eSefarad Noticias del Mundo Sefaradi
Publikado en El Amaneser #53
En Erets-Israel nasió el puevlo djudió. Akí tomó forma su identidad espirituala, relijioza i polítika. Akí obtuvo por primera vez su soveranía, kreo valores kulturales de importansia nasional i universal i dio al mundo entero el livro de los livros.
Después ke fue arrondjado de su tierra, el puevlo djudió le guadró su fidelidad afilú todas sus dispersiones, i nunka se kedó de orar por su retorno a eya, i de esperar el renasimiento de su libertad nasional.
Empushados por esta atadura istórika i tradisional, los djudiós se esforsaron en kada jenerasión de establesersen de muevo en sus antigua pátria. En las últimas dekadas, aboltaron en masa. Pioneros, imigrantes i defensores izieron enfloreser el dizierto, arrebivir la lingua ebrea. Fraguaron kazales i sivdades, i krearon una komunidad kresiendo, ke kontrolava su ekonomía i kultura propias, amante de la paz, ama kapache de defenderse de si para si, traendo las bendisiones del progreso para todos los abitantes del país, keriendo la independensia nasionala.
En el anyo 5657 (1897) se arrekojó el kongreso sionisto yamado por la boz del padre espiritual del estado djudió, Theodor Herzl, i proklamó el derecho del puevlo djudió a su renasimiento nasional en su propio país. Este derecho fue rekonosido por la Deklarasión Balfour del 2 de novembre 1917 i afirmado de muevo por el mandato de la Sosiedad de las Nasiones ke rekonosió ofisialmente i internasionalmente el atadijo istóriko entre el puevlo djudió i Erets-Israel i el derecho del puevlo djudió de fraguar de muevo su ogar nasional.
La Shoá ke aharvó al puevlo de Israel este último tiempo, kon la matansina de milyones de djudiós en Evropa, fue otra demostrasión klara de la adjilé de topar una solusión al problema del manko de ogar, kon el renasimiento del estado djudió en Erets-Israel ke tendría de avrir anchas las puertas de la pátria a todo djudió i daría al puevlo djudió la situasión de miembro rekonosido en la famiya de las nasiones.
Los sovrebivientes del olokosto nazi en Evropa i djudiós de otros paízes, no kedaron de ayegar a Erets-Israel, afilú las difikultades i el peligro, i nunka kedaron de afirmar sus derecho a una vida digna, líbera i kon onor en la pátria de su puevlo.
Durante la Sigunda Gerra Mundial, los moradores ebreos en el país partisiparon en plena parte en la lucha de las nasiones ke defendían libertad, paz i amor kontra la negregura de las fuersas nazis, i kon la sangre de sus soldados i sus esforso militar, ganaron el derecho de toparsen entre los puevlos ke fundaron la Organizasión de las Nasiones Unidas.
El 29 de novembre 1947, la Asamblea Jeneral de las Nasiones Unidas tomó una rezolusión disponiendo el establesimiento de un estado djudió en Erets-Israel. La Asamblea Jeneral demandó a los abitantes de Erets-Israel ke tomen en sus manos las medidas nesesarias para meter este plano en ovra. Este rekonosimiento por parte de las Nasiones Unidas del derecho del puevlo djudió de estableser su propio estado es irrevokavle.
Además es el derecho natural del puevlo djudió de ser maestro de su propio destino komo todas las otras nasiones, en un estado soverano propio.
En konsekuensa, mozotros, miembros del Konsejo del Puevlo, reprezentantes de la komunidad djudía de Erets-Israel i del movimiento sionisto, estamos reunidos akí en el día del eskapamiento del mandato britaniko sovre Erets-Israel, i, asigún los derechos naturales i istórikos del puevlo djudió, i también la rezolusión de la Asamblea Jeneral de las Nasiones Unidas, proklamamos el establesimiento de un estado djudió en Erets-Israel, es el Estado de Israel.
Deklaramos ke, desde el momento ke se eskapa el Mandato, a medianoche, noche del shabad 6 iyar 5708 (15 de mayo 1948), antes del establesimiento de las otoridades del Estado regularmente elijidas en akordo kon la Konstitusión ke devrá ser adoptada por la Asamblea konstituyente elijida no mas tadre ke el primo de oktobre 1948, el Konsejo del Puevlo se va azer Asamblea provizoria del Estado, i su organo exekutivo, la Administrasión del Puevlo, se va azer Governo provizorio del Estado de Israel.
El Estado de Israel será avierto a la imigrasión djudía i al arrekojimiento de los exilados, desvelopará el país para el bien de todos sus moradores, será fundado sovre los prinsipios de libertad, de djustisia i de paz ambezados por los profetas de Israel, dará una egalidad kompleta de derechos sosiales i polítikos a todos sus sivdadanos, sin konsiderasión de relijión, rasa o sekso. Akordará la libertad de relijión, konsiensia, lingua, edukasión i kultura, defenderá los lugares sagrados de todas las relijiones i será fiel a los prinsipios de la Karta de las Nasiones Unidas.
El Estado de Israel esta dispuesto a kooperar kon las Ajensías i reprezentasiones de las Nasiones Unidas para exekutir la rezolusión de la Asamblea Jeneral del 29 de novembre 1947, i adoptará todas las medidas nesesarias para la unión ekonomika de todo Erets-Israel.
Yamamos a las Nasiones Unidas para ke ayuden al puevlo djudió en la konstruksión de su Estado i para ke resivan el Estado de Israel en la famiya de nasiones.
Yamamos – afilú en medio de la agresión sangrienta ke mos aharva desde mezes – a los ijos del puevlo arabo biviendo en el Estado de Israel para ke guadren la paz i partisipen en el fraguamiento del Estado, sovre la baza de sivdadanía plena i igual i de una reprezentasión korespondiente en todas sus institusiones provizorias i permanentes.
Tendemos una mano de paz i de buen vizindario a todos los estados vizinos i a sus puevlos, i los kombidamos a estableser atadijos de kooperasión i ayudo mutual kon el puevlo djudió soverano asentado en su tierra. El Estado de Israel está dispuesto a realizar su parte en el esforso komún para el progreso de todo el Medio Oriente.
Yamamos a todo el puevlo djudió en la diáspora para ke se adjunte alderedor de la komunidad del Estado en el lavoro de imigrasión i de fraguamiento i para ke sea unido a eya en la grande lucha para realizar el suenyo de tantas jenerasiones: la redempsión de Israel. En la seguridad del Tsur Israel, metemos muestros firmamientos sovre esta Deklarasión en esta sesión del Konsejo Provizorio del Estado, sovre el suelo de la pátria, en la sivdad de Tel Aviv, en este tiempo antes de Shabad, el sinko de iyar 5708 (14 de mayo 1948).
Fuente: Los Ladinadores
