eSefarad Noticias del Mundo Sefaradi
El Katar komo siertos lo pensan, no es el amigo de Los Estados Unidos, al kontraryo es su inimogo djusto komo es el inimigo de los payizes arabos amigos de los amerikanos, del puevlo djudyo i de Israel su estado. El katar no solo es un inimigo politiko ma es un inimigo de las sivilizasyones oksidantalas i ke kon korrupsyon merka siertos politikos del mundo libero, infekta las akademiyas, las medyas i el spor. Esto ya basta para ke el komporto enverso de el troke en la shena mondiala.
Ya vino la fin del djugo de dos karikas, de dar a komer para ganar partizanos, de merkar politikos para reboltonear el Medyo Oriente. Este Katar, chiko reynado dirijado por un sheyh ke kon su rikeza bazada sovre los idrokarbones, posedando trilyones de dólares radikaliza los muzulmanos i korrupta el mundo.
Kero adjustar i dizir ke el rezultado del atako por Israel a Doha la kapitala del payiz, para matar los dirijentes del Hamas en sus ofisinas no se finalizo. No se save dainda kuantos disparesyeron i si mizmo no desparesyeron este akto ya abasto para azer deskuvrir ke dezde muncho tiempo el Katar es el sponsor del terror i ke devra ser tratado en konsekuensa por el mundo sivilizado.
Mas chiko del Liechtenstein la península del Katar tiene kaji 3 milyones de moradores donde el 90% son lavorantes ajenos. Se estima a 300 mil abitantes la kantidad de los oroktones kataris koza ke se asemeja a la povlasyon de una muy chika sivdad en el oriente. Viene kuryozo komo el sheyh de esta povlasyon chika se estima ser el patron del islam i deklara la gerra al Ayifto payiz de mas de 100 milyones de moradores i líder verdadero del mundo muzulmano. Kon ramayud los dirijentes kataris tomaron 137 miliones de dólares de la kasha del estado i krearon un kanal de televizyon ke yamaron al Jazeera i lo empleyaron para atakar el governo ejipsyano i Israel.
Ademas el mundo jurnalistiko al empesijo le paresyo ke este kanal va ser la boz de la demokrasiya en el mundo arabo. La realita fue todo el kontraryo, ni demokrasiya, ni libertad de prensa, ni transmisiónes verdaderas se ve en eya. El kanal es dirijado por jurnalistos ke sus butos es de krear kaos i nada mas. Deke sembrar kaos? Munchos son los ke se demandan kualo el Katar gana de este djugo? La repuesta es ke los kataris son vanos i el seyh ke los enkavesa es muncho mas. El gana sin azer dingun esforso, un kuarto de trilyon de dólares del produkto bruto ke resive de las kompaniyas ke le apartienen. Kon esto kere merkar ‘prestijyo’ para si i su payiz.
En dando a komer 150 milyones de dólares el fue kapache sin ser elijivle de organizar la kopa mundial del futbol en su payiz, evento por el kual el Emirad investisyo milyones de dolares en stadyomes i moradas ke lo ke servieron muy poko. Ma lo ke el Katar finansa lo mas es el aktivizmo muzulmano en diferentes partes del mundo. Katar dyo apoyo a al-Qaeda en Irak, al-Nusra en Siriya i al Hamas en Gaza. Es serkano del rejimen de los Ayetollahes en Iran i es el arkitekto finansyaro de las matansinas del 7 Octobre 2023. Malgrado todos estos aktos el Katar pretende ser amigo del Oksidente i mizmo frekuenta Israel. En los anyos pasados se apatrono de klubes renomados de futbol en Evropa i alikodeyo la baza militar amerikana una de las mas grandes del mundo onde se topan 11 mil soldados amerikanos i 120 avyones militar de la sinkena jenerasyon.
No se save a lo djusto si los Estados Unidos fueron informados del atako de Doha por Israel o semplemente si las 2 partidas endjuntos kon los inglezes eran de akordo de dar una leson al Emirad para ke troke su politika, todo esto esta por las oras aliskuro. El Katar ay anyos ke ovra kon falsedad en deklarando ke el es notral entre la lucha de las sivilizasyones oksidentalas i el djihadizmo. Mintiras, porke mizmo el Ayifto deklaro ke el Katar finansa Los Ermanos Muzulmanos al interno del payiz los kualos son inimigos del pueder del prezidente Sissi. Basta oyer al-Jazeera ke aze la propaganda kontra el governo Ejipsyano akuzandolo de ser el inimigo del islam.
Este mizmo kanal no se arresta en su inimista kontra los djudyos en Los Estados Unidos, en dando dia i noche novelas antisemitas. Ademas el Katar da apoyo al Hamas en su propaganda mondiala kontra Israel, onde milyones se gastan a este sujeto. Psikolojikamente el Katar fue viktima de azerse en un supito muy riko, topandose en un sindrom de abodansia komo akel dezmazalado ke gana la grande loteria i ke no se keda de azer torpedades. Pekado sovre los 400 milyones de arabos ke se topan en un estado de povredad los kualos grasias a los petro dollares del Katar puediyan avansar a tener una mijor vida. El Katar al lugar de ayudar al puevlo arabo prefero gastar su fortuna en ekstravaganzas tal la Kupa del Mundo de futbol, de merkar kon vanedad en Londres i en Paris los oteles los mas famozos, ekipos de futbol evropeos, en dando donos a la akedemiya amerikana para ke krean inimista kontra los djudyos i mas. Ya vino el tiempo ke Los Estados Unidos, la Evropa i los payizes arabos amigos del oksidente miren a forsar los kataris a trokar de politika fondamentalista islamista porke si no sera pekado de ver probavlamente su fin despues de 54 anyos de independensya.
Dr. Selim Salti
