eSefarad Noticias del Mundo Sefaradi
Mi
Una shaká kontada por Israel BenyakarOtruna shakaíka de las ke tengo arekojido de akí i de ayá.
Kualas personas son mas kayntes? La djente de Estambol, o los de Edirné?
En un día de luvia dos ombres estavan asperando el otobús en Estambol.
Achakes ke estava aziendo luvia, los kaminos estavan yenos de lodo. En lo ke vino el otobús, les sarpikó todo el lodo del kamino. De punta de pie a kavesa se enlodaron los dos.
El shoför del otobús los vido. En saviendo su kulpa, no se kedó en el estasión i kontinuó su kamino.
Los ombres ke se enbatakaron del lodo, empesaron a insultar a lo ke les vino en la boka.
Dospués el uno disho al otro: “En Edirné, nunka no afita este modo de kozas.”
El otro le demandó: “Kualo afitava si era en Edirné?”
“En Edirné, el shoför abashar abasha del otobús, te demanda pardón, te toma, te yeva a su kaza, te da una tovaja, te enshugua bueno bueno, te da vistimientas limpias, i a komer te da i te arta. A la noche te da su kama para ke te eches, te durmes aya, i el se echa al lado de ti asta la demanyana. I a la demanyana te mete 200 liras en la aldikera.”
“No me kreo!” disho el otro. “Esto todo te afitó a ti?”
-“A mi no… A mi mujer si!”La bivda de un haham tomó a un kasap komo muevo marido. A la noche de la boda, ampesa Shabad. «Mi padre dizía ke un ombre deve absolutamente «onorar» a su mujer noche de Shabad», dize el marido. -«Muy bien», responde la mujer… A la demanyana de Shabad, el marido dize: «Mi madre dizía ke un ombre deve absolutamente onorar a su mujer antes de ir al kal.» -«Muy bien», responde la mujer. Tornando del kal, el marido dize: «Mi papú dizía ke un ombre deve absolutamente onorar a su mujer kuando torna del kal.» -«Muy bien», responde la mujer. A la tadre, el marido dize: «Mi vavá dizía ke un ombre deve absolutamente onorar a su mujer a la salida de Shabad.» -«Muy bien», responde la mujer. Alhad, la mujer se enkontra kon su amiga. «Alora, komo es tu muevo marido?», le demanda su amiga. La mujer responde: «No es tan savio komo ke era el primero, amá ya es de muy buena famiya».
Aldo Sevi
Ramat-Gan, Israel
Fuente: Ladinokomunita
