eSefarad Noticias del Mundo Sefaradi
La epoka de oro del djudaismo sefardi en Amsterdam
La epoka de oro del djudaismo sefardi en Amsterdam El mediko djudio de Rembrandt
– – – – – – – – – – – – – – – – – – –
La medisina en la Edad Media fue una de las prinsipales profesionas de los djudios en la Evropa. Despues de sus ekspulsion, los medikos djudios iberikos prosperaron en los payizes ke los resivieron.
El akolyo akordado por los Payizes Bashos a los ibero-djudios egzilados kontribuo a la kreasion de la Edad de Oro del siglo XVII. De esta manera se kreo, en la vizindad de la ermoza Sinagoga Portugeza, un sentro kultural en el barrio djudiyo de Amsterdam,. Konosido komo Judebeestraat – Kaye Djudyo – es en este sentro ke fomento una kreatividad artistika, i ke la pensada djudia kon la medisina evoluaron.
Efraín Iskiau Bueno fue el mediko del famozo pintor Rembrandt van Rijn. Nasyo djudyo, dediko toda su vida a la medisina, i muryo djudyo.
En la epitafa de su tomba en el semeterio djudyo portugeze Ouderkerk parese la data ebrea de su muerte, 30 Heshvan 5426. (8 de Noviembre, 1665)
– – – – – – – – – – – – – – – – – – –
La emansipasion de komunidad djudia de Amsterdam en el domenio de la espiritualidad djudia, es markada durante el siglo XVII por la ovra de Manasseh ben Israel (1604–1657), ke fue un ensenyante de la Tora i editor de livros relijiozos.
Nasido marrano en Madeira, Manasseh se establesio en Amsterdam, despues de averse fuyido, kon su padre i su ermano, de la Inkizision de Portugal. Manasseh se adelanto muy presto en sus estudios. Fue un miembro de la Hevra de Talmud Torah a la edad de 12 anyos. Empeso a estudiar en la yeshiva kuando yenia 14 anyos, i a la edad de 15 anyos izo su primer diskurso publiko. Fondo la primera imprimeria ebrea en Amsterdam. Fue konsiderado en el mundo akademiko komo el prinsipal reprezantante de la konosensia i del ensenyamiente del ebreo. Aktuo de una manera proeminente en las negosiasiones sovre la posibilitad de akordar el retorno de los djudios a la Ingleteria. Mantenio estrechos atadijos kon luminarios komo Hugo Grotius i Rembrandt. Su eksepsionalmente ampla konosensia teolojika le akordo de ser el prekursor de los eruditos djudios del siglo XIX, ke ovraron para prezentar el Djudaismo de una manera kompliente i admisible para el mundo kristiano. Su ovra, Piedra Gloriosa, redijida en este buto fue publikada en 1655 kon las gravures de Rembrandt.
Rembrabdt (1606-1669) se avia instalado kon su famiya – su espoza i sus doz ijas, i mas tadre kon su segunda espoza i un ijo, en el barrio djudyo de Amsterdam. Bivieron una vida bastante larga, ke avia nesesitado una asistensia medikala frekuente para los nasimientos, ansi ke las infirmidades de los miembros de su famiya.
Verso la fin de su vida, despues ke toda su famiya avia perisado, Rembrandt seando inkapable de pagar sus devdas, fue ekspulsado de su kaza, i muryo en la mizeria.
La dinastia medikala Bueno
La dinastia medikala Bueno floresio en los Payizes Bashos despues de ser desterrada tres vezes de otros payizes. En primero, despues de ser ekspulsados de sus payis natal Espanya, los Buenos se instalaron en Portugal. Los djudios kedaron en sus muevo payis asta 1498, kuando el rey desidio ke solo los ke se konvertieron puederian kedar en el payis. Para evitar la Inkizision, se instalaron en el Sud de Fransia i para protejar sus parientes ke kedaron en Portugal nesesitaron de adoptar un nombre alias. Ephraim se izo Martin Alvarez. A la diferensia de Espania i de Portugal, los djudios egzilados a Fransia fueron akseptados despues de konvertirsen, ma no fueron persekutados por praktikar sus antigua relijion.
En akeos tiempos les fueron permitido de estudiar la medisina, portanto en kondision de no pratikarla. Esta situasion se mantuvo fina 1615, kuando una vez de maz fueron de muevo fueron ekspulsados. Sus proksimo refujio fue las tierras olandezas.
Aun ke los olandezos eran konosidos por sus liberalismo, sus tolerensia verso los djudios tenia sus limitos. Djudios kon titolos de mediko obtenidos en el estranjero eran permitidos de pratikar sus profesiones komo medikos jeneralistos, ma no eran akreditados de segir una edukasion tersiara. Para la akizision de un grado mas alto, varios miembros de la dinastia, asigun el egzemplo de Ephraim, avian estudiado en Bordeaux.
Ansi figuran los miembros de la famiya Bueno en el diksionario biografiko de los medikos olandeses:
- Abraham, egzerso la medisina asta 1633;
- Benjamin, finalmente emigro a Nueva York i murio en 1683;
- Jacob, un graduado de la Eskola de Medisina de Salamanca, praktiko en Amsterdam asta 1661;
- Joseph Morenu, praktiko en Amsterdam asta 1669;
- Solomon, praktiko en Amsterdam asta 1681;
- Joseph, un graduado de Burdeaux, servio komo mediko privado del Rejente de los Payizes Bashos asta 1631, i su ijo
- Ephraim, nasido en 1599 en el pueblo de Castello Rodrigo en Portugal, graduado de Bordeaux en 1641, egzerso la medisina en Amsterdam asta 1665.
Rembrandt pinto su mediko Ephrain en doz okaziones. No se save si estos portretos fueron komisionados o fueron sus onorarios por los servisios medikales akordados a Rembrandt.
El primero de estos es una gravura datando de 1647, depiktando el mediko abashando de las eskaleras, ke lo reflekta kon un aniyo aparente en el dedo indise, i ke reprezenta ka insinya de la komunidad medikala. Kopias de esta gravura se topan oy en muzeos, entre otros, el Muzeo Metropolitano de Nueva York i la Galería Nasional de Victoria en Melbourne. Ver la figura en el titolo.
El segundo es un portreto al olio, ke se topa en el Rijksmuseum, Amsterdam. La estoria de su provenensia es bastante kurioza. Esta pintura avia apartenido durante mas de doz siglos a la famiya Six, kuando en el empesijo del siglo XX, fue komprada por el bankero djudyo Fritz Mannheimer. Fue en segito komprada para ser ekspozada en el pretendido Muzeo Führer al nombre de Hitler en Linz, Austria, ke nunka se realiizo, i en 1942 fue transferrada al Sentro Santral de depozitos en Munich. Despues de la kayida del Tersier Reich, volvio a Olanda en 1948, i finalmente fue ekspozada en el Rijksmuseum de Amsterdam en 1960.
En 1656, Bueno fue gravado por un otro artisto famozo, Jan Lievens. Parese asentado, kon una kipa en la kavesa, i en la parte inferiora esta eskrito: Dr Ephraim Bonus, Medicus Hebraeus … Magnus in Medicis.
Aparte de ser mediko, Ephrain Ezequias edito i subvensiono munchas ovras; traduizo al espnyol i publiko una grande parte de la liturjia, ayudo a editar el Shulhan Aruh de Yosef Karo, i redijio poezia espanyola. En 1656, fundo kon Abraham Pereira, la akademia de bienfezensia Or Torah. Era tambien un erudito de la Biblia. Djunto kon Ben Israel i Yona Abravanel, traduizo Los Salmos de David al espanyol. En 1650, publiko el Pene Rabbah, un indise de los pasajes biblikos ke paresen en el Midrash Rabbah. Fue apresiado komo mediko; djunto kon su padre Joseph trato el rejente de los Payizes Bashos, el Prens de Orange.
En la epitafa de su tomba en el semeterio djudyo portugeze Ouderkerk parese la data ebrea de su muerte, 30 Heshvan 5426. (8 de Noviembre, 1665)
————————————————————————–
Fuente: George M. Weisz, M, Rembrandt’s Jewish Physician, Rambam Maimonides Medical Journal, Volume 4, Issue 2, April 4, 2013.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
