LA KULTURA DE PLAJ EN MUESTRA CHIKES por Dora NİYEGO

Kuando era chika, kuando mos ivamos a la plaj, la primera koza ke aziyamos era espandir las tovajas grandes en la arena. La krema, protektor solar, no era un problem de salud komo lo es oy, ma era un ayudante ke se utilizava para bronzearmos. Siertos protektores solar se aparejavan kon metodes mas naturales: las madres aparejavan una meskla de karota kon azete de oliva. Metiyamos estas azetes a muestro puerpos.

En muestra chikes, el tyempo ke pasavamos en la plaj era yeno de aktividades. Pasar oras en la mar, djugar al waterpolo o al voleybol, konstruir palasyos i pontes de arena eran los pasatyempos los mas komunes. Las largas konversasyones kon amigas eran esensiales en akeya epoka.

Mos kreiyamos ke si mos kemavamos del sol en enverano, no mos aziyamos grip en invyerno. El sol mos dava rezistensia kontra las hazinuras. Akeyos dyas, dingunos no konosiya los efektos de la vitamina D. Todos repetavan la dicha transmetida de muestros antepasados: «Si el sol no entra a una kaza, entra el mediko». Esta dicha rezumava los benefisios del sol para la salud. Ma, kada koza ke es demaziya, se eskapa negro. Kuando pedriyamos el kontrol i djugavamos voleybol durante oras, o eramos embabukados en un livro o una konversasyon enteresante, mos kemavamos el kuero. Esta kemadura era muy doloroza. Muestra madre mos metiya yogurt ensima las kemaduras. La freskor del yogurt mos kalmava la dolor.

En muestra jenerasyon, dingunos se izo kanser de kuero de la ekspozision al sol. Si el sol fuera un peligro komo oy mos estan dizyendo, una jenerasion entera se iva azer kanser.

Akeyos diyas de plaj, kuando el sol estava en su punto el mas fuerte, mos ivamos a la solombra, i mos asentavamos en las siyas de estera. Komiyamos los sandwiches de tomat i kezo ke trayiyamos de kaza, kortavamos el karpuz, i duspues mos repozavamos un poko. La savor de este eshuenyo era muy diferente ke de durmir en un lugar kon ayre kondisyonado. Durmir kon la boz del ayre, la boz de las olas, i la golor de la mar no se puede topar oy. Kuando el ayre de la tadre arefreskava, entravamos de muevo a la mar, i kedavamos en la mar asta la echadura del sol. Akeyos diyas el sol no mos espantava, al kontraryo mos manteniya kon su enerjiya.

La kultura de plaj de muestra chikes era una eksperiensya simple i íntima. Esta kultura era mas serkana a la natura i aleshada de los instrumentos teknolojikos. Lo viyamos al sol komo un amigo. La kultura de plaj de oy es formada kon datos sientífikos. Esta kultura ve el sol komo una menasa, i kontyene mas planifikasyon i konsomasyon.