eSefarad Noticias del Mundo Sefaradi
Hulda i la Restorasyon de la Fey
Kuando fue nomado Rey de Yuda en 640 AE, Yoshiyau era aedado de ocho anyos. Es durante su reyno, ke el Bet Amikdash fue reparado i ke el puevlo se avia unido.
Durante las reparasiones del Bet Amikdash, Hilkiyau, el Kohen Agadol, topo guadrado aryente de sus paredes un livro de Ley. Kuando el Rey lo vido a este livro, ordeno a Hilkiyau de konsultar a Hulda sovre su kontenido:
«Va i demanda a mi nombre i al nombre del puevlo, i del todo el puevlo de Yuda, investiga al sujeto de todo lo ke esta eskrito en este livro. Porke el sanyo del Dio esta enflamado kontra mozotros, porke muestros padres no respektaron lo ke esta eskrito en este Livro«.
Hulda era una desendiente de Yoshua i Rahav. Ambezava la Ley al publiko en una akademia, i era konsiderada kon muncho respekto.
Kuando Hilkiyau le avia demandado de interpretar el livro de Ley ke avian topado, Hulda respondio de la boka del Dio:
«Va dizele a la persona ke te mando para saver lo ke esta eskrito, ke achakes ke se olvidaron de Mi i adoraron a otros dios, va trayer un dezastro a este lugar i a su puevlo. Mandare a ti i a tu puevlo al egzilo, a un puevlo ke nunka tienes konosido. Ma, dize a tu rey, ke porke tu korason se ablando, i arazgates tus vistidos, i yorates delantre de mi, te arekojere a ti en paz en la tomba de tus padres, i tus ojos no veran el dezastro ke trayere en este payis.»
Kuando estas palavras le fueron reportadas, Yoshiyau konvoko una asamblea de todos los savios de Yuda, i se hue kon eyos i los moradores de Yerushalayim a la Kaza del Dio. I delantre de eyos izo meldar todo el livro ke avian topado. I renovelo la Aliansa kon Dio, en engajandose ke todos los Ebreos ivan a observar en sus korasones i en sus almas, a todas las inkomendensas eskritas.
Despues, destruyo a todos los objektos de kulto aparteniendo a los idoles del paganizmo. Masakro a sus pretros, deterro sus guesos de de sus tombas, i los kemo en sus altares en todas las sivdades ande el paganizmo egzistia. A parte de esto, eskondio el Arko de Aliansa, para protejarlo de su desekrasion en el futuro, en la mano del enemigo.
En este mizmo anyo, la fiesta de Pesah se selebro de una manera solanela, sin presedentedel tiempo de los Djuzgos.
I, de este modo avia inchido todas las obligasiones asigun ke la Ley enkomendava.
* * *
El Dio avia eskojido a una mujer para transmeter su mesaje al Rey i al Kohen Agadol. De este modo, la Fey de la nasion ebrea en Dio fue restorada.
Durante el reyno de Yoshiyau, el profeto Yermiyau avia reushido a rapatriar al Norte del payiz, una partida de los diez trivos deportados por la Asiria. Yerushalayim devino de muevo el sentro relijioso dominante, i se engrandesio. Las frontieras del estado se espandieron en el Norte fina las provinsias de la Asiria ke avia empesido a aflakarse.
Yoshiyau reyno mas de 30 anyos. Fue matado en Megido, en la batalia kontra los Ayiftianos ke avian avansado verso el Norte, para ayudar a los Asirianos atakados por Babel.
Lo ke pusho Yoshiyau a kombatir kontra los Ayiftianos, no es klaro. Es muy posible, ke kijo empidir la renovasion del poder de los Asirianos ke avian de antes devastado el Norte del payis.
De toda manera, su ataka kontra la podereza armada ayiftiana es konsiderada en tanto ke un akto de suisido. Su puerpo, burakado por no manko de 300 fleshas, fue yevado en una karosa a Yerushalayim.
Yoshiyau fue, despues del reyno de Shelomo, el uniko monarko ke reyno sovre todos los teritorios de los estados de Yuda i de Israel. Es konsiderado en tanto ke un rey sin igual kon su ovra en la restorasion de la konsiensia relijioza.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
