eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
«MELDAR»
Ya lo avlimos en pasadas en Ladinokomunita; ke es bien posivle ke la palavra «meldar» es una anagrama (transpozision de letras) o talvez transformasion de una palavra ebrea.
Puedeser ke en el prinsipio, uzavan muestros padres la palavra «lamdar», i kon el tiempo se troko a «meldar».
En ebreo, LiMuD (las letras «Lamed», «Mem», «Dalet») sinyifika estudio. De todo modo, la parte prinsipal del estudio la adkerimos mezo el meldar.
El metodo del enseniar en las eskolas o en las Yeshivot antiguas era de meldar en tambien resitando lo ke se meldava; ansi (en lo ke yamamos oy «el metodo audio-vizual») el estudio, al pareser, se absorba mijor
Aki en basho vos do una konsejika sefaradita, ke por seguro ya la konosesh de vuestra chikez. La eskrivi en ebreo, i fue publikada en el jurnal «Hatzofe liladim» en el 4 de Enero 1991.
Por azerlo mas livyano, aki, mas abasho, vos do mi traduksion en muestra lingua:
MELDA, MELDA !
Un dia de viernes salio Yeshaya, akel maestro viejo, al soko (merkado), a desmersar i merkar todo lo ke es
menester para Shabat. El merkado estava muy ruidozo. Mucha djente sorreteavan ayi, aziendo kompras. Los vendedores en las tezias, i los vendedores ambulantes, proklamavan a boz muy alta sovre la merkansia ke ofresian a la venta.
Entre todas las bozes ke se sintian al derredor, sovresaliya la boz de un djoven, kaje un ninio. Este djoven gritava kon toda su fuersa i proklamava sin sesar:
– «Ende mi – todo barato! Merkando aki! Barato del barato vendo yo!»
Esta boz del djoven le sono a Yeshaya muy konosida. El se aserko mas por aya, i, si, el rekonosio al manseviko, el ke antes unos kuantos anyos era uno de sus elevos: un ninio haylaz (perezoso), ke se niega a estudiar. Eventualmente, este elevo abandono sus estudios i desho la eskola por en medio.
– «Shalom, senyor maestro!» yamo el djoven i enshugo la sudor de su frente.
– «Shalom i Beraha, kerido Yitzhak» respondio el maestro. «Komo te tengo?»
– «Ah, no tan bueno! Es un servisio duro. De la maniana asta la tadre esto aparado al lado del tezia, i mi dover es de anunsiar en boz alta, kon yugo i enerjia; na, komo ya lo avias sintido endagora».
– «Aman, ke pekado. Pekado!» disho el maestro kon tristeza. «Si meldavas ANTES komo asi, apenas te oyi gritando, no teniyas agora de gritar komo gritas»…
Yehuda Hatsvi
Erets Yisrael
Para Ladinokomunita
