LA DISPERSIÓN SEFARDÍ POR EL MUNDO por María José Arévalo Gutiérrez

Algunos eskritores modernos afirman ke se murió la Sivilizasión judeo-espanyola.

Argumentan ke los sefardís fueron englobados por los países ke les ofresieron azilo, otros se desparesieron en la Shoa i los ke kedaron fueron englutidos despues de la kreasión del Estado israelí. Ma estos ilustres literatos pasan en silensio el grande número de desendientes ke egzisten en el Sefarad aktual, ke se deklaran kristianos deskonsientes de sus orijines. 

Las komunidades sefardís se repartieron por diversos puntos de la planeta. Egzisten komunidades judías en la Turkía ke nunka pizaron tierra espanyola. Constantinopla se izó la segunda Roma asta ke fue tomada por los turkos. Esperando de topar una mijor vida basho el dominio musulmano, se trasladaron romaniotes, gregos i ashkenazis a Estambol. 

Salónika fue una de las sivdades ke tuvo una amplifikasión de su povlasión, i lo mismo akontesió en Drama, Saray, Venezia, Ljubliana, Zagreb, Belgrado, Nis, Sofía, Edirne asta Estambol. Todas eyas sufrieron una okupasión, ma mos mankan datos de fuentes siguras ke esklareskan kon egzaktitud las instalasiones de las komunidades. 

Isak Abravanel asegura ke yegaron a Estambol aproksimamente 15,000 judeo-espanyoles. Es imposivle de kuantifikar una emigrasión tan variada i anarshika. De ser una sivdad kon prezensia judía kaji simbólika, se transformo en la sivdad kon la mas grande prezensia judía. El país eléniko prezenta un panorama diferente, siendo ke las grandes komunidades ke egzisten despues de la diáspora son kaji inegzistentes antes. Los sovrebivientes de la Shoah desidaron de tomar el kamino de Israel o los Estados Unidos, kuando desparesió la grande komunidad de Salónika.

Los sefardís rezidentes en Yugoslavia se estimavan serka de 100,000 miembros verso el anyo 1920. Despues ke la komunidad sufrió una eksterminasión aproksimada de 70.000 almas, komo en el kavzo de Salónika, los sovrebivientes emigraron a Israel o los Estados Unidos. Las komunidades establesidas en Bulgaria o Rumania sufrieron kavzos asemejantes padecieron. 

La diminusión de la povlasión desplasada del Norte de Áfrika no se devió orozamente a la persekusión i eksterminasión nazi. Verso el anyo 1950 la povlasión kontava serka de los 300,000, abashando este número de abitantes en el anyo 1975 a unos 20,000 miembros. El motivo de esto fue la independensia de Marroko. Israel i los Estados Unidos resivieron una grande avalansha de judíos desde el 1900 – 1920 serka de 100,000 sefardís. La mayoría perdieron los konosimientos del lenguaje ladino komo lingua propia por efekto de la amerikanizasión, aunke en sus liturjia i orasiones guadraron el rituel sefardí. 

La povlasión sefardí en Amérika Latina  se organiza  en un mozaiko de grupos eterojenos, con tradisiones kulturales diferentes i divizadas entre markas komunitarias separadas dependiendo de los países de orijin. Otro aspekto muy importante ke kale tener en kuento para entender la problemátika espesifika ke egziste, es bazada en la diferensia entre las markas polítikas i sosiales en los diferentes países iberoamerikanos. La Evropa oksidental demostra una situasión desnivelada. Todas las komunidades sufrieron basho la dominasión del III Reich, kon konsekuensias direktas komo fue la diminusión de sus povlasión, donde solo la Italia i la Ingletierra konservan oy en día una komunidad importante.

María José Arévalo Gutiérrez
Mayo 2011