La boz de Yehuda: RAMBAM admirado por el puevlo

Me parese ke todo ya fue eskrito sovre RAMBAM.
 
Kon todo, kijiera adjustar una koza o dos sovre la admirasion ke siente el puevlo, durante muchas jenerasiones, verso este grande savio judyo sefaradi.
 
La dicha mas konosida es una parafrasis al pasuk (en Devarim 34, 10) ke dize: «De Moshe (Rabenu) asta Moshe (Rambam) nunka mas se levanto komo Moshe».
 
Indemas, entre muestros hahamim se uza mucho yamarlo al Rambam kon el titolo de onor «haNesher haGadol» («La Agila Grande»).  Este grado es bazado sovre el pasuk (en Yehezkiel 17, 2): «La agila grande, de grandes alas i de largos miembros, yena de plumas de diversas kolores». 

De lo ke se save, fue el RAABAD el ke dekoro al RAMBAM kon este titolo. RAABAD, konosido komo Rabi Avraam ben David de Posquires (1120-1198).

Es muy interesante, porke RAABAD fue uno de los savios en akea epoka ke ekspresavan objeksiones a varyas ideas filozofikas de Rabi Moshe ben- Maimon; ma al mismo tiempo rekonosian su grandor. Este fato (de antagonistas estar a favor del oponente), lo veo yo komo un sinyo onorario ke lo meresen estos savios judyos tambien.

La lejenda mos konta ke Ribi Maimon (el padre de Rambam) estava muy embolvido en sus estudios i no pensava de kazarse, ma mas de una vez se le aparesio en el suenyo una persona onorada (o kisas un andjel) ke le diziya: «Kale ke te kazes kon la ija del karnesero en sivdad fulana».

Rabi Maimon bushko a este karnesero deskonosido i se kazo kon su ija.    Eya kedo prenyada, i paryo a Moshe, ma murio en el parto. 

Es muy kuryozo ke muchas de las lejendas sovre Rambam mos kontan sovre milagros i fuersas mas arriva de la natura, mientras ke Rambam era una persona rasionalista, ke luchava toda su vida kontra los ichizos, las superstisiones i la astrolojia.

Ma, todas estas lejendas djustamente ekspresan la amplia admirasion del puevlo sovre el gran savio. 

Es bien previsto ke sovre la muerte i el enterro de Ramabm kresio i una lejenda enteresante:  Rambam, komo lo savemos, murio en Cairo (en Ejipto). Antes de su muerte ya ordeno el Rambam de enterrarlo en Erets Yisrael, ma no desho enkomendado en kual lugar. Desbrocharon entonses pletos entre las varyas komunidades judias del paiz, ke kada una de eyas dezeava el onor de tener a los guesos de Ramabam deskansar en su territorio.

La solusion ke se topo fue de enkargar el ataud del Rambam sovre un gameo i desharlo al gameo libre a ir ande da el aire. Despues de tres dias de vagabondaje, arrivo el gameo a la sivdad de Tevaria i se arrodiyo para repozar ayi. 

Asta oy, la fuesa de Rambam en Tevaria es un sitio popular de pelegrinaje.

Mijor de todas las lejendas me plaze esta la ke vos do agora.

Aki se reflekta la saviduria de este mediko renomado en la alma umana.

Mos kontan ke uno de los vezires del sultan Saladin era una persona muy kruela ke azia grandes maldades a los Judyos. Rambam era defendedor bueno de los judyos, ma aun kon todo no pudo azer mucho kontra akea mala persona ke se yamava Nagib-Bey. En fin topo Rambam un kamino para azerlo temblar un poko:

Kada maniana, se enkontravan a la puerta del sultan, i Rambam le diziya a Nagib-Bey: «Ke tienes Nagib Bey? Te veo muy palido!» u «Si te duele koza, no lo deshes sin kuidar. En neglijando, puede afitar koza grave!». 

No pasaron muchos dias ke este Nagib Bey vino korriendo a la klinika de Rambam el mediko. De tanto oyir las remarkas de Rambam, le aferro un espanto, i de verdad se konsentio yeno de hazinuras i dolores. 

Rambam le aprometio de kurarlo, en kondision ke no aga mas mal a los judyos. Ansi fue. En beviendo, durante dos semanas largas, las drogas amargas de Rambam, akel Nagib Bey se sentio mijor, a poko a poko, asta ke «se sano» enteramente.

Esta lejenda es para mi (i para ti, tambien!) komo un konsejo autentiko de parte de Rambam; ke kuando te enkontraras kon kualkier persona, dile un buen «Shalom» i «Buenos dias» kon sonriza en tu kara. No te kosta nada de azerlo, ma la sonriza aze plazer a la persona de enfrente. Muchas vezes -komo si era un espejo- resiviras i tu una sonriza i kara alegre.

Dias buenos ke tengash.

Yehuda Hatsvi