La boz de Yehuda: Livros: Una novela autobiografika "Caminos de leche i miel" de Rafael Arditti Algazi y "La duda" de Margalit Matitiahu

En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí.
Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita

Una novela autobiografika

Un buen amigo mio de Mexico, me regalo un livro, eskrito por Rafael Arditti Algazi. El titolo del livro es «Caminos de leche i miel»; i aun ke el livro esta eskrito en espanyol, bien se nota de su estilo, fluente i liviano, ke la lengua materna del autor es el judeoespanyol.

Para vos, keridos amigos, traduizi dos-tres paragrafos del livro:

«Nasi en la sivdad de Izmir, en 1937, en el seno de una famiy judia kompuesta por kuatro personas: mi padre, de nombre Yeushua (Salvador), mi madre Esther, i mi ermana menor Sara.

Serka de mozotros, pero en otro kuartier, bivian mis avuelos  paternos Rafael i Djoya, asi komo mi avuela materna Mazalto….

…En todas la komunidades respektavamos el Shabat, i desde el viernes por la tadre komensava la selebrasion. Biviamos i a la espera de las fiestas relijiozas, las ke gozavamos mucho.

A mi me dava la impresion ke todos bivian el dia sin pensar en el dia de amaniana. A ninguno le importava lavorar mucho para azerse riko. Lo realmente valutozo era bivir feliz i tomar plazer del momento o del dia, sin ke faltaran akeos pekenyos gustos ke se davan los adultos, komo kuando savoreavan una kopa de raki, akel anis turko konsiderado bevida nasional.»

***
Aserkandome a las ultimas fojas del livro, me enkontri kon una sorpreza muy plaziente: El autor inkluyo aya el artikolo de muestra amiga Eliz Gatenyo sovre la «Kortadura de Fashadura»…

Podesh meldar de muevo este artikolo, en Ladinokomunita, en indo al mesaje 31945 del 14 de marso 2010.

——————————————————————–

De mi parte, kaje NO tengo DUDA ke todos ladinoavlantes ya konoseran a la eskritora i poetesa Margalit Matitiahu.

Indemas, los abonados sovre los periodikos del «Shalom» i «El Amaneser» ke aparesen en Istanbul, avian meldado, por seguro, el anyo pasado, una entrevista grande kon Margalit; tambien, resientamente en eSefarad.

Margalit Matitiahu eskrivio i publiko algunos 15 livros de poezia en Judeoespanyol, i livros de sus poezias kon version en ebreo.

indemas, miles de espektadores en varyos paizes, ya vieron los filmos ke prodizio djuntos kon su ijo Jack Matitiahu:  «Toledo – el secreto oculto», «Sefarad – caminos i vida», i mas otros.

Antes unos kuantos mezes salyo a luz en Israel su primer livro de proza (en ebreo), titulado «haSafek» («La duda»).

Este livro kon kurtos kuentos kaptivantes, gano muchos aplauzes literarios en las revistas de este pais. I na, ke no paso mucho tiempo, i el livro fue traduizido al kasteyano (dunke titulado «La Duda»), i ya salyo a luz en Espania kon un prologo muy erudito i interesante, eskrito por el editor literario Santiago Trancon.

Por no alargar mucho, vos do aki abasho unos kuantos enlases ke vos daran una informasion mas detalyada sovre la autora i sus ovras.

http://www.televeo.com/Cultura/presentacion_de_la_duda_de_margalit_matitiahu

http://blog.televeo.com/general/cultura-literatura-la-duda-de-margalit-matitiahu/

https://esefarad.com/?p=20871

http://www.infovaediciones.es/author/santiago-trancon/

Yehuda Hatsvi
Erets Yisrael
Para Ladinokomunita