eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Berberes i Djudyos: un atadijo uniko
Araska a un marokano, toparas un berber. Araska a un berber, toparas un djudio.
—————————-
Djudios koegzistieron kon el puevlo berber kon sus organizasiones komunalas i la libertad de praktikar sus relijion, gozando de una otonomia kompleta. Ansi ke no egzisten konkluziones definitivas sovre el orijinen de los berberes, no egzisten i ni konluziones presizas sovre el orijinen de los djudios berberes. Portanto, se save ke kompartieron rituales i kustumbres relijiosos. Istoria, mitos i leyendas fueron kombinados en formando un imajen fasinante de los atadijos entre los berberes i los djudios de todas las epokas.
—————————————————————————————————————————
Los berberes eran trivos indijenos de la Afrika Norte-Oeste, ke moravan en una zona konosida komo la Kosta de Berberia. Sus kultura es probablamente mas vieja de 4.000 anyos. Kuando el dezierto ke los arodeava empeso a sekarse al deredor del anyo 2.000 AE, los abitantes de las yanuras i las montanyas fueron virtualmente izolados. Estos permanesieron en una forma de agrikulturala simple.
Los primeros estados de la Berberia eran formados de los payises aktuales de Maroko, Aljeria i Tunisia. Avlavan dialektas de la lingua hamitika – konosida i, komo berbera – prinsipalmente el tuareg i la kabila. Los tuaregs eran berberes nomados enkistados a lo largo de los kaminos komersiales del dezierto de Sahara. Otros trivos se avian aresentado serka de la kosta.
Los djudios berberes se okuparon prinsipalmente del komersio i de artizenia. Avia una sorte de intendimiento entre los berberes i los djudios konsernando la okupasion de kada grupo, partikularmente sovre los manaderos de sus mantenimiento, la agrikultura dependindo esensialmente de los berberes.
No teniendo una istoria eskrita, no es posible de evaluar adekuatamente la vida djudia en la sosiedad berbera. La istoria berbera es kompletamente orala. Solo, una sierta informasion eskrita sovre la vida djudia proviene de viajadores ke vijitaron la kordiliera del Atlas.
La lingua djudeo-berbera, aparte de ser lingua de komunikasion, fue tanbien utilizado endjunto kon el ebreo, komo la lingua del ensanyamento de las trdisiones i del aklaramiento i en la traduksyon de los tekstos sakros. Siertas orasiones, komo las bendisiones de la Tora, se dizian en berbero. De mizmo, tekstos biblikos fueron adaptados a esta lingua; egziste tanbien un Agada en berbero transkrivido en letras ebreas. En muestros dias, posiblamente, aparte de unos kuantos djudios berberes de edad avansada ke biven en Israel, no egzisten mas djudios berberofones.
Asigun un resensaminto en Maroko del anyo 1936, tres kuartos de los 161.000 dudios de Maroko eran bilingues en berbero i en arabo, i otros 25.000 eran ekskluzivamente avlantes en berbero.
El numero de los berberes djudaizantes, ansi ke el pursantaje de kos djudios de la Afrika del Norte konvertidos al Islam, no se puede determinar, i esto es un sujeto de dezakordo. En todo kavzo, a lo largo de los siglos, kuaji todos los berberes fueron islamizados. Todo kon esto, nunchos djudios bivieron en las proksimidad de las komunidades berberas, sovre todo en Maroko, i en algunas zonas de la Aljeria i de la Tunisia.
Kronolojia de la prezensia djudia en la Berberia
Puedemos dizir ke la prezensia djudia en el kontinente de Afrika se remonta al sejorno del patriarko Avraham en la fertil delta del Nilus – rekordada en la Biblia entanto payis de Goshen – posiblamente en los anyos 1800-1700 AEK. El klano de Avraham se avia establisido en Ayifto achakes de una sekura ke avia afitado en el payis de Kanaan. Tanbien konosemos ke durante la administrasion de Yosef, ministro de paro, su famiya se avia establisido en Ayifto. Munchos ebreos los avian segido, en primero komo kolones, i despues komo esklavos en el tiempo de los paros gerreadores.
Ekrivanos arabos medievales atribueron la asendensia de los berberes a Goliat el pilishti, i sostenieron sus orijinen kanaanito. La kolonizasion fenisiano de la Afrika, la larga dominasion de Kartago, i la sobrevivensia del puniko, lingua estrechamente relasionado kon el ebreo, sostenieron estas leyendas ke se avian repandido entre los berberes mismos. De mizmo, kuentos similarios se renkontran en los tekstos gregos i latinos i en el Talmud, propajaron la konviksion ke los kanaanites se avian establisido de su propria voluntad, en el Norte de la Afrika.
Kon la partision del reynado ebreo unido en los estados de Israel i de Yuda en 931, los komersantes djudios empesaron a viajar al Oeste a lo largo de la kosta de la Afrika del Norte, kon los navigadores de Tsur i Sidon, ke eran kanaanites – a los kualos los gregos se referaron komo fenisianos.
Las sivdades-estados kanaanites de Utika i Kartago fueron governados por un Soffut – similario al Shofet o Djuez de los ebreos. De mizmo, los mellahes – barrios djudios de Maroko – son el testimonio del aresentamiento de los djudios en el Norte-Este de la Afrika, en tiempos antiguos; i mizmo, antes de la destruksion del Segundo Templo, asigun lo konfirman i las inskripsiones en ebreo en las epitafes de la sivdad romana Volubilis, al Oeste de la sivdad moderna de Fez.
Basho la dominasion ptolomea, 323-321 AEK, los aresentamientos djudios se ekstendieron por el Norte de Afrika. Los djudios trusheron sus konosimentos industriales i komersiales a Aleksandria. Artizanos, komersantes i akademisianos djudios formaron kuaji los 40% de su populasion. Eran organizados en korporasiones kon seksiones profesionales en las sinagogas.
La komunitad djudia de Cirenaica, fue la segunda komunitad importante despues de Aleksandria. Aleksander Magno avia establisido en Cirenaica, 40.000 soldados djudios kon sus famiyas. Cirenaica – ekstendiendo de la aktuala Tobruk a Bengazi en la kosta – kon las sivdades Said i Memfis, al Sude de Aleksandria, i Quersoneso, Cirene, Tolemaida, Arsinoe, i Berenice, en su Oeste, kontinuo a desveloparse entanto ke un importante sentro djudio militar, de komersio i de navigasion basho del Imperio Romano. Akodraremos ke el segundo livro de los Makabeos fue eskrito por Jason de Cirenaica. Esta ovra servio komo una fuente de inspirasion para munchos djudios de la sivdad ke se adjuntaron a la grande revolta kontra Roma en 66.
El Talmud de Babel deskrive la splendor de la Komunitad Djudia de Ayifto i la dimension de su masakro, en segito de la Revolta: «(El Imperor Adriano) masakro en Ayifto sehesentios mil i mas tadre otros seshesientos mil, el doble de los ke avian salido de Ayifto en el tiempo del Egzodo… fin’a ke la sangre koryo en la mar asta Kafrisin«.
Las persekusiones perpetradas por Bizans, ovligaron a los djudios a establisirsen entre los berberes en las rejiones montanyozas i deziertas. Sus fuyida verso el Este, seando blokada, munchos djudios se refujiaron en el Oeste. La mobilizasion de los djudios de Ayifto i de Cirenaica verso la Berberia fue intensifiada por por la ekspulsion de los djudios de Aleksandria por el obispo Siril(*) en 414, i por las rekurrentes ekspulsiones bizantinos a traverso los siglos venideros.
La akseptasion en parte del Djudaismo por los berberes i su ekspanion afito probablamente a la fin del primer siglo. Djusto kon esto, es posible ke se deklansho kon la grande revolta de los djudios kontra Roma, en los anios 66-70, ke avia favorizado los primeros pasos de kontakto entre djudios i berberes.
Durante la epoka romana tadre i en el empesijo del kristianismo, las kreensias relijiozas i sus praktika en la Afrika del Norte, eran en grande parte sinkretistas, kombinando lo mas elementos del djudaismo, kristianismo i del paganismo. El proselitismo djudio, ansi ke kristiano era komun. Asigun el istoriano Ibn Haldun, el prozelitismo djudio tuvo su grande reushitad kon los trivos berberes en las Montanyas Atlas del Magreb Santral – la Aljeria de muestros dias – ansi ke en el Oeste mas leshano.
El istoriador Ibn Haldun konfirme la egzistensia de un gran numero de prozelitos berberes djudios durante la konkesta araba de la Afrika. Aunke la islamizasion de los paizes konkistados, kreensias anteriores no fueron totalmente abolisadas. El kristianismo fue abandonado rapidamente, portanto el djudaismo kontinuo a egzistir. Etnografos i antropologos enkontraron de Tripolitania a Maroko, chikos grupos ke los yamaron «Berberes Djudios«. Estos grupos izolados de djudios bivian en las montanyas de Atlas de la Afrika del Norte asta las ultimas dekadas. En la mayoria de los kavzos, eran mesklados kon el resto de la populasion. Portanto, sus sobrebivensia fin’a muestros dias es un sujeto bastante kontroversial.
Ainda en sus primeros pasos, Fez se avia konvertido en 808, en un importante sentro de la kultura djudia. En Kairuan i la Provinsia de Ifrikiya – Tunisia i Libya – erederos de la antigua sivilizasion kartageneza-semita, los djudios, renforsados por numerozos refujiados de Ayifto i de la Palestina. Estos, kon la suvida al poder de la Dinastia Fatimi en 909, gozaron de una vida permanante de developamiento avansado. En efeto, los enemigos de la mueva dinastia afirmaron ke tenia muncha sangre djudia en sus venas. Durante el siglo X, la sivdad de Kairuan, glorifikada por los arbos entanto ke una de las kuatro puertas del Paradiso, akojo una grande i prospera komunitad djudia, ke en serko tiempo se sintio bastantamente poderoza para desbarasarse del tutelaje de las akademias orientales.
* * *
El aktivismo del «Movimiento de Kultura Berbera/Amazig» tiene una perspektiva djudia/israeli. Munchos aktivistos bereberes ekspresaron aviertamente sus admirasion por el Sionismo, en konsiderasion por el renasimiento de una lingua nasionala i la afirmasion de los diritos etnikos nasionales konfrontando un mundo arabo intolerente. Militantes berberes vieron en el nasionalismo arabo-islamiko, el ethos dominante de la totalidad de los payizes del Magreb, ansi ke la fuente de munchos problemos de sus komunitad. Munchas vezes se kesharon ke sus governos investian una enorme kuantidad de sus fuentes por la kavza palestiniana, al ekspenso de las nesesitades reales de sus sosietad. En una sivdad en el Sud-Este de Maroko, un karnaval anual, fue transformado por la juventud en una demonstrasion de aktivismo i militarismo berbero, rejektando el diskurso islamisto, i identifiandose konla kultura berbera inkluido Israel.
Egziste una dicha: «Araska un marokano, toparas un berber«. A esto se puede adjustar: «Araska a un berber, toparas un djudio«.
———————————————————
(*) Siril de Aleksandria (c. 376 – 444) fue el Patriarko de Aleksandria de 412 a 444. Es konosido por su rolo en la ekspulsion de los djudios de Aleksandria, i el asasinato de la filozofa grega Ipatia (Hypatia).
—————————————–
Gad Nassi
