eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Ichizera de En-Dor
Verso la fin del reyno de Shaul, los Pilishtis avian de muevo arekojido sus armadas para gerreyar kontra Israel. Kuando Shaul konstato la grandor de la armada de los Pilishtis, se avia buen karar espantado.
Agora, el Profeto Samuel se avia murido, i no puediendo konsultarlo, Shaul se adreso el mizmo al Dio, ma el Dio no le respondio.
En esto, demando a sus servitores de toparle una mujer ke save komunikar kon los muertos, i ke el la konsultara. Le respondieron:
«En En-Dor esta la mujer ke bushkas».
Shaul se degizo en trokando sus vistidos, tomo doz de sus ayudantes kon el, i a la noche, se hue ande esta mujer:
«Konsulta para mi el espirito divino, i konvoka el ke te demandare».
La mujer respondyo:
«Ya saves todo lo ke izo Shaul, i komo ekstermino a los indivinos i a los ichizeros. I de ke bushkas a mi alma, para ke me matan i a mi?»
Shaul:
«Bendicho ke sea su Nombre! Porke no te afitara dingun mal por esto».
«A ken keres ke lo konvoke?»
«Konvoka a Samuel.»
I, kuando Samuel le aparesio, la mujer echo un grito:
«De ke me enganyates, i no me dishites ke sos Shaul?»
«No t’espantes. Kualo es lo ke vites?»
«Vide a los dios saliendo de la tierra.»
«A kualo paresen?»
«Un viejo aparesio. Esta kuvierto de un manto.»
Shaul avia entendido ke era Samuel. Se prosterno a la tierra i empeso a bendizir.
Samuel avlo a Shaul:
«Deke me deranjates en konvokandome?
Shaul:
«Esto en detresa. Los Pilishtis se metieron en gerra kontra mi, i el Dio se alesho de mi. I, no kijo responderme, ni por los profetos i ni en mis shuenyos. Por esto es ke te yami. Para ke me amostres mi kamino».
Samuel:
«Deke me estas interojando, kuando el Dio te abandono i esta tomando la parte de tu enemigo?
I el Dio te tratara asigun ke avlo de mi boka. I te arankara tu reyno de tus manos, i lo dara a tu yerno David.
Porke no oyites a su boz, i no egzersates su sanyo sovre Amalek. I por esto el Dio te esta aziendo sufrir oy.
I el Dio delivrera a Israel i a ti en las manos de los Pilishtis. I amaniana tu i tus ijos serash kon mi.»
En esto, Shaul se kayo i se espandio en la tierra. Se avia epuvantado de los byervos de Samuel i sus fuersas le estavan mankando porke no avia komido pan diya entero.
La mujer se aserko de Shaul i vido ke estava muy trublado. Le disho:
«Mira komo tu servidora te oyo i endanyo su vida. Ekspozi mi alma porke lo demandates kon tus palavras.
I agora, oye a tu servidora, i permeteme de meter delantre de ti un pedaso de pan, para ke komes i ke tus fuersas te retornen, i ke puedas kaminar».
Shaul refuzo i disho ke no va komer. Ma, sus ayudantes endjuntos kon la mujer lo ovligaron i Shaul los oyo, se alevanto i se asento a la kama. La mujer tenia una vaka godra. La degoyo pishin, i despues apronto kon arina i kon la vaka un pan sin levadura, i lo trusho delantre de Shaul i de sus ayudantes. I eyos lo komieron. Se alevantaron, i se hueron la mizma noche.
* * *
El shizmo entre Shaul i Samuel avia empesado kuando Shaul avia arekojido a su armada para kombatir kontra los Pilishtis ke estavan kampando en Mikmash. Mizmo ke los Pilishtis estavan atakando de vez en kuando a los Israelis, Shaul estava asperando a Samuel para ke de el primer sinyal para empesar la gerra.
Kuando el puevlo se estava aparejando a dispersarse porke Samuel no avia ainda aparesido, Shaul ofresio un olokosto i avanso su armada para el kombate. A la fin de este kombate, los Pilishtis fueron arondjados ahuera del payis de Efrayim. En segito, Samuel avia deklarado ke mizmo viktoriozo, el reyno de Shaul seria de kurta vida.
Es kon la gerra kontra los Amalekites ke el prinsipal konflikto esbrocho entre Shaul i Samuel. Shaul avia salido viktoriozo de esta gerra. Ma, no se avia konformado a la demanda de Samuel de eksterminar kompletamente los Amalekites sin deshar ni una alma biva.
Kon el tyempo, Shaul fue tormentado por el espanto ke David estava komplotando para detronarlo, i por la idea ke el Dio lo avia abandonado.
Kuando David se estava fuyendo de Shaul, avia arivado a Nob, abitado por los pretros. Ayi, Ahimeleh el pretro en kapo le avia dado pan sakro i la espada de Golyat. Kuando Shaul supo a esto, kon su orden, Ahimeleh, los 85 pretros de la sivdad, kon todos los ombres i mujeres, kreaturas i rezin nasidos, vakas, kodreros i aznos fueron masakrados.
Despues de su dialogo kon el espirito de Samuel, Shaul kombatyo korajozamente kontra los Pilishtis en el Monte Gilboa. Ma, los Pilishtis vensieron. Realizando ke no iva pueder salvarse de sus manos, Shaul eskojo de suisidarse en kayendose enriva de su espada. Kon el, i tres de sus ijos periseron en esta gerra.
Shaul, despues ke fue proklamado Rey de Israel por Samuel, avia matado a todos los ichizeros i majisianos para provar su Fey al Dio. Portanto, no pudiendo komunikar mas kon el Dio, porke Samuel no estava en vida, avia demandado la intervansyon de la Ichizera de En-Dor.
Samuel le avia dicho ke en kavzo ke evitara de kombatir los Pilishtis, su vida sera salvada. Ma, en kavzo ke akseptera el verdikto del Dio, sus pekados seran pardonados i se adjustaria a Samuel en el otro mundo.
Despues de su muerte, el Dio avia eksprimido su admirasyon por el akto korajozo de Shaul, ke en saviendo ke se iva murir, se avia ido a la gerra, i mismo avia tomado i a sus ijos kon el, en akseptando el kastigo ordonado.
—————————————–
Gad Nassi
