eSefarad Noticias del Mundo Sefaradi
La primera semana de avril, en el enkontro del Salon de Ladino, eskuchimos kon atento a la konferensia dada por Nisim Guvenis sovre las sinagogas en jeneral, i las sinagogas de Turkiya.
En el Loby del Bet Avot Recanati, ayinda se prezenta una galeria de fotos de las sinagogas de Turkiya, fotos travadas por Jarvis Davon, i mostradas en varyas egzibisyones en el mundo.
Aze dos anyos, fue el Sr. Guvenis mizmo el ke mos ilumino i mos ekspliko uno por uno sovre los Kales de Turkiya.
En varyos deskuvrimientos arkelojikos, se toparon ruinas de sinagogas antiguas, empesando de antes 2260 anyos, en una sivdad serka de Alexandria (Ejipto), en la izla grega Delos, en Sardis, en Priene, serka de Aydin, i mas.
En Erets Yisrael tambien egzisten ruinas de Kales de antes mas de 2000 anyos en Yeriho, Capernahum, i mas.
Segun el Talmud, asta la destruksyon del segundo Bet Mikdash, avia en Yerushalayim 480 sinagogas. Estas no eran grandes edifisios, ma lugares modestos para orasion.
En Evropa oksidental egzistiyan sinagogas, al pareser desde el siglo 3 o 4. Las mas konosidas son la sinagoga en la sivdad de Ostia, (un porto romano en Italia), i la sinagoga de Barcelona ke fue destruida durante los maskarades de los judios en 1391.
Avlando por la lista grande de sinagogas en Evropa, ay de notar, ke en la noche terrivle yamada «Kristalnacht», se destruyeron en Almania mas de 200 sinagogas, i algunas otras 95 sinagogas en Austria.
Es kuryozo, ke no egzisten siertas reglas estandardizadas komo deve ser una sinagoga. En la Alaha no topamos ninguna indikasion sovre la forma de una sinagoga ni ninguna deskripsion de su arkitektura.
Ma, ay reglas sovre el interior de la Kehila:
1. Deve de aver ventanas
2. El Ehal deve ser en la direksion de Yerushalayim
3. La entrada a la sala de orasion tiene de ser frente del Ehal.
El uzo viejo, ke ande mozotros, los sefaradim, nunka se troko, es ke la Teva (lo ke muestros ermanos Ashkenazim yaman «bima») estara siempre en el sentro de la sala de orasion.
Kave senyalar, ke al kontrario de lo ke pasava mucho en la Evropa oksidental, en Turkiya, nunka uvo proibision o limitasiones a la libertad de relijion.
No es ke todo fue «leche i miel» durante mas de 500 anyos de vida komuna kon los turkos, ma komparando kon lo ke sufrieron muestros korelijionarios en la Evropa, mos puedemos konsiderar orozos.
La konferensia del Sr. Guvenis mos dyo a saver muchos detalyos sovre las varyas sinagogas en el mundo en jeneral, i sovre las de Turkia en partikolar.
Despues de la konferensia tan interesante, muchos de los miembros del Salon tomaron la palavra, demandando mas aklarasiones, remarkaron sovre kostumbres i reglas en la sinagoga, o remembrando sinagogas de sus chikez.
Semanada buena !
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
