eSefarad Noticias del Mundo Sefaradi
Ver todos los artículos de esta sección
EL PROFESOR CANNABIS
Yehuda Hatsvi
El orijin de la famiya Meshulam de Sofia, Bulgaria, es de los reinados istorikos de Venezzia i de Bavaira.
El padre de Refael, yamado Moreno Meshulam, era mediko, i el direktor del ospital judio en Sofia.
Kuando desbrocho la Gerra Mondiala II, i Bulgaria era una de los aliados de Alemania, la famiya de Meshulam se eskondieron en los kazales leshanos del Balkan. (En mientres, Refael alkanso estudiar un solo anyo de injeniera kimika).
En 1944 parvinieron yegar a Erets Yisrael a traves de Turkiya.
En 1957, Refael Meshulam kumplio su doktorato sovre Sintesis de Esteroides, en el Instituto de Weizmann, en Rehovot, Israel.
En 1960 Refael Meshulam paso (en Rockefeller Institute, New York), sus egzamenes de post-doktorato, en el tema de Terpenos (kompuestos organikos).
En 1964, el Prof. Refael Meshulam deskuvrio en la planta del Cannabis el puro komponento Psikoaktivo (THC), i fue kapaz de aizlarlo.
Durante los anyos desde este deskuvrimiento, el Prof. Meshulam kontinuo sus investigasiones, i eskrivio algunos 350 artikolos sientifikos i tres livros sovre el sujeto.
En el mundo entero es rekonosido komo el “Profesor Cannabis”.
Aki podesh ver uno de munchos videos (ke podesh topar en la Internet) sovre muestro Refael Meshulam.
המדען – פרופ’ רפאל משולם והמערכת האנדוקנבינואידית The Scientist – hebrew subtitles from klein zach on Vimeo.
Oy ay en el mundo mas de mil kompanias farmaseutikas kon ekipos de investigasiones, kon el buto de produzir (del Cannabis) drogas anagetikas i melizinas aplikadas espesifikamente para varyas i diferentes hazinuras.
De una droga negativa i danyoza (komo el “Hasish”), surjio de la planta Cannabis una mueva esperansa para el benefisio de la umanidad.
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
