eSefarad Noticias del Mundo Sefaradi
Ver todos los artículos de esta sección
Revelasion de Eliyahu
En mi chikez, mi madre (komo siempre por darme algun moral o dotrino), me avia kontado una konsejika kon Eliyahu el profeta.
Ma, vos aseguro ke tala konseja no egziste ayinda en ningun livro o koleksion de los kuentos de Eliyahu aNavi. Ke lo gozeseh!
Avia en una de las tierras del Imperio Otomano un rabino, Sistrano se yamava. I era este judio, bueno i derecho, i temerozo del Dio, i apartado del mal.
Harbi Sistrano bivia en kondisiones de povreza, ma nunka no se keshava, ni mensionava en sus orasionen los problemas de la egzistensia. Todo su dezeo era de ser dinyo a ver una revelasion de Eliyahu el Profeta, sea afilu por un kurto tiempo.
«Kien de el Dio espera, no se despera»; i na, ke un dia yelado buz de envierno, en medio de una tormenta de nieve, aparesyo Eliyahu, kon su manto kolorado sovre sus ombros, al enkontro de Rabi Sistrano, i lo yevo a una kavanya aislada en el boske.
Antes de entrar a la kavanya se echo Rabi Sistrano sovre sus fases, i toko reverentamente el borde del manto santo.
Afilu en entrando a la baraka, Rabi Sistrano temblava de emosion i titereava de tanto frio. Grasias al Dio ke la lumbre en el fogarero kaentava bien el ambiente. Harbi Sistrano kedo parado en pies, i no se atrevo a mirar en los ojos de Eliyahu.
Komo uno somnambulo, sintio al profeta diziendole: «Asentate, Ribi Sistrano. Empesamos a estudiar».
El dia entero asta medianoche no kito Ribi Sistrano ni un «pi» de la boka, fasinado de la ensenyansa sublime del gran profeta.
Al segundo dia, se entereso Rabi Sistrano mas i mas en el estudio, i a reunido un poko de koraje a demandar unas kuantas preguntas.
Estava tresalido de la alegria a ver la buena, amigavle, sonriza en la kara de Eliyahu aNavi, enkorajandolo durante la lision.
El ambiente fue tan amable asta ke Rabi Sistrano se dirijo al profeta por su primer nombre: «Eliyahu!».
En el treser dia, el frio afuera se izo mas intenso, i en el mizmo tiempo, la lumbre en el fogarero/soba se avia apagado.
Fue un poko difisil para Harbi Sistrano konsentrarse en el estudio.
Eliyahu aNavi se levanto de la meza i disho:
– «Vo salir al kurtijo a trayer lenya para arrebivir al fuego en la soba».
Lo dicho – echo.
Ma, en korriendo kon adjele afuera, desho el profeta la puerta avierta de par en par. Un viento frio muy fuerte entro al interior de la kavanya.
– «Ey, Eli!!», grito Rabi Sistrano, «Lenyo!! Kavesa dura! Deshates la puerta avierta!».
Si keres tu onor guadrar, no te agas barabar.
(No te agas eksesivamente amigavle de alguno).
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
