eSefarad Noticias del Mundo Sefaradi
Buenos dias i alegres a todos.
La semana pasada, nombrimos; ganeden bueno tenga a el kerido “Moti Adanali”
El renkontro miyo kon el fue; achakes la boda de mi ija. Moti era un buen gitaristo tambien un famoso kantador. Morava en Bat Yam en akeos anyos.
Me fui a vijitarlo. I le di a entender mis penserios sovre los kantes ke nesesitamos.
Me sintio, i se alegro, por la razon ke me apliki kon el.
El me enpeso a kontar de sus problemas, entre las sus problemas me konsinti; ke el teniya dezeo de apartarse de el grupo. Pensava de lavorar solo en shena.
La verdad, Pianist Shantor, era una koza nueva. (sigun mi poka experiencia, estava seguro ke el pudia reushir en esta brancha) Ansi le di koraje, ke sera bien adelantar kon su penserio.
Moti, se fue se merko Organ i ekipmiento para recordar kantes. De una vanda se estava anbezando tanger en el organ, i en el mizmo tiempo estávamos, adelantando kon los kantes…
Moti se asentava i aparejava uno de los kantes, me yamava ami, mos asentavamos a korijar i acuntar lo ke no mos gustava…. Asta ke arrivavamos a un estado optimal de el kante.
Los kantes no eran difisil para-Moti. La problema ere; aparejar la kantika, en una manera; ke los jugadores amatores, la puederan kantar.
En shena, uzimos (Playback). Kijo dizir; ke la muzika i el kante se apareja de antes, el artisto o la artista, durante de las provas se anbeza a kantar kon el playback encuntos. Despues de tantas provas; es difisil para la cente, entender si el artisto kanta kon su boz o ke uza una kantika rekordada de antes. La kolaborasion kontuneo serka de sej mezes. Asta ke aparejimos 7 kantes para la piesa. Grasias a el kerido Robert (Moti) Adanali. Su alma repoze en ganeden.
Al vermos saludozos.
(A kontunear.)
Albert Anah.
Fuente: BÜLTEN de los Turkanos de Israel – turkisrael.org.il
