eSefarad Noticias del Mundo Sefaradi
La Mision de Yona
El Dio avia ordonado a Yona de ir a Ninova i djuzgar su puevlo achakes de sus malisia. Yona no se sumeta a este orden i se embarka en Yafo a una nave ke parte por Tarshish, ke se topa en una direksion opozada a Ninova.
En el kamino, el Dio traye un grande mabul. Los marineros aprovan de evitar la sakana en orasionando a sus dios i en deskargando la ropa de la nave. Yona ke se avia ido a durmir es espertado por el kapitan para ke i el orasiona a su Dio.
Despues los marineros empesan a echar sorte para endevinar por la kulpa de ken d’entre eyos este dezastre avia pudo afitarles. La sorte sale a Yona, i empesan a bushkar kualo puedia ser su kulpa.
Yona les avua ke se estava fuyendo de un mision ke el Dio lo avia kargado, i adjusta ke la sola posibilitad de kalmar el mabul es de echarlo a la mar.
Los marineros en primero aprovan de akostar la nave, ma todos sus esforsos son en vano. En esto, lo echan a Yob a la mar i demandaron del Dio de no konsiderarlos en tanto ke kulpables por este akto, porke era Yob mizmo ke avia dicho ke no avia mas otro remedio para salvarsen.
En supito, el mabul keda. En esto, los marineros ke de muevo se espantan del sanyo del Dio, empesan a azer sakrifisios i djuran prometos.
Yona ke es englutido por un pishkado grande, aze orasiones al Dio de la tripa del pishkado ande se topa. Despues de tres dias, el pishkado gomita a Yona en una kosta.
El Dio yama a Yona una otra vez para demandarle de yevar su mesaje a Ninova, i adjusta ke en 40 diyas, Ninova se ruinera. Esta vez, Yona se siente ovligado de partir a Ninova.
Despues de un diya, Yona ariva a Ninova, i proklama a su puevlo ke la sivdad sera ruinada en 40 diyas. En esto, los moradores de Ninova proklaman un tannit i se visten de dolyo. El rey de Ninova mizmo toma parte en las seremonias de repentenisa, i yama a su puevlo a orasionar al Dio, para ke Se kalma i ke no ruina la sivdad. En segito, el Dio se esvachea de kastigar a Ninova.
Gustave Doré, 1832-1883
Yona, despues ke sale de Ninova, se mete a observar la sivdad para observar lo ke se iva pasar. Portanto, no es kapache de akseptar ke, despues de tanta pena ke avia yevado para egzekutir el ordeno del Dio, ke no akontese nada.
Entretiempo, el Dio aze pujar un arbusto, ande Yona se topa, para azerle solombra, i kalmar su ravyo. Al otro diya, aze ke un lumbrigo se mete a destruir i a sekar el arbusto. I, kuando amanese embia un ayre kaynte i umido a la kavesa de Yona. Yona, en apersiviendo lo ke le avia afitado, se apiada del arbusto i se dezmaya. En segito, demanda del Dio de tomarle su vida.
El Dio se adresa a el:
«Te estas kudyando por una planta, por lakuala no penates, i ke paresyo en una noche i se destruyo en una noche. I, no te importa de Ninova, ke es una sivdad grande de mas de syen i vente mil de moradores, ke no saven apartar sus syedro de sus derecho, i de mizmo kon munchos animales?»
* * *
Yona fue uno de los profetos de la dinastia reala del Reynado de Israel. La leyenda rakonta ke el pishkado ke lo avia englutido, fue ainda kreado en los primeros diyas de la Kreasion del mundo, para ke puede akomplir su mision.
Una de su prinsipales ideas es la kreyensya ke la persona no puede fuirse de la voluntad del Dio. Portanto, la salvasion de Ninova es la prova ke, en kavzo ke la persona se arepiente, el Dio puede pardonar sus pekados. Por esto, el Livro de Yona es meldado en la orasion de despues de midi, el Diya de Kipur.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
