eSefarad Noticias del Mundo Sefaradi
Keridos amigos i amigas.
En el Jewish News de esta semana «Yossi Aron» presenta la istoria de los Judios del Yemen.
Viendo asta ke punto se avla oy de los asaltos en drones i en misiles a los vapores en la Mar Kolorada, komo una provokasion a Israel por la Gerra kontra Hamas en Gaza, vimos ke los HUSSIS se desidieron de aharvar a kada vapor indo a Israel i viniendo de ayi, en la Mar Kolorada. Ansi Yossi se desidio de avlar de una istoria de 2000 anyos.
En Yemen oy la Komunidad Judia no existe porke esta dispersada en Israel i otras partes del mundo. «Zechriah en 9.14» disho ke en tiempo del Mashia, el Dio Senior chuflara el Shofar i ke viendran los vientos de tempestad a TEIMAN/Yemen. «La palavra Teiman sinyifika Sud». Esto se kanta en Rosh a Shana en referensia a la aparision del Dio en la Era Mesianika en medio de tempestadas traidas por Antiochus o Edom. Kon esto dicho no ay duda ke avia una relasion entre Yemen i Israel en la kosta entre los 2 paises. En la Era Post Biblika avia una asosiasion entre la Reina Sheba i el Rey Herod i su armada ande se kedaron unos en Yemen despues de una expedision. Ay refensias de eyos ke se va asta la yegada de Mohamed.en 500CE. La parte de Himyar su reinador i tribu fueron konvertidos al Judaismo tomandolo kon el.
Los komersantes de Ejipto indo a la India pasavan por el Yemen kreando una Komunidad Judia.Desde el Siglo 11 las komunidades fueron dispersadas en varios lugares kon sus raizes de siglos. La Komunidad de Sanaa arekojia fondos para soportar las Yeshivot Geonikas. Las orasiones venian de la Akademia de Babilonia en manera de «Yekum Purkan» en Shabat i la mas famosa era la Letra de Rambam «Iggeret». El prolifiko istoriano «Avraham Yaari» ke arekojia Dokumentos Medievales termino ser una fuente rika tratando de la persekusion i de konversiones forsadas ke tomavan lugar en su tiempo. Aki se avla de los Judios del Yemen i de Aden. eskrito en Jerusalem. Se pensa ke eran pretos i ke no tenian el Talmud i ke se bazavan sovre La Ley Oral. Sin duda estavan en posesion de la Halaha i del Estudio de la Kabala.
Malorozamente estas komunidades dispersadas tuvieron unas diferensias entre eyas i la problema se presento kon la Konkista de los Otomanos de Sanaa en 1546. 3 dekadas despues Suleiman entro en Jerusalem i el problem no se fue asta la fin de la komunidad.ke avia sovrebivido por 2 milenios. Desde el Siglo 13 tenian viziones Mesianikas i vinieron unos Mashias falsos komo Sabetay Sevi en tiempo de provresa i de la estatua basha de los Judios. Tuvieron ke pagar el Dhimmi komo taxa para ser protejados i tolerados.
Kon los Judios de Evropa indo en Aliya a Israel en el Siglo 19, tenian en Jerusalem 2500 del Yemen afuera de la sivdad vieja en Shiloach. Despues kon la gerra vinieron en masa los imigrantes indo a los Moshavim i tenian 28.000 de mas en Palestina. En 1951 kon la assistensia de la «Operacion Magic Carpet» trusheron a los 50.000 ke se avian kedado ayi. Ansi una komunidad ke existio en este pais desde 2000 anyos estava perdida. Sus tradisiones siendo mantenidas en otros lugares.
Los Yemenites me akodran del anyo 1951 kuando estava en un Kibuts en Norte de israel en Galil Ha Elyon. Avia una sivdad chika serka de la frontiera kon Libano ande bivian los Yemenites en las MAABAROT/barakas. Eran tan atrasados ke no savian lo ke era un espejo. En 1961 kuando el vapor S/S Oronsay partio de Napoli para yevarnos a la Australia, pasimos por Port-Said, Aden i Colombo, viendo lo ke era el Yemen. Nunka pensi ke un dia del Yemen ivan a deklarar la gerra kontra Israel i ke el Ejipto iva medietar entre Hamas i israel. despues de 74 anyos de i viaje.
SALUDES A TODOS.
Tradusido por Shimon Geron de Sydney
Fuente: Ladinokomunita
