En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

La fiesta de Tu beAv

Muchos en Israel konosen (o rekonosen) la data de Tu beAav komo «la Fiesta de Amor».  En realidad no muchos la selebran aki, i ayinda menos saven las raizes istorikas de la fiesta.

En el Talmud topamos el testimonio de Rabi Shimon ben Gamliel (116-185):
«No avian dias buenos a Yisrael mas ke el dia de Tu beAv i en (la salida del) dia de Kippur, kuando las ninyas de Yisrael saliyan, vestidas todas de blanko, a baylar en las vinyas».

Entre bayles i kantes, es kaje natural ke se desidiyan kazamientos apresurados. o bazados sovre «amor a primera vista».  Ma, de toda manera, me agrada la idea de este «uniform» de vistido  de blanko. Esto fue, para borrar las diferensias entre las ninias rikas i las ninyas de esnaf o de famiyas proves.

Mas ke seguro, ke estas fiestas ya eran nada mas ke una memoria nostaljika en el tiempo de Rabi Shimon: Despues de destruksion del Bet haMikdash (en konsekuensa de la revolta kontra los Romanos en el anyo 70), pokas vinyas kedaron en Erets Yisrael, ni muchas ganas de baylar.

Otra referensia sovre la kostumbre de baylar en la vinyas (al pareser en Tu beAv) topamos en el livro de Shoftim/DJuezes (21,19):
«Ek, ay fiesta de Adonay en Shilo kada anyo / de anyo en anyo».

Ay de notar aki, ke despues de la konkista de la tierra prometida, la sivdad de Shilo fue el sentro espiritual del puevlo de Yisrael, i el Oel Moed (el tavernaklo) fue pozado aya, asta el dia ke se fraguo el Bet haMikdash en Yerushlayim, en los dias del Rey Shelomo.

En los kapitolos 20 i 21 del livro de Shoftim mos kontan por un akontesimieno de brutalidad (violo/violasion i asasinato) en el territorio del trivo de Binyamin. Todos otros trivos de Yisrael salieron a una gerra kruela de kastigo kontra Binyamin, i despues «los varones de Yisrael avian djurado, diziendo:
Ninguno de nozotros dara su ija a los de Binyamin por mujer…
i alsaron su boz, i yoraron kon gran yanto».

Despues de tiempo, al ver ke tal djuramiento de boykot va kavzar ke el trivo de Binyamin se va despareser enteramente, buskaron komo ayudar a los mansevos de este trivo machukado (ma sin baldar el djuro). Dunke les konsejaron:
«Andad, i aseladar (azer embuskada) en las vinyas….
kuando saleran las ninias de Shilo a baylar en dansas….
i arrevataresh para vozotros kada uno su mujer de las ijas
de Shilo».

Todo este relato en el livro de Shoftim me estremese de muevo kada vez ke lo meldo. Kon todo esto, ay en la konkluzion un aire de rekonsiliasion entre los trivos del puevlo. Un poko de afalago. Ma, en mi opinion, no tiene tal relato nada de ver kon amor. Tambien no mos da ninguna repuesta al motivo i el orijin de akea fiesta antigua en Shilo.

Segun el Midrash, el orijin de la fiesta de Tu beAv esta enfinkado en los akontesimientos relatados en la Tora  (en el livro de Bamidbar, kapitolos 13 i 14).

Dos anyos despues de la salidura de Ayifto, los ijos de Yisrael arrivaron a la frontiera, a la puerta de la tierra de Kenaan. Entonses, Moshe mando 12 ombres onorados (uno de kada trivo) a eshpionar el paiz. Un paso muy lojiko antes de entrar a la gerra de konkista.

Los espiones tornaros kon haberes buenos sovre la tierra ke es buena i ke «mana leche i miel».  Ma, disheron demazia: «El puevlo ke mora en la tierra es fuerte… i las sivdades enkastilyadas… no podremos suvir kontra el puevlo».

Dos de los espiones estavan seguros ke «suvir suvamos, i la tomemos (a la tierra) en posesion; porke podremos sudjeftarla… Adonay esta kon nozotros.»

Ma los ijos de Yisrael estavan en un atako de panika, i no kijeron ni oyirlos. I disheron toda la kompaniya:
«Mijor uvieramos muerto en la tierra de Ayifto, o en este dezierto! Makare murieramos!»

…»I toda la kompaniya alsaron grito, i dyeron bozes, i el puevlo yoraron akea noche».

La sentensia del Dio no tadro a venir, diziendo: «Todos los varones ke vieron mi onra, i mis senyales ke ize en Ayifto i en el dezierto, i me prevaron estas diez vezes, i no eskucharon a mi boz, NO veran la tierra ke djuri a sus padres… vuestros kuerpos kayeran en este dezierto, i vuestros ijos andaran errando en el dezierto kuarenta anyos!»

Segun muestra tradision, akea noche amarga fue la noche de Tisha beAv (9 del mez de Av)…

El midrash Bamidbar Raba (16, 20) dize ke por el «yoro por nada»  ke yoraron muestros padres en akea noche de Tish’a beAv, se izo tala data saturada de yoros por muchas jenerasiones.

De lo ke eskrive en la Tora savemos ke desde akea noche, durante 38 anyos, rodearon muestros padres en el dezierto, sorretearon i erraron, asta ke todos los ombers, de vente anyos i arriva, los ke salieron de Ayifto, murieron en el dezierto.

A propo, los komentadores de la Tora kreen ke durante todos los 38 anyos, en los kual el puevlo fue komo anatemizado, el Dio NO avlo kon Moshe. Esto lo entienden muestros savios del pasuk (en Devarim, 2, 16):
«I akontesio, ke kuando todos los varones de gerra fueron akavados por muerte de entre el puevlo, Adonay me avlo, diziendo, etc.»

La lejenda judia, (ke no siempre es adekuada o konveniente para relatarla a muestros nietikos chikos), mos konta por un ritual shokante:

Kada noche del 9 del mez de Av, yamava Moshe al puevlo, i kada uno de los ombres se kavakava su foya (su fuesa), se echava en la foya i ansi pasava la nochada. A la madrugada saliya boz ke proklamava:
«Se aparten los bivos de los muertos!».

Estonses, saliyan los bivos de las fuesas, i todos los muertos de akea noche se enterravan (algunos 15000 kada anyo).

En el ultimo anyo, (komo abitualmente), entraron los ombres a las eskavasiones i asperaron kon alma akorada. Kuando amanesio el dia vieron ke no se reklamo koza, ni uno de eyos no fue topado muerto.

Pensavan, ke puede ser se yerraron en la data; ma despues de unas kuantas noches de espera i de miedo, kuando la luna ya estava en kinze, entonses estavan muestros padres seguros i konfiyentes ke la data de Tish’a beAv ya paso, i ya se anulo la Gezera (sentensia) del Dio.

La fiesta de Tu beAv, es antes de todo la alegria por el anulamiento de la Gezera de la muerte. Es la alegria de la vida.

Segun muestra tradision, las mujeres (muestras madres), NO «partisiparon» en los yoros i yantos de los ijos de Yisrael en akea noche kuando tornaron los espiones de sus mision en la tierra de Kenaan.  Eyas nunka pedrieron la esperansa i la feuzia en el Dio.

Talvez, esta fue la razon de la alegria dublada i redublada de las ninias de muestro puevlo kuando baylavan en las vinyas…

Salud i vida a todo Yisrael !

Yehuda Hatsvi
Erets Yisrael
Para Ladinokomunita