande surpriza, liberados sin dinguna eksplikasyon. Alborotados i espantozos, eyos pagan todo lo ke el governo egzija. Despues de aver prezentado sus testimonyo en el Rabinato de Estambol, se empresan de tornar a Saloniko. El ijo del rabino Kovo, keda en Estambol para okuparse de los funerayes de su padre. Despues es adoptado por la komunitad djudiya de Estambol, ke se okupa de su edukasyon rabiniko. Es en 1670, en la edad de sinkuente anyos, ke el retornara a Saloniko, entanto ke un rabino i un talmudisto nombrado, para okuparse de su komunitad, turmentada esta vez por las konsekuensas de la irupsion del Mesianismo de Sabetay Sevi.
Este evenemento se puede konsiderar entanto ke una manifestasyon signifikativa del empesijo de la dekadansya del Djudaizmo otomano. Esto es en mizmo tyempo la estoria de un eroe i un martirlo, ke no fue fin’a oy, bastantamente rakontada i konosida.
(1) Sultan Murat IV es konosido por su ferositad. El shifro de las personas ke fueron egzekutidas durante su reyno es tan grande, ke no se puede evaluar. Entre eyas se topan personalitades de la mas alta klasa relijyoza i politika. Esta ferositad se manifesto i en lo ke konserna el eskojimiento de fondos. En 1627, kon su orden todas las djoyas de las mujeres djudiyas de Estambol fueron konfiiskadas.
(2) Este rabino apartenia a la famiya Espanya. Asigun el kronikor David Konforte, “Kore haDorot”. Sitado por Nehama.
Giyo Bibliografiko:
Nehama, Joseph. Le Drame des Impôts, in Histoire des Israélites de Salonique, V, pp. 71-90, Publications de la Fédération Sépharadite Mondiale, directeur O. Camhy, Salonique, 1959.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
Muy trajika estorya. Komo dize, Murat IV era un despoto tiraniko, no solo kontra djudios, si no ke kontra todos los sivdadinos otomanos.
Grasias a Gad Nassi por trayermos pedasos enteresantes de muestra istoria.
Rachel