eSefarad Noticias del Mundo Sefaradi
Ver todos los artículos de esta sección
El Ministerio de Kultura de Maroko, anunsyo en estos dias, ke la sinagoga al nombre de Rabi Eliyahu Hazan en Kazablanka, (fraguada en 1937), es inskrita agora komo un patrimonio nasional.
Kien fue el rabino Eliyahu (Behor) Hazan?
Rabi Eliyahu Hazan nasyo en Izmir (Turkia) en 1848 en una famiya renomada de rabinos: ijo de el Rav Yosef Refael Hazan, i en nieto de el rabino famozo Haim David Hazan, el autor del livro (en ebreo), Nediv Lev.
(Rabi Eliyahu Hazan, en su kurta vida (60 anyos) eskrivio ocho livros de Alaha).
Rabi Eliyahu, a la edad de Bar Mitsva, izo Aliya a Erets Yisrael, i ambezo Tora de boka de su avuelo/nono.
En el anyo 1866 fue nominado el sekretario del Bet Din en Yerushalayim, i tres anyos despues ya fue nominado Dayan en el Bet-Din de Rabi Avraham Ashkenazi, djuntos kon Rabi Rahamim Yosef Franko.
En el anyo 1870 salyo Rabi Eliyahu a Evropa, embiyado de la komunidad, para enkontrarse kon filantropos judios, i demandar ayudo en favor de los proves de Yerushalayim.
Rabi Eliyahu Hazan konosia muy bien la lenguas: arabo, espanyol, franses i italiano, i este fato de saver linguas ajenas, le izo provecho en los enkontros kon el Baron James de Rothschild i kon el Sir Moshe Montefiore.
En 1872 salyo Rabi Eliyahu, una vez mas, a Aldjeria, Tunisia i Maroko.
Durante sus viajes en estos paizes, eskrivyo muchos responsos en kestiones de Ley.
En los anyos 1874-1888, el sirvio komo el rabino de Tripoli.
Durante su estada en Maroko, el eskrivyo un Piyut (en ebreo), ekspresando su eskarinyo i admirasion a Yerushalayim.
La melodia del Piyut es, al pareser, una melodia marokana popular.
En el enlase, aki mas abasho, puedesh eskuchar al Trio Andalus kon el Piyut de Rabi Eliyahu Hazan:
https://web.nli.org.il/sites/nlis/he/song/pages/song.aspx?songid=19#2,20,396,130
La primera estrofa del Piyut (en mi traduksion libre al judeoespanyol):
“”””»Orare dia por dia, i demandare, mientras mi mirada, siempre dirijida a ver; kuando vendre i vere a Yerushalayim konstruida! “”””
Rabi Eliyahu Hazan izo estabeleser un Talmud Tora para ninios, en el kual se ensenyava non solamete Tora i Talmud, ma tambien las lenguas ebreo i italiano; kon el buto ke los eleveos sean kapaz a dirijirsen en el komersio i en el servisio de la sosiedad.
En el anyo 1888, El Rav Eliyahu fue nominado Haham Bashi de Alexandria (Ejipto), un posto ke lo kumpliyo durante 20 anyos.
Semanada buena!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
