eSefarad Noticias del Mundo Sefaradi
El enigmo de MALKITZEDEK…
La aparision kon su disparision subita de Malkitzedek, en el Livro de Bereshit, fue el sujeto de komentarios sin ke estos abutisen a una eksplikasion desiziva.
Asigun la Biblia, despues ke Avram avia derotado los kuatro reyes ke avian kapturado su sovrino, Lot, Malkitzedek, Rey de Salem – Yerushalayim – avia aparesido en trayendo pan i vino a Avram i a sus servidores kansados. Lo avia bendizido, al nombre de El Elyon – El Supremo – en alavando al Dio por aver akordado la viktoria a Avram. La Biblia adjusta ke Avram «le avia dado el diezmo de todo ke avia arekojido«.
Esta epizoda fue konsiderada komo la prova ke Malkitzedek fue un kreyente en el Dio verdadero, de mizmo ke fue su saserdote de un rango mas elevado ke Avram; ansi ke, komo la manifestasion de la egzistensia de un otro puevlo, aparte de Avram, ke se kreyiya en el Dio uniko i verdadero i ke Lo servia.
El nombre MalkiTzedek, es formado de dos biervos. Malki, ke kere dizir «Mi Rey»; i Tzedek, ke kere dizir «Djusto, Verdadero». En el Salmo de David, 110:4 paresen estos versos: «Dio djuro / i no se repentira / Soz el pretro por siempre / en la manera de Malkitzedek«. Malkitzdek mensionado aki i Malkitzedek en el Livro Bereshit, son probablamente las mismas personas. Malkitzedek fue i konsiderado ser uno de los kuatro prekursores del Mashiah, notados en el Livro de Zeharya.
Asigun el Midrash, Malkitzedek es asosiado a Shem, el ijo de Noah. Shem, seando konsiderado entanto ke un pretro ke parese antisipar a Moshe i Aron. Atributos mesianikos de Malkitzedek son de mizmo elaborados en varios versiones del Livro de Enoh. Asigun estas fuentes, Malkitzedek es el ijo de Nir, ermano de Noah. Es trayido al sielo i deviene el kapo de una linyeza de saserdotes ke giyan a los dias mesianikos.
Malkitzedek es tambien mensionado en un manuskripto deskuvrido en Kumran. En esta fuente, Malkitzedek parese pronunsiar en el sielo, una sentensia sovre Belial – el Diavlo – i su djente. En segito i imediatamente, akontese el «Dia del Masakro», profetizado por Yeshayau. Asigun se puede entender de esto, Malkitzedek parese ser el djuezgo i el egzekutor i, konsiderando la doktrina dualista de la Sekta de Kumran, reprezenta el Andjelo de la Luz, ke trayera la salvasion.
Esta perspektiva oriento a siertos komentadores a konsiderar a Malkitzedek, en el konteksto del Kristianismo, de ser el prototipo del Mashiah, i el devansor del Kristo.
Malkitzedek no tuvo predesesor, i no suksesor en su saserdosio, ni nasionalidad i ni desendendensia, revelados en las Eskriturias. Portanto, es konsiderado komo una figura ke instruyo la Tora a Avram, i ke el Dio otorgo a Avram la desendensia de Malkitzedek, en bendiziendolo para ke tenga prosperidad.
———————————————————————
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
