eSefarad Noticias del Mundo Sefaradi
Ver todos los artículos de esta sección
«Mashalikos» en judeo-espanyol (1)
Entre muchas frashkas i talash, i mabul de bavajadas ke resivo kada dia mezo la internet, a vezes yene se topa i alguna perlika.
Esta semana resivi de un amigo una fotokopia de un kuaderno yamado (en ebreo): «Mishle Espanyolit-Yehudit» («aforizmos en judeo-espanyol»).
Este kuaderno, eskrito por Yitzhak Yehezkel Yehuda, fue imprimido en Yerushalayim en 1928. Es por la primera vez ke me enkontro kon el nombre del autor, i malgrado mi bushkeda en la internet i en la ensiklopedia, no topi alguna informasion sovre el.
El biervo ebreo «mashal» no es solamente «fabula», ma tambien un kuento imajinario o alegoriko, aforizmo i proverbo. El diksionario ekselente de Nehama lo ekspliko bien, en parte, ma, «me suvieron los fumos a la kavesa» de notar una vez mas la lakuna del autor en la kultura judia: Nehama eskrive en su diksionario ke el biervo «masal» derive del turko. I ande desho i abandono Nehama al Rey
Shelomo ke peno i eskrivio, i mos regalo el livro de MISHLE, ke entro a la Biblia?
[En mi opinion, es muy posivle ke el biervo mashal (o masal) entro al turko por los arabos, ma esto fue solamente kon la dominasion del islam, no antes del siglo 7].
De toda manera, me akodro de los selaniklis viejos ke konosia yo en mi chikez; eyos raramente kulaneavan los biervos «proverbio» o «refran». Eyos dizian: «mashaliko». Oy no topo esta palavra ni en los diksionarios.
Ma, tornaremos al kuaderno de YYY (Yitzhak Yehezkel Yehuda).
El total de los mashalikos ke mos trae el autor es 139.
En akea epoka del siglo 20, kada mujer de las muestras savia i empleava en sus konversasiones algunas sinko vezes mas de esta kantidad…
Pero, es interesane, ke YYY trata, en muchos de sus refranes, a konvenser a sus lektores ke una idea semejante de tal proverbo ya fue ekspresada en la Biblia, en el Talmud, etc.
Por egzempyo, por el refran «En boka serrada no entra moshka», mos da el autor de referensia e l pasuk en Mishle 21, 22:
«El ke guarda su boka i su lengua, guarda de angustias su alma».
A kontinuar…
Yehuda Hatsvi
Erets Yisrael
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
