Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

El Onor de la Viktorya 

Yoshua no avia konkistado kompletamente el payiz de Kanaan. Enklavos kanaanites kontinuaron a egzistir en el interior i partikularmente en el Norte del payiz. Los kanaanites eran aresentados en sivdades, kada una governada asigun un sistem de estado independente. Sus armada era ekipada kon karosas, ke los Israelis no tenian. I, esto les akordava el avantaje del kontrolo de los pasajes en las valeyas de Yizrael i de Bet-Shean.

En el «Livro de los Djuzgos» es reportada la gerra de Israel kontra los kanaanites. Esta gerra es en mizmo tyempo la ultima gerra kontra los kanaanites, sitada en la Biblia. En akel tyempo, el rey de los kanaanites se yamava Yabin, i Sisera era su komandante en kapo.

Dvora era djuzga de Israel, i asigun el uzo de la epoka, era i el lider del puevlo. Entonses, avia invito a Barak a komandar la armada djudiya para kombatir kontra los kanaanites:
«Es el Dio ke telo esta demandando!»
Barak:
«Si es ansina, ven kon mi.»
Dvora:
«Bueno, te akompanyare! Ma, save ke peryeras el onor de la viktorya».

La armada djudia, ke se avia asamblado en el Monte Tabor era muncho mas chika en numero de la armada del enemigo. Sisera de su parte avia arekojido una armada muncho mas grande, ke era enforsada kon 900 karosas kon aksesorias de fierro.

Dvora se avia adresado a Barak, antes del kombato:
«Alevantate! Es en este diya ke el Dio entrego a Sisera en tus manos. En efeto, el Dio esta delantre de tu armada.» 

Barak abasho kon su armada del Monte Tabor kon diez mil gerreadores i atako la armada de Sisera. En este momento el Dio izo kayer de los sielos un mabul de luvya. El Rio Kishon se debordo i el kampo del kombate se troko en lodo. Las karosas del enemigo se undieron en el lodo sin pueder avansar i azer manovras, i los soldados kanaanites se alborotaron, i fueron vensidos.

Sisera abasho de su karosa, ke no estava puediendo avansar, i se fuyo koryendo kon sus ultimas fuersas fina ke arivo al kampaniento de los kenites. Ayi, Yael lo apersivio i lo invito a su tienda:
«Ven ande mi. No te espantes!»

Sisera entro a la tienda. Yael lo izo espandir i lo kuvijo kon un tapet.

Sisera:
«Dame por favor, un poko de agua para bever. Porke tengo ser.»

Yael avrio un kuero yeno de leche, i le dyo a bever.

Sisera:
«Metete a la entrada de la tienda. I, si te demandan si ay alguno en la tienda, responde ke no.»
Kuando Sisera estava echado en basho medyo dezmayado de kanserya, Yael tomo un klavo de tienda i lo enklavo en bateandolo kon un balyoz en el lado de su kavesa, fina ke la despedaso.
Kuando Yael salio ahuera de la tienda, vido a Barak ke estava segiendo a Sisera. Le grito:
«Ven aki. Te va amostrarte la persona ke estas bushkando.»

I, kuando Barak entro al tiendo, lo topo a Sisera echado muerte en basho, kon un klavo en su kavesa.

* * *
Asigun el uzo de akeos tyempos, un ombre se puedia kazar kon unas kuantas mujeres, ke kada una morava separamente en su tienda. Yael era kazada kon Heber, desendiente de Yetro, ke fue el eshuegro de Moshe. Apartenia a una famiya nomada ke se mantenia del lavoro del metal para abasteser arma i ustansiles de agrikultura. I, no se save egzaktamente si tenia atadijos de paryentez direkta kon los israelis.
La leyenda no komenta la razon por lakuala Yael avia matado a Sisera. Portanto, los djudyos la konsideran kon Dvora, en tanto ke una eroina ke los avia salvado de la opresion kanaanita.

Esta gerra fue inisiada por Dvora, la unika mujer djuzga mensionada en el «Livro de los Djuzgos». Dvora es i konsiderada en tanto ke una profetesa. No se save alkual trivo avia apartenio egzaktamente, i no, el lugar ande morava.

Mizmo ke Barak era un komandante valutozo, no tuvo el odasio de atakar a los kanaanites, i Dvora avia intervenido i avia desidado de la stratejia de la batalia.

Kuando Barak abasho kon su armada del Monte Tabor para atakar a los Kanaanites, Sisera puedia venserlo fasilamente kon su armada poderoza. Portanto, Dvora kon una chika armada lo avia atirado a Taanah, ande las karosas de Sisera se inondaron.

La Biblia relata esta gerra en referandose a la «Poema de Dvora», uzada por eya para enkorajar la armada djudiya. Asigun esta poema, esta fue una gerra de volontarios, i el onor de su viktoria apartenio a doz mujeres, Dvora i Yael.

Los investigatores no pudieron determinar la data egzakta de la konkesta de Kanaan por los israelis. Es posible ke avia akontesido entre los anyos 1200 – 1125 AE. De mizmo, no se pudo lokalizar klaramante el lugar ande este kombate se avia derulado.

Kon esta viktorya empeso el deklino de los kanaanites, i los israelis prosperaron durante 40 anyos.

—————————————–

Gad Nassi