eSefarad Noticias del Mundo Sefaradi
El Bayle de las Ichizeras
Muncho antes, la sivdad de Ashkelon era molestada por una banda de ocho ichizeras, ke bivian en una kaverna ahuera de la sivdad. Estas ichizeras ke eran enemigas djuradas de los moradores de Ashkelon, los maldizian kon todo modo de maldisiones. Aparte de enganios negros komo tornar el vino en vinagro i amatar la lumbre, estas ichizeras kavzavan i danyos komo, empidir la luvya de kayer i sekar la leche de las vakas. I una de sus vengansas fue de trokar un rabino en un pasharo i su mujer, en un parparo
Las dos kreaturas de este kuple desmazalado fueron testigos de esta malisia. Eyas avian visto de ke manera estas ichizeras se avian aserkado de sus jenitores i los avian aharvado kon sus palos majikos, en transformando sus padre en un pasharo i sus madre en un parparo, ke se avian bolado i ke no los avian visto mas.
Despues ke kontaron esto todo, el puevlo de Ashkelon se avia sintido utrajado i se avia adresado al Rabino Shimon benShetah para ke los debarase de las maldisyones de estas ichizeras.
En primero, paresia ke el Rabino Shimon avia ezitado de luchar kontra las ichizeras. Arivo ke uno de sus elevos se avia soniado ke kuando estava kaminando en una guerta de flores, ande pasava un rio, avia visto el Rabino Shimon ke estava perkurando a arivar al rio i no estava parviniendo. Avia visto i a Miryam, la ermana de Moshe Rabenu. Miryam tenia un obyekto en la mano. Kuando le demando kualo esto era, Miryam avia amostrado una yave de fyerro, en diziendo ke eya fue embiada para ke la transmete al Rabino Shimon. I, kuando el elevo avia demandado ke yave era esta, Miryam avia respondido ke era la yave de las puertas del Inferno, ande las almas maldichas eran kastigadas. En adjustando ke esta yave sera en kurto tyempo delivrada al Rabi Shimon despues ke el tiendra su promeso de debarasar la sivdad de las ichizeras.
El elevo, despues ke se desperto no pedrio tyempo i korio pishin ande el Rabino Shimon i le konto su shuenyo. En esto el rabino disho:
“Esto siguro ke lo ke me kontas es verda. Siguro ke esto es un mesaje de los syelos para mi, porke no tengo deskuvrido a dinguno mi promeso de eliminar a las ichizeras.”
Era verdad ke el Rabeno Shimon avia echo un plano. Despues ke aspero ke la sezon de las luvyas empese, arekojo ocho ombres. Demando a kada uno de traer kon si una kaldera grande i vistidos limpios. Despues, les demando de meter sus vistidos sekos ariento de las kalderas i de meter las kalderas a la roves a sus kavesas. Las yevo a la kaverna ande estavan las ichizeras. Kuando avian arivado allado de esta kaverna, les demando de entrar a una otra kaverna vizina i les disho:
“Kuando va chuflar la primera ves, vos vash a vistir las ropas limpias. I kuando va chuflar por la segunda ves, vash a vinir todos i vash a entrar a la kaverna. En esto, kada uno de vozotros va tomar a una de las ichizeras i va empesar a baylar kon eya. Kuando vozotros todos estash baylando, vash alevantar a las ichizeras en el aver, komo si esto era una figura del bayle. Portanto, una vez ke las alevantatesh, no deshesh ke sus pyezes token de muevo enbasho. Porke, ya es muy bien savido ke kuando los pyezes de una ichizera no tokan la tierra, eya es sin dingun poder.”
En segito, el Rabino Shimon se fue a la kaverna de las ichizeras i batyo su puerta. Eyas demandaron:
“Ken sos? Kualo keres?”
El rabino respondio:
“Avrime la puerta. Yo so uno de los vuestros. Yo so un ichizero. Vos kero amostrar mis poderes. I despues vozotros me amostarash los vuestros.”
Las ichizeras:
”De kualo sos kapache?”
El rabino:
“Puedo azer apareser ocho ombres, kon vistidos sekos, ke baylaran kon vozotros.”
Kuando las ichizeras oyeron esto, le disheron:
“Entra, entra ariento, keremos ver komo azeras a este marifet!”
Las ichizeras avieron la puerta de la kaverna, i el Rabino Shimon entro. Las ichizeras vieron ke sus vistidos eran sekos i no lo pudieron entender esto, porke estava aziendo una luvya mabul ahuera.
Le demandaron:
“Komo puede ser ke tus vistidos son sekos?”
El rabino:
“Me izo yo mismo chikitiko i kamini entre las gotas de luvya.”
I las ichizeras disheron:
“Tu tienes grandes poderes!”
En esto, las ichizeras empesaron a amostrarle sus poderes. Una de eyas izo mover una meza en medyo de la kamareta sin tokarla. Una otra izo apareser en el tavan un mantel estranyo yeno sinyos de ichizeria i abasharlo en esterandolo enriva de la meza. Una otra disho byervos majikos i la meza se incho de todo modo de komidas i beverajes de los mas savrozos. Despues le disheron al rabino:
“Agora es tu torno de amostrarmos lo ke tu sos kapache.”
El Rabino Shimon:
“Siguro, agora vos amostrare los marifetes ke vos prometi. Kuando va chuflar dos vezes, ocho ombres van a pareser i van a baylar kon vozotros.”
En esto chuflo dos vezes. Los ombres en oyendo el primer chuflo, se vistieron los vistidos sekos. En el sigundo chufle, se presipitaron a la kaverna. Viendo a estos i partikularamente a los vistidos sekos, las ichizeras echaron gritos de alegria. Kada uno eskojo a una ichizera komo partenera i empesaron a baylar i a turbiyonar kon alegria. Ensupito, los ombres alevantaron a todas las ichizeras en el aver. Enprimero, a las ichizeras les paresio ke esto era una figura del bayle. Ma, kuando vieron ke no las estavan abashando i las estavan tomando ahuera de la kaverna, empesaron a gritar i a dezmodrarsen del espanto, porke tenian un espante terivle de la luvya. En el punto kuando eyas fueron tokadas por la luvya, todas ya se avian transformado enteramente.
Las ke avian trokado el vino en vinagro, se izieron rasimos de uva echa, prontos para ser arekojidos i ahajados en la presa.
Las ke avian amatado los lumbres, se izieron flamas i se kemaron fina ke se izieron siniza, ke el ayre disperso a los kuatro kantones del mundo.
Las ke avian empidido la luvya de kayer, fueron trokadas en aguas, ke formaron un koryente de agua ke se vazio en un rio, ke se echava en la mar. Mas despues, estas aguas se evaporaron al syelo en formando nuves, ke kayeron entanto ke luvyas a la tierra.
Las ke avian sekado la leche de las vakas se izieron yervas, ke despuesas ke las vakas las komieron, abastaron en abondansa una leche savroza.
Las ke avian trokado el rabino en un pasharo i su mujer en un parparo se izieron lombrigos ke se fuyeron en las tierras fina ke pasharos ambiertos los avalaron uno a uno.
I despues ke afito esto todo, las maldiyones de las ichizeras se dezazieron, i el pasharo kon el parparo de muevo se izieron el rabino i su mujer.
Es ansina ke las ichizeras fueron kastigadas i la sivdad de Ashkelon fue salvada por syempre de estas ichizeras i de sus maldisiones.
——————————
Gad Nassi
Ilustrasion: Roz Kohen
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
