eSefarad Noticias del Mundo Sefaradi
Ver todos los artículos de esta sección
Tel Aviv mi sivdad
Kaje toda mi vida (desde 1934, en mi edad de 18 mezes), pasi en la sivdad de Tel Aviv.
En 2009 pasimos a morar en otra sivdad, en la rejion del Sharon. En esta sivdad, la vida es mas trankila, kalma; i segun la estatistika ofisial, la “esperansa de vida” aki es mas larga ke la de la esperansa de vida de Tel Aviv; (espero ke es verdad)…
De vez en kuando, por varyas angarias, tengo de viajar a Tel Aviv, i bien apersivo ke la sivdad esta trokando de kara. Edifisios djigantes, mas altos de “la torre de Babilonia”, estan kresiendo de dia en dia mas, i el trafiko en las kayes se ijo kada vez mas denso i pezgado.
Tel Aviv, mi sivdad, “deke tenesh la kara tan demudada?” Tengo eskarinyo de la “Chika Tel Aviv”!
Mi amigo, Yossi DE LEON, me mando ayer un enlase en el kual podesh meldar un reportaje (en ebreo) sovre Yehuda Magidovich (1886-1961), el primer Injenier de la Sivdad Tel Aviv.
El reportaje esta akompanyado kon fotos de edifisios ke el avia dezenyado, i ke ansi dyo forma al imajen de la sivdad:
https://xnet.ynet.co.il/articles/0,7340,L-5570533,00.html
La nostaljia a vezes duele…
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
