eSefarad Noticias del Mundo Sefaradi
La Saviduria del Rey Pagano
Menashe suvyo al trono del Estado de Yuda, en la edad de 12 anyos. Su reyno turo 55 anyos, de 698 AE a 643 AE. Akel tyempo, la Asiria avia alkansado al pinaklo de su poder. Kuando Menashe fue rey, suverenos renomados komo Sanherib, Esarhadon i Ashurbanipal reynaron i eyos en la Asiria. I, durante una larga perioda de su reyno, Yuda fue submetido a la Asiria.
Menashe establiso ritos paganes en el Templo. Es posible ke, la Asiria avia impozado el uzo de estos ritos, i ke este komporto fue en mismo tyempo, el rezultado de una gerra interna sanglante.
De otra parte, se save ke Menashe avia fortifiado a Yerushalayim i ke avia nominado komandantes a todas las otras sivdades fortifiadas en Yuda. Lo ke aze pensar ke, muy probablamente, Menashe avia luchado kontra la Asiria.
De otra parte, se kreye ke achakes de averLo indenyado, el Dio avia echo ke la Asiria sea su enemigo, i ke Menashe sea deportado kon kadena. El Livro de los Kronikos adjusta ke Menashe fue deportado por Esarhadon, el Rey de la Asiria. Los Asirianos despues ke lo metieron en una kaldera ancha, avian pozado a esta kaldera ariento de una lumbre. I, Menashe avia implorado el ayudo de los idoles para ke lo salven.
La sufriensa de Menashe fue tan penible, i pormo ke se avia repentido, fue , el Dio ke eskucho sus gritos i ke lo restoro de muevo en tanto ke Rey de Yuda, en Yerushalayim.
La madre de Menashe era la ija del Profeto Yeshayau, i su padre era el Rey Hezkiyau. Hezkiyau, aparte de ser un rey grande, era i un savio grande, ke tenia el vertudo divino de konoser el futuro. Esto fue la kavza, ke supo ke su ijo sera una persona malisioza, ke iva defiar al Dio i destruyir muncha djente. Por esto, se avia desidado si, mizmo komo es el uzo, le sera ordenado de kazarse, de no trayer a esta kreyatura al mundo.
Kuando el Dio lo avia aharvado kon una hazinura muy grava, el Profeto Yeshayau avia vinido allado de su kama. Entonses, Hezkiyau le demando de permeterle de kazarse kon su ija.
Hezkiyau se metio a arogar al Dio en demandando su piadad. El Dio oyo el rogativo de Hezkiyau, i lo salvo de su hazinura. En segito, se kazo kon la ija de Yeshayau, i nasyo Menashe, el Rey futuro de Yuda.
Menashe destruyo el altar en el Templo, i metyo a su lugar un idol de kuatro fachas. De manera ke kada uno ke entrava al Templo, de kuala direksion ke sea, via a una de estas fachas. Avia fraguado otrun idol ke era tan pezgado ke kalia 1.000 personas para yevarlo. Kadal dia se uzava muevos ovreros por esto, porke a la fin del diya de lavoro, los ovreros eran matados.
Menashe kito el nombre del Dio de las Eskriturias, i diskorsos ke se burlavan de la Tora fueron promulgados en publiko. Avia i mismo kometido el insesto en violando a su ermana.
Mas despues, Menashe avia akuzado a Yeshayau de ser un profeto falso, preteniendo ke sus profesias eran kontrarias a la Ley de Moshe. Yeshayau saviendo ke su defensa no iva provechar de dinguna manera, estuvo kayado. Yeshayau fue kondanado a la muerte. Preferando pensar ke su inyeto estava ajisando mas por inyorensa i no por malisia, Yeshayau kijo absolvarlo i a su puevlo de aver vazyado la sangre de un profeto. Por esto, prononsio el nombre sakro del Dio i se troko en un arvole de sedro. Kon el orden de Menashe el arvole fue abatido.
Achakes ke el Rey Menashe avia pozado un idol en este dia en el Templo, es uzo de tomar tanid el 17en dia del mez de Tamuz. La perioda del anyo, empesando de este dia, durante tres semanadas, fina el diya de Tisha beAv, es yamada en Ebreo Ben HaMetzarim – lo ke kere dizir, entre los estrechos. Konosida en tanto ke «Diyas Menguentes», durante esta perioda son komemoradas i otras trajedias ke akontesieron al puevlo djudio:
– Moshe kuando abasho del Monte Sinay, viendo ke el puevlo estava adorando a la Vaka de Oro, echo en basho las Tabelas de las Diez Inkomendensas i las rompyo.
– Los espiones ke fueron mandados para konoser la Tierra Santa aboltaron. Achakes de sus pekados, el Dio deklaro ke no sera permetido a la jenerasion de los Ijos de Israel ke salieron de Ayifto de entrar a la Tierra de Israel.
– Por la primera ves, el sakrifisio de kadal diya en el Primer Templo, ke avia turado durante 890 anyos, kedo achakes de la penuria de kodreros provokada por el siejo de Yerushalayim por la armada de Nabukadnezar.
– Un anyo despues, en 586 AE, la armada de Nabukadnezar empeso a undir las murayas de Yerushalayim i a invaisar la sivdad, i, tres semanas despues, el Primer Bet Amikdash fue destruido el diya de Tisha beAv.
– Apostomus kemo en publiko una Sefer Tora. (Asigun siertas fuentes esto afito antes de la Revolta de Hanuka, i asigun otras fuentes, esto afito durante las persekusiones de Roma)
– La Armada Romana empeso a entrar a Yerushalayim, i, el Segundo Bet Amikdash fue destruido el diya de Tisha beAv, en el anyo 70.
– La populasion djudia de York en la Ingleteria fue enteramente masakrada el dia de Tesha beAv, en el anyo 1190.
– El Papa Gregorio IX ordeno la konfiskasion de todos los manuskriptos del Talmud, en 1239.
– El dia de Tesha beAv en 1290, el Rey Edward ordeno la ekspulsion de todos los Djudios de la Ingleteria.
– En 1391, mas de 4.000 Djudios fueron masakrados en Toledo i en Jean, en Espania.
– En 1492, fue deklarado el Dekreto de la Ekspulsion de los Djudios de Espania, obligandolos a abandonar el payis fina el diya de Tesha beAv.
– En 1559, el Kuartiye Djudio de Prag fue mutinado i kemado.
– En 1939, la Segunda Gerra Mundiala, prekursora del Olokosto, esbrocho en la vispera de Tesha beAv.
– En 1942, en la vispera de Tesha beAv, empeso la deportasion masiva de los Djudios, kuando el primer treno ke yevo a los Djudios del Geto de Varshova, salio en kamino verso Treblinka.
– En 1944, el Geto de Kovno, en la Lituania, fue enteramente likidado kon la deportasion de los Djudios a los kampos de la muerte.
– En 1970, la Libiya ordeno la konfiskasion de tos los bienes de los Djudios.
* * *
El uzo de blasfemar el Templo en pozando ayi idoles paganes fue deklanshado por el Rey Sehlomo renomado por su saviduria. La leyenda rakonta ke, Menashe, ke se komporto de la mizma manera, fue i el un savio. Sovre esto el Sanhedrin eskrive:
«Menashe posedava una konosensya onda de la Tora i era kapache de interpretar el Livro de Levitiko en 55 diferentes maneras. Djustifiava sus aktos en apuntando al komporto korompido de su tyempo.
El Rabino Ashi, avia deklarado una vez, ke el diya de amaniana iva avlar sovre Menashe. En la mizma noche, el Rey avia aparesido al Rabino, en demandandole una kestion sovre la relijion, alakuala Ashi no pudo responder. Entonses, Menashe le revelo la repuesta. Enkantado por la saviduria de Menashe, Ashi le demando deke una persona tan savida avia arogado a los idoles. La repuesta de Menashe fue:
‘Si, i tu avias bivido en mi tyempo, i tu te ivas apanyar a mi fusta, i tu te ivas arastar detras de mi‘».
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
