eSefarad Noticias del Mundo Sefaradi
Ver todos los artículos de esta sección
Ke a fazer kon las kapsulas?
Karos amigos,
Para mi, ya me es muy tadre a trokar de los uzos de mi chikez, ma segun veo en muchas kazas en Israel, el kafe/kave turko ya abasho de su grandeza.
Las reklamas en la televizion, i en los juranles, ya me indikan ke mucha djente aki (i por seguro en Evropa tambien), ya tienen en kaza makinas para “azer kafe” kon kapsulas.
Las muevas jenerasiones en Israel se entienden bien en komidas de todas partes del mundo, tambien saven gozar el bever de kafe, tanto komo vino.
El poeta de Tehilim (104, 15) ya savia ke “el vino alegra el korason del benadam”, ma en su tiempo, el kafe no fue konosido ayinda.
Todo bueno esta, ma ke se aze kon los bokales/redomas de vino o las kapsulas de kafe?
Los bokales de vidro son un material ideal para resiklarlos.
Ma ke azer kon las kapsulas?
En el sentro grande de resiklaje de “Nespresso” en Israel se uza el aluminio de la kapsula. Ma ke se aze kon las sovras/kusures/restos de kafe?
“Nespresso”, la kompania de kafe en kapsulas, bushko i topo una idea kreativa; i en kooperasion kon el lagar “Harey haGalil” desidieron, antes
dos anyos, de provar a mesklar un buen persentaje de kafe en la fertilizasion de las vides/vinyas.
Al pareser ke el proyekto reusho. Las uvas en las vinyas ekolojikas, (fertilizadas kon el kafe), salieron savrozas, muy dulses, i no se nota ningun “re-savor” “regusto” del kafe.
Agora esto en espero a gostar el vino produizido de talas uvas.
* * *
En el enlase ke vos do aki, toparesh una otra chika idea ke a fazer kon las kapsulas, despues de bever vuestro kave de alegria: https://www.youtube.com/watch?
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
