eSefarad Noticias del Mundo Sefaradi
Djudios en la Revolta Grega (II)
LA ALIANSA TURKO-DJUDIA
——————————————————————————————————
La Gerra de Independensia grega fue una de las mas sanglantes luchas konosidas en la istoria. Aparte de los evenementos, asigun lo aviamos remarkado en la presedente parte de este estudio, los djudios en la Masedonia tambien fueron involvados en las sirkonstensias de esta gerra.
——————————————————————————————————-
La revolta de los gregos kontra la dominasion otomana avia empesado en la Morea en Marso 1821. En una perioda de una semana, sivdades komo Kalamata, Patras, Salona i Livadia kayeron en las manos de los gregos. En el mes de Septiembre, Tripolitsa, la kapitala de la Morea, fue konkistada por los revoltados gregos.
Los gregos masakraron a los turkos, ansi ke a los djudios konsiderados entanto ke sus aliados. De mismo, los turkos kuando vensaron masakraron a los ombres; ijikos i mujeres fueon deportados para ser vendidos en tanto ke esklavos.
La Masedonia era povlado por gregos, turkos i bulgaros. Saloniki, su kapitala, era governada por los otomanos kuaji durante kuatro siglos. Su populasion en akeos tiempos es evaluada ke 70.000 abitantes,(1) inkluendo un numero signifikante de djudios, formado lo mas por los egzilados iberos, i en parte por romaniotes i emigrados de la Evropa del Este.
La populasion grega de la Masedonia no avia kedado indiferente a la revolta. En Mayo 1821, los abitantes de Khalkhidikia i de la kosta mediteranea, kon una armada de 50.000 soldados avian reushido a dominar por una kurta perioda a la Masedonia i los turkos fueron ovligados de retirarsen a Saloniki para defendersen. Entonses, los gregos avansaron verso esta sivdad. El komandante de Saloniko imobilizo a todos los sivdadinos turkos. Los jjudios de Saloniki, ke no tenian dinguna posibilitad de salvasion en kavzo ke la sivdad seria okupada por los revoltados gregos, se ofrisieron a kombatir en la armada otomana.
Los Turkos desidieron de atakar, porke el enemigo estava kampando no leshos de las paredes de la sivdad i estava menasando a asiejar a Saloniki. Todas las dos partes tenian las mismas razones de aboresersen i de eksterminar el enemigo. La memoria de las salvajerias kometidas en las peripesias presedentes estava ainda biva, provando klaramente ke el vensido no tendra dinguna oportunidad de sovrebivir. Unos kuantos kombates parsiales inisiados por los gregos no fueron provechozos. I kuando la gerra tomo una dimansion jenerala, el dezastro de los gregos fue terrible. Aunke el numero de los gregos depasava el numero de los turkos, estos los dominavan kon sus artileria ke avia kavzado una piedritad imansa entre los gregos. I kuando vino el torno de un kombate kon armas blankas, los Gregos no tenian dinguna posibilidad de venser a la kavaleria turka.
Estos dos faktores fueron la baza de la viktoria de los otomanos. Despues de unas kuantas oras, los gregos derotados abandonaron el kampo de la batalia en retirandosen a Khalkhidikia.
Las piedritades fueron konsiderables en las doz partes. Los turkos no tomaron dingun prizoniero, i despues de aver pursegido el enemigo retornaron en tanto ke viktoriosos a Saloniki. Munchos gregos de Saloniko fueron masakrados i ovligados de abandonar la sivdad. Este evenemento desidio de la suerte de la Masedonia, ke iva kedar turka durante otrun siglo.
Asigun un testigo de esta perioda, el numero de piedritades de kada parte nunka no se supo, porke el komandante de la armada otomana ordeno ainda en el kampo del batalio, de kortar las kavesas de todas las viktimas, para embiar a Estambol sus orejas. Es kon este omaje ke fue anonsada la viktoria otomana. Ansi, los gregos, los turkos i los djudios tomaron parte en este regalo orible, porke todos los kadavros fueron mutilados.(2)
Kon esta viktoria empeso el ravaje del payis. La armada otomana renforsada kon soldados i munisiones freskos kontinuo kon el ayudo de los djudios a atabafar la revolta grega en la Masedonia.
Los kombates en loskualos los djudios partisipieron fueron el objeto de deskripsiones i komentarios por diferentes investigadores:
“… Mas de 2.000 Gregos fueron arestados i imprizonados en la eglisia de St Grigorios Palamas (en Saloniki) , kuando la masa turka i un numero grande de djudios, eksitados por las otoridades turkas, empesaron a sakajar i a akaparar las propriedades gregas kon una ferosidad sin presedente…
… Un masakro salvaje lesho de ser deskrivido (akontesio); los turkos i los djudios ke se adjustaran a eyos, rivalisando entre eyos en el krimen, masakraron el puevlo sin respekto de sekso ni de edad, i otros ke no fueron masakrados en este momento, fueron yevados al Kapan (en Saloniki), onde sus kavesas fueron kortadas…
… Mas de 3,000 gregos fueron masakrados en estos dias…”(3)
“… Bayram Pasha ordeno la supresion de la revolusion en la area, el masakro de los abitantes de kuarenta i dos kazales, la kapturasion de las mujeres i de las kreaturas, el sakeo i el fuego de los kazales. Kuando arivo a Thessaloniki, los djudios se depesharon de akordarle toda la asistensia…
… Bayram Pasha asamblo 30.000 infanteria i 5.000 kavaleria i, segido por una masa de Djudios armados, avanso kontra los insurjados de la area de Vasilika…”(4)
“… La sivdad ermoza (de Vasilika) fue insendiada, kuando el piaje i el masakro empeso. La masa de turkos i akea de djudios se unisaron para kometer aktos de violensa i de krimen de los mas abhoresentes …”(5)
“…En kitando Saloniko para el fronte de Kassandra, Ebu Loumbout mando antes un detashamiento de 3.500 infanteria i de kavaleria para asiejar los insurjados de Athos, kuanto a el, a la kavesera de de 14.000 personas kon kavaleria i kanones, asistados por 500 Djudios armados, kon sus shefe Joseph Perez, akompanyado de los merkaderes Aelion Isaak i Solomon Basaria, ke estavan yevando a sinkuento animales de yugo… (Ebu Loumbout) mando el djudio Perez, en uniforma de ofisie turko para yevar una letra a los insurjados… El dokumento fue meldado delantre de los lideres de la revolta…”(6)
“…munchos djudios, armados i ambreados por sangre kristiano, arastaron a los kristianos ahuera de la sivdad (de Naoussa) aharvando kon palos a sus kavesa i kuando kayiyan, los degoyaron komo vakas…” (7)
“…I aki (en Veroia) los djudios de muevo se komportaron de una manera mizerable, eyos fueron los primeros ke saltaron i sakeyaron, en vaziando los kazales gregos i los monasterios… eran los djudios ke avian tomado la komanda i ke akompaniaron el Pasha en la destruksion, allado de los soldados turkos.”(8)
“Fina ke el Pasha avia aboltado (a Saloniki) avian enforkado en la puerta de la sivdad mas de sesenta personas ke eran embiados komo kaptivos, i esto avia dado a los Djudios la oportunidad de kometer atrosidades, por laskualas este puevlo visioso es de dia en dia mas avido…” (9)
* * *
La Revolta grega trusho la independensia a la nasion grega, despues de kuatro siglos de dominasion otomana. Una seria larga de aktos de krueldad, en loskuales i djudios fueron involvados, marka esta revolta.
Un siglo mas tadre, el tantativo grego para akaparar una partida de la Turkia, se iva terminar por la derota de la armada grega i el dezastro de la populasion grega de la Turkia.
——————————————————————————————————-
(1) Raffenel, M. C. D., Histoire des Evénements de la Grèce, suivie d’une Notice sur Constantinople, (Dondey-Dupré, Paris: 1822), 205.
(2) Ibid., 206-7.
(3) Soulis, G., Thesaloniki en el Empesijo de la Revolusion Grega II (en Grego), 1941-52, 583-9; Pouqueville, Fr., Histoire de la Régénération de la Grèce comprenant le précis des événements depuis 1740 jusqu’en 1824, Paris, 1825, 263; Lascaris, M. Th., La Kestion del Oriente 1800-1923 I (en Grego), Thessaloniki, 1948, 158, 162; Makedonika, Vol. I, 428, ; sitados por John C. Vasdravellis, The Greek Struggle for Independence: The Macedonians in the Revolution of 1821, (Institute for Balkan Studies, Thessaloniki: 1968), 79-80,
(4) Philemon, G., Un Estudio sovre la Revolusion Grega (en Grego), IV, Athens, 1859-1861, 434 (118), sitado por Vasdravellis, op. cit., 84.
(5) Pouqueville, op. cit. 266; Soulis, op. cit., 558, sitados por Vastravellis, ibid, 85.
(6) Vastravellis, ibid., 93.
(7) Ibid., 123-4.
(8) Ibid., 130.
(9) Lascaris, M. Th., Salonique à la Fin du XVIIIème Siècle, d’après les Rapports Consulaires Français, Rapport No.14, sitado por Vastravellis, ibid, 131.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
