Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

El sol se avia kedado sovre Givon i la luna sovre Ayalon… 

Kuando los moradores de Givon supieron ke los ebreos enkavesados por Yoshua avian konkistado las sivdades de Yeriho i de Ay, se prezentaron delantre de Yoshua kon pan i vino por regalo, komo si eran los reprezentantes de un pais leshano, i te demandaron de azer un pakto de union kon eyos.

Los ebreos akseptaron estos regalos i todos sus komandantes djuraron al nombre del Dio ke estavan aziendo la paz kon eyos.

Es solo despues ke pasaron tres dias ke los ebreos se rendieron kuento ke estos eran sus vizinos ke se avian infiltrado entre eyos, i ke fueron enganyados.

Aunke todo el puevlo se avia ensanyado, los komandantes no los tokaron porke avian djurado al nombre del Dio de azer la paz kon eyos. I kuando los giveonites fueron atakados por los otros kanaanites, los ebreos kombatieron por Givon. Ma les izieron saver ke devian de servirlos en kontinuando a kortar i a traer el lenyo i a perkurar agua.

Entretiempo, los reyes amorites de Yerushalayim, de Hebron, de Yarmut, de Lakish i de Eglon, ke se avian unidos para atakar a Givon porke los giveonites avian echo paz kon Israel, kamparon al lado de Givon i empesaron la gerra.

Sovre esto, los giveonites mandaron de muevo sus reprezentantes a Yoshua:
«No abandones a tus servidores. Ven para salvarmos, porke los reyes de los amorites ke biven en las montanyas se aliaron entre eyos, kontra mozotros».

Entonses, Yoshua kon su armada abasho de Gilgal verso Givon i el Dio le avlo:
«No t’espantes de eyos, porke Yo los entregi en tus manos. Dinguno d’entre eyos no puedera detenerse delantre de ti».

Yoshua atako los amorites, i el Dio lo izo venser kon un grande masakro en Givon, i Yoshua los persegio en sus retreta en vensendolos i en Akeda i en Makeda. I el Dio estuvo kon Israel en echando a los amorites piedras grandes ke kayeron de las montanyas i ke los mataron munchos mas de los ke los ebreos avian matado. Los sinko reyes ke avian atakado a Israel fueron kaptivados i despues ke sus kavesas fueron kortados, los desharon enkolgados en un arvole fina la tadre.

Un evenemiento eksepsional, testimonyo de la Aliansa del Dio kon Israel, marka este kombate. Yoshua antes de atakar a los amorites, se avia adresado al Dio en implorandandolo de azer kedar el sol sovre Givon, i la luna sovre Ayalon.

I el Dio eskucho a Yoshua. El sol i la luna se kedaron endjuntos en medyo de los sielos un diya entero de mazia, para aklarar la tierra fina ke los ebreos vensen a los amorites. I fina este diya no avia egzistido un diya semejanta en toda la istoria.

***
Yoshua fue el giyo de Israel en la konkista de la Tierra de Kanaan i en su partision entre los Trivos de Israel. La Biblia konta ke el Dio se avia adresado a Yoshua, de la mizma manera ke se avia adresado a Moshe, para kargarle esta mision.

El diya de la gerra kontra los amorites, Yoshua tenia menester de alargar el diya, porke estava knmbatiendo kontra sinko reyes poderozos, i kijo atakar sus armadas kuando estavan en un kampo avierto, para empidir de retirarsen a sus sivdades fortifikadas. Por esto kalia ke la luz del diya kontinue. I demando del Dio de ralantir el tiempo.

Otruna razon posivle es ke este diya era un diya de Viernes, i por esto Yoshua avia demandado de alargar el diya para para terminar el kombate antes de la entrada de Shabat.

Leyendas sovre dias largos egzisten tambien en otras kulturas. El istoriano grego Herodotus konta ke kuando estuvo en Ayifto, remarko ke en los rejistros de un templo era notado un dia ke avia turado el dopio de un dia regular. Un evenemiento semejante egziste en las leyendas de la China, India, los inkas de Peru i los aztekes de Meksiko, de mizmo ke en las leyendas de Babel i Persia.

————————————————————————————————————

Gad Nassi