eSefarad Noticias del Mundo Sefaradi
Keridos amigos i amigas
El Jewish News de esta semana tiene el artikolo de Eytan Uliel ke trata de la komunidad Judia de Cuba.Tiene su enkanto por el fakto ke muy poko fue kambiado por dékadas en la Capital Havana, kaza para los Judios por mas de 500 anyos.Se deskuvre ke la komunidad guadro su identidad.
Saludes a todos
——————————————————————————-
LA KOMUNIDAD JUDIA ISTORIKA DE CUBA
En mi primera vijita de antes ize lo ke los turistas azen, suviendo en karros viejos, beviendo mojitos (koktel de menta), kaminando en la Havana Vieja i bailando la salsa asta la manyana. Me dechize esta vez de bushkar la Comunidad Djudia local. El primer djudio yego a Cuba en barko de Espanya en 1492, fuyendo de la inkizisión. En los próksimos 400 anyos uvo una prezensia chika de djudios. En el sieklo 20 el numero se suvió i emprimero vinieron de Turkia a la kaída del Imperio Otomano. Despues vinieron de la Evropa del Este. Lo mas de los Judios vinieron entre 1920 asta 1950. Avian 25.000 i munchos laboravan en la industria de vestidos. Unos se izieron profesionales de influensia i unas famiyas se izieron muy rikas del komersio de tabako. La vida djudia Cubana era sentrada en Havana ande avían sinko sinagogas i unas institusiones komo las butikas de karne de Kasher, eskolas ebreas, la Hevra Kadisha i sitios de la komunidad i djurnales.
Kuando el rejime kommunista entro en poder en 1959 la mayoría de los djudios se fueron a Los Estados Unidos i Israel. Se kedaron apenas 1000 djudios. Oy en Cuba ay tres sinagogas, una Sefardita, una Ashkenazi i una Miksta. Las tres estan situadas en Havana. No tienen un Rabino i Habad es defendido por el rejime. La komunidad se dirije de si. En las fiestas viene un rav de Chile. Antes de yegar aki topi en el internet el «Turismo Djudaico» ke es un servisio de Paola de Argentina. Eya me introdusio a Rene komo gía. Mos fuimos en primero a la Sinagoga de los Sefaradim i al sentro komunitario. Esperava ver algo viejo i istorio kon un poko del espanyol. Topi una kaza kuadrada i konstruida en 1955, tenia el aire frío i monotono. La sola koza djudia era el Magen David i unas letras en ebreo en la puerta. En las paredes avían fotos de kasamiento, Bar Mitzva i unos evenimientos del sieklo pasado. Mayra Levy, Prezidente del sentro me esperava i avlimos por 20 minutos sovre la istoria djudia Cubana. Los djudios eran respektados aki i no avia antisemitismo.
No tenian menester de guardia komo en otros paises.
En la Havana Vieja ay un Memorial del Olokosto en el Parke, indo de ayi al Hotel Raquel, tiene una fachada magnifika kon la Mezuza en la puerta. Al interior ay un chandelier de oro i kolumnas de mármol. Del suelo al techo ay pinturas murales de shenas de la Biblia Antigua i Mezuzot en kada puerta. Kada sala tiene el nombre de uno de la Biblia Antigua. Este otel se avrio en 2003 i apartiene a la autoridad del turismo. Un tributo a la kultura ebrea. Mismo si la komunidad djudia es chika i izolada, kortada del mundo por 60 anyos, los djudios mantienen sus identidades komo kubanos i djudios.
Trezladado por Shimon Geron.- Sydney
Fuente: Ladinokomunita
